Māreko 1 - Cook Island Maori Revised New Testament(CIMRNT)

Te ako'anga a Ioane Bāpetīto(Mātaio 3.1-12; Luka 3.1-18; Ioane 1.19-28)

1Ko te 'akamata'anga o te tuatua meitaki nō runga i a Iēsū Mesia, te Tamaiti a te Atua.

2Mal 3.1Kua tupu mei tei tātā'ia ki roto i tā Īsaia peroveta ra,

“Tē nā kō maira te Atua, ‘Inā, e tono atu au i tāku karere nā mua i a koe,

ē nāna e 'akameitaki i tō'ou ara.’

3 Isa 40.3 'E reo nō tēta'i i te tūtū 'aere'anga i te mēdēbara,

‘Ka 'akate'ate'amamao i te arāta'a o te 'Atu,

e 'akatikatika i tōna au mataara.’ ”

4I pērā a Ioane i te bāpetīto 'aere'anga i te mēdēbara, ē te tuatua 'aere'anga i te bāpetīto tatarā'ara kia matara te 'ara.

5Kia 'aka'ope maira tō te 'enua ra tō Iūdea ē tō Iērūsalēma i aia ra, ē bāpetīto kātoatoa'ia i'ora e ia i te kauvai i Iōrīdāna, ma te 'a'aki i tā rātou au 'ara.

6 2 Arik 1.8 'E 'uru'uru kāmela tō Ioane kāka'u, i tātua'ia tōna taukupu ki te kiri, ē 'e tāpaki ē te meri ngāngā'ere tāna kai.

7I tūtū 'aere atura aia, nā kō atura, “Tē 'aere mai nei tēta'i i muringa a'o i āku, 'e ma'ata atu tōna mana i tōku; kāre 'oki au e tau kia tūpou ki raro ē tatara i te 'ītiki tāmaka nōna ra.

8I bāpetīto ana 'oki au i a kōtou ki te vai; kāreka aia, e bāpetīto aia i a kōtou ki te Vaerua Tapu.”

Tō Iēsū bāpetīto'anga'ia ē te tīmata'anga'ia(Mātaio 3.13—4.11; Luka 3.21-22; 4.1-13)

9I reira tō Iēsū 'aere'anga mai mei Nāzarēta i Galilea maira, ē kua bāpetīto'ia i'ora e Ioane i Iōrīdāna.

10Ē tei te kake'anga mai aia mei raro mai i te vai, kite akera aia i te rangi i te vete'anga'ia ē te Vaerua Tapu i te 'eke'anga mai ki runga a'o i aia mei te kūkupa ra.

11Gen 22.2; Sal 2.7; Isa 42.1; Māt 3.17; 12.18; Mār 9.7; Luk 3.22Ē kua kitea maira 'oki tēta'i reo nō te rangi mai i te nā kō'anga mai, “Ko taku Tamaiti 'akaperepere koe, kua mareka rava au i a koe.”

12Arataki'ia atura aia e te Vaerua Tapu ki te mēdēbara.

13Ē i reira aia i taua mēdēbara ra i te tīmata'anga'ia mai e Sātani e 'ā akera nga'uru'anga o te rā. Ē i rotopū aia i te au puaka tā'ae; ē kua mātuāpuru maira 'oki te au 'āngela i aia.

Tō Iēsū kāpiki'anga i tāna au pipi mua(Mātaio 4.12-22; Luka 4.14-15; 5.1-11)

14Ē kia tiri atu'ia ra a Ioane ki roto i te 'are 'āuri, 'aere atura a Iēsū ki Galilea, i te tūtū 'aere'anga i te tuatua meitaki o te bāsileia o te Atua ra,

15Māt 3.2nā kō akera, “Kua tae ki te tuātau, kua vaitata mai nei te bāsileia o te Atua. E tatarā'ara kōtou ē ka 'irinaki i te 'ēvangelia nei.”

16Ē tē 'aere ra a Iēsū nā te pae roto i Galilea ra, kite atura aia i a Simona ē tōna teina ko Ānēderea i te tuku'anga i te kupenga ki taua roto ra. 'E puke ravakai 'oki rāua.

17Kua karanga atura a Iēsū ki a rāua, “Ka āru mai kōrua i āku, ē e 'akariro au i a kōrua 'ei ravakai tangata.”

18'Akaruke i'ora rāua i tā rāua puke kupenga i reira, ē kua āru maira i aia.

19Ē tē 'aere atura aia i tēta'i ngā'i iti i'o, kite atura aia i a Iākōbo a Zebedaio ra ē tōna teina ko Ioane, tei runga rāua i te poti, tē 'ono ra i te kupenga.

20Kua kāpiki atura aia i a rāua. Vai'o atura rāua i tō rāua metua ko Zebedaio ki runga i te poti ē ngā tāvini o'u'ia ra, āru atura i a Iēsū.

'E tangata ma te vaerua vi'ivi'i i roto i aia(Luka 4.31-37)

21'Aere atura a Iēsū mā ki Kāperenāuma. E tae akera ki te Sābati, 'aere atura aia ki roto i te sūnago, 'āpi'i atura i te tangata.

22Māt 7.28,29Vā 'ua i'ora rātou i te tū o tāna tuatua. I 'āpi'i 'oki aia ma te mana, kāre mei tā te au Pū'āpi'i Ture ra.

23Tei roto 'oki i tō rātou sūnago tēta'i tangata, 'e vaerua vi'ivi'i tōna; kua kāpiki 'ua maira nā kō maira,

24“Auē, e Iēsū o Nāzarēta ē! 'E a'a tā'au i a mātou nei? I 'aere mai āina koe e tāmate mai i a mātou? Kua kite au i a koe, ko koe te Mea Tapu a te Atua ra.”

25Kua kauvae atura a Iēsū ki aia, nā kō atura, “Ka mūtēkī, ka 'aere mai ki va'o, vai'o atu i aia.”

26Kua rave nui i'ora taua vaerua vi'ivi'i ra i aia, kāpiki 'ua maira ma te reo ma'ata, e oti akera, kua 'aere maira ki va'o.

27Ūmere anake i'ora te tangata kātoatoa, ē kua 'ēumiumi i'ora rātou rātou 'ua'orāi, nā kō akera, “'E a'a 'ua tēia? 'E a'a 'oki tēianei au tuatua 'ōu? Tē 'akaue nei aia i te au dēmoni vi'ivi'i nei ma te mana, ē tē 'akarongo nei rātou i aia!”

28E tutuki atura tōna rongo, e pini rava akera taua 'enua ra ko Galilea, kāre i roa'ia.

Tē 'akaora nei a Iēsū 'e ma'ata te tangata(Mātaio 8.14-17; Luka 4.38-41)

29E tae maira a Iēsū ē tāna au pipi ki va'o i taua sūnago ra, 'aere atura a Iākōbo rāua ko Ioane, ē ko rātou rava rāi 'oki ki roto i te 'are o Simona rāua ko Ānēderea.

30Tē 'aka'āvai 'ua ra te metua 'ōngai va'ine nō Simona ra, kua mate i te vera. Kua 'akakite maira rātou i aia ki a Iēsū i reira ra.

31'Aere atura a Iēsū ki aia, rave atura i tōna rima, 'akatū akera i aia ki runga. Peke atura te vera i reira, kua mātuāpuru maira aia i a rātou.

32E a'ia'i atura, kia topa te rā ra, kua 'apai maira rātou i te au tangata maki rava rāi ki aia, ē te aronga i uru'ia e te au dēmoni ra.

33Kua 'uipā katoa maira tō te 'ōire rava rāi ki te ngūtupa.

34Kua 'akaora i'ora aia i te tangata 'e mānganui tei mate i te au maki katoa, ē kua tuaru i te au dēmoni 'e mānganui ki va'o. Ē kāre 'e tika i aia kia tuatua mai taua au dēmoni ra, kua kite 'oki rātou i aia.

Tē ako 'aere nei a Iēsū(Luka 4.42-44)

35E pōpongi akera, tū akera a Iēsū ki runga i te 'ākirāta, 'aere atura ki tēta'i ngā'i motuta'a, ē kua pure i'ora aia i reira.

36Kua kimikimi atura a Simona mā i aia.

37E kite atura rātou i aia, kua nā kō atura, “Tē kimi nei te tangata rava rāi i a koe!”

38Kua tuatua maira aia ki a rātou, “Ka taki 'aere tātou ki te au 'ōire i vaitata nei kia 'āpi'i katoa atu au i te reira. Ko tōku ia tere i 'aere mai ei au nei.”

39 Māt 4.23; 9.35 Kua ako atura aia i roto i tō rātou au sūnago rava rāi i Galilea ra, ē kua tuaru 'oki i te au dēmoni ki va'o.

Tō Iēsū 'akaora'anga i tēta'i tangata lēpera(Mātaio 8.1-4; Luka 5.12-16)

40Kua 'aere maira tēta'i tangata lēpera ki a Iēsū, kua tuturi maira ki mua a'o i aia, nā kō maira, “Kia tika i a koe, e mā au i a koe.”

41Tangi akera a Iēsū i aia, 'akatoro atura i tōna rima, ē 'akatūkia atura i aia, nā kō atura, “Kua tika ia i āku; kia mā koe.”

42Ē tei te pērā'anga atu aia ra, peke atura te lēpera nōna i reira rāi, mā atura taua tangata ra.

43Kua ako 'ua atura a Iēsū i aia, tuku atura i aia kia 'aere,

44Lev 14.1-32nā kō atura ki aia, “'Aua koe e tuatua 'ua ake ki tēta'i tangata. E 'aere rā, e 'akaāri i a koe 'ua'orāi ki te ta'unga, ē tao'i atu 'ei 'akapāpū'anga atu ki a rātou nō tō'ou tāmā'anga mei tā Mōse i 'akaue maira.”

45'Aere atura rā aia, e 'akakite 'aere i taua tuatua ra, ē vāria i'ora. Kāre atura e rauka kia 'aere 'akakite 'ua a Iēsū ki taua 'ōire ra, no'o 'ua i'ora i te au ngā'i motuta'a ra. Ē kua 'aere maira 'oki te au tangata ki aia nō te au ngā'i rava rāi.