Ephesia 4 - Cook Island Maori Revised New Testament(CIMRNT)

Te 'okota'i'anga o te kōpapa

1Ē tēianei, ko au 'e mou'āuri 'oki nō tōku tāvini'anga i te 'Atu, tē ako atu nei au i a kōtou, kia tau tō kōtou ora'anga ki te kāpiki'anga i 'ōronga'ia mai ki a kōtou na.

2Kol 3.12,13Kia ngākau 'aka'aka roa kōtou ē te marū ma te 'akakoromaki. E 'āriki 'ua kōtou i te tū o tēta'i ē tēta'i ma te aro'a.

3E tautā kōtou kia tāmou rāi i tō te Vaerua 'okota'i'anga ki te ruru o te 'au.

4'Okota'i rāi kōpapa ē 'okota'i rāi Vaerua. E 'okota'i 'oki te mānakonako'anga o tō tātou kāpiki'anga'ia.

5'Okota'i 'Atu, 'okota'i 'akarongo, 'okota'i bāpetīto'anga.

6'Okota'i Atua, ko te Metua ia nō te tangata rava rāi, tei runga a'o i te kātoatoa, ē te 'anga'anga nei nā roto i te kātoatoa ē tei roto rāi i te kātoatoa.

7Kua 'ōronga'ia mai ki a tātou tātakita'i te meitaki tei tau ki te vāito o te 'apinga aro'a o te Mesia ra.

8Sal 68.18Nō reira kua tuatua'ia ē,

“I aia i kake ki runga ki te ngā'i teitei

'e aronga tuika'a 'e mānganui tāna i arataki,

ē kua 'ōronga 'ua i te au meitaki ki te tangata.”

9'E a'a te 'āite'anga o te “kake ki runga” māri rā, kua 'eke katoa mai aia ki raro ki te ngā'i 'aka'aka o te ao nei?

10Ko tei 'eke mai ki raro, ko ia rāi tei kake ki runga rava atu i te au rangi rava rāi, kia 'ope te au mea katoa i te 'akakī'ia e ia.

11Ko ia rāi tei 'akariro i tēta'i pae 'ei au 'āpōsetolo, tēta'i pae 'ei au peroveta, tēta'i pae 'ei au 'āpi'i 'ēvangelia, ē tēta'i pae 'ei au tiaki ē te pū'āpi'i,

12i te 'akate'ate'amamao i te aronga tapu nō te 'anga'anga tauturu 'ei 'akamātūtū'anga atu i te kōpapa o te Mesia ra.

13Ē ka rauka 'oki i a tātou rava rāi te 'okota'i'anga o te 'akarongo ē te kite mou tikāi i te Tamaiti a te Atua, ka riro tātou rava rāi 'ei tangata pakari, ē ka tae atu tātou ki te kī'anga tikāi o te Mesia ra.

14Kāre 'aka'ou tātou i reira mei te tamariki rikiriki tei tā'uri'uri'ia ē te 'akapeke 'aere'ia e te matangi o tērā 'āpi'i'anga ē tērā 'āpi'i'anga, ē tei 'akavare'ia e te aronga pikika'a nā roto i tō rātou tū kāraperape i te tā'ē'ē'anga.

15'E aronga rā tātou tei 'akakitekite i te tuatua mou ma te aro'a, ē ka tupu 'aere tātou nā roto i te au rāvenga rava rāi ki te 'okota'i'anga o te Mesia, ko te ūpoko 'oki ia.

16Kol 2.19I raro 'oki i aia i tā'okota'i ei ē i piri meitaki ei te kōpapa katoa nā roto i te au pa'unga rava rāi, tē 'anga'anga ra mei tei tau ki te mero tātakita'i. Ē tē mātūtū akera te kōpapa nā roto i te aro'a.

Tē tū o te ora'anga 'ōu

17Ē tēianei, i te ingoa o te 'Atu tē tuatua atu nei ē te mānono atu nei au i a kōtou ē, e 'akaoti ana kōtou i te 'ā'āere mei tā tēta'i pāpāki 'ētene 'ā'āere'anga i te pu'apingakore o tō rātou manako,

18nō te pōiri 'oki o tō rātou ūpoko. Tē takakē nei rātou mei kō mai i te ora'anga o te Atua ra nō tō rātou tū kitekore ē te mārōketaketa 'oki o tō rātou ngākau.

19Kāre 'aka'ou rātou i 'akamā i tēta'i 'ua atu mea, tē 'ōronga nei rā rātou i a rātou 'ua'orāi ki te peu kanga ra, ē tē rave 'ua nei i te au mea vi'ivi'i rava rāi ma te 'inangaro ma'ata.

20Kāre rā te reira tā kōtou i 'āpi'i'ia mai nō runga i te Mesia!

21Kua 'akarongo 'oki kōtou nō runga i aia ē kua 'āpi'i'ia 'oki ē, 'e a'a te tika'anga tikāi i roto i a Iēsū:

22Kol 3.9koia 'oki, kia 'akaruke kōtou i te tū muatangāna o tō kōtou ora'anga, ko te tangata ta'ito 'oki ia tei arataki kē'ia e te au noinoi pikika'a.

23Kia 'aka'ōu'ia rā tō kōtou manako ē tō kōtou ngākau,

24a: Kol 3.10; b: Gen 1.26ē kia riro kōtou 'ei tangata 'ōu mei tei tau i te tangata tei 'anga'ia e te Atua i te tuatua tika ē te tapu mou.

25 Zek 8.16 Nō reira, e 'akaruke i te pikika'a, ē e tuatua kōtou kātoatoa i te tuatua mou ki tō kōtou tangata tupu, nō te mea, 'e au mero rāi tātou tēta'i ki tēta'i.

26Sal 4.4Mē riri kōtou ra, auraka te reira e riro mai 'ei 'ara; auraka e 'opu te rā i tō kōtou riri'anga.

27Auraka e tuku ki te Tiāporo i tēta'i rāvenga kia ō mai.

28Ko te tangata i keiā na, auraka aia e keiā 'aka'ou, 'e ngari ake aia kia rave i te 'anga'anga, kia rauka i aia te mea meitaki ki ōna 'ua'orāi rima 'ei 'ōronga atu nā te tangata i ngere.

29Auraka e tuatua kino e mama mai nā roto mai i tō kōtou va'a, 'e tuatua meitaki rā e tupu ei te meitaki tikāi ra, ē e meitaki ei te aronga e 'akarongo i te reira.

30Auraka e 'akamamae atu i te Vaerua Tapu o te Atua. Kua 'akairo'ia 'oki kōtou ki tōna 'akairo nō te rā o te rāvenga ora.

31Kia 'akaātea'ia mei a kōtou na te tū ngākau kavakava rava rāi, te riri 'oto'oto, te mākitakita, te taumārō ē te tuatua 'akakino ma te au tū kino rava rāi.

32Kol 3.13Kia riro rā kōtou 'ei aronga tākinga meitaki ē te ngākau marū tēta'i ki tēta'i, ma te 'akakore atu 'oki i te tārevakē tēta'i ki tēta'i, mei te Atua 'oki i 'akakore mai i tā kōtou i roto i te Mesia ra.