1E muri akera, 'aere atura a Iēsū nā roto i te au 'ōire mama'ata ē te au 'ōire rikiriki katoa i te tūtū 'aere'anga i te tuatua meitaki o te bāsileia o te Atua. Kua āru atura te tino nga'uru mā rua i aia,
2Māt 27.55,56; Mār 15.40,41; Luk 23.49ē ēta'i va'ine katoa 'oki i 'akaora'ia mei te au vaerua kino ē te au maki ra: ko Māria i tapa'ia ē ko Māgadala, i 'aere mai ngā dēmoni toko'itu mei roto mai i aia ra;
3ē ko Ioana, te va'ine a Kuza, te 'aka'aere i roto i te kāinga o Heroda; ē ko Sūsana, ma ēta'i va'ine kē atu 'e mānganui, ko rātou tei mātuāpuru mai ia i aia ki tō rātou 'ua'orāi 'apinga.
Te parabole o te rūrū 'ua(Mātaio 13.1-9; Māreko 4.1-9)4Ē kia putuputu mai tēta'i urupū ma'ata, ma te au tangata katoa nō roto i te au 'ōire i te 'aere'anga mai ki a Iēsū, kua tuatua parabole atura aia:
5“'Aere atura te rūrū 'ua e rūrū i tāna 'ua. Ē tei te rūrū'anga ra, topa i'ora tēta'i pae i te pae arāta'a, ē takataka'i'ia i'ora, ē kainga'ia i'ora e te manu o te reva.
6Topa i'ora tēta'i pae ki runga i te ngā'i paikea. Ē tei te tupu'anga ra, mae atura, nō te mea, kāre i rava te mā'ū'ū.
7Topa i'ora tēta'i pae ki roto i te ngāngā'ere, tupu katoa atura te ngāngā'ere, pōkia atura.
8Topa i'ora 'oki tēta'i pae ki te ngā'i one meitaki, tupu akera, ē 'u'ua atura, takita'i 'ānere i te 'ua 'okota'i.” E oti akera taua au mea nei i te tuatua'ia e Iēsū ra, kua kāpiki atura, “'E taringa tōna 'ei 'akarongo'anga, e 'akarongo aia.”
Te 'akakoro'anga o te au parabole(Mātaio 13.10-17; Māreko 4.10-12)9Kua ui maira tāna au pipi ki a Iēsū, nā kō maira, “'E a'a tikāi te 'akakoro'anga o tēnā na parabole?”
10Isa 6.9Kua pa'u atura a Iēsū, “Kua 'ōronga'ia mai te kite ki a kōtou i te tuatua ngaro o te bāsileia o te Atua; kāreka ki tēta'i pāpāki tē tuatua parabole nei au kia kore rātou e kite i tā rātou e 'ākara ra, ē kia kore rātou e mārama i tā rātou e 'akarongo ra.”
Tē 'akamārama nei a Iēsū i te 'āite'anga o te parabole(Mātaio 13.18-23; Māreko 4.13-20)11“Tēia te 'āite'anga o taua parabole nei: Ko tēia 'ua nei, ko te tuatua ia a te Atua.
12Tō te pae arāta'a ra, ko te aronga ia e 'akarongo 'ua; ē kua 'aere maira te Tiāporo e rave kē atura i te tuatua mei roto mai i tō rātou ngākau ra, kia kore rātou e 'akaora'ia mei 'irinaki rātou i te tuatua.
13Tō te ngā'i paikea ra, ko tei 'āriki'ia i te tuatua ma te rekareka mē 'akarongo ra; 'e tuātau poto 'ua rā tō rātou 'irinaki'anga, nō te mea, kāre i aka'ia, ē kia roko'ia e te tīmata'anga ra, takakē atura.
14Tō tei topa ki roto i te rākau taratara, ko te aronga ia kia oti i te 'akarongo ka 'aere atu ei, kua pōkia atura rātou e te manamanatā, te 'apinga nui ē te au mea navenave o te ora'anga, ē kāre rātou e 'u'ua mai.
15Kāreka tō te ngā'i one meitaki, ko te aronga ia i 'akarongo i te tuatua ma te tāpū piri tikāi ki roto i te ngākau meitaki ē te tau, ē 'e tika ia i te 'u'ua'anga nā roto i te tatari mārie'anga.”
Te mōrī i tāpoki'ia(Māreko 4.21-25)16 Māt 5.15; Luk 11.33 “Kāre rava 'e tangata e tutungi i te lāmepa, ka tāpoki ei ki tēta'i kapu, mē kāre ka tuku ei ki raro ake i te ro'i, ka tuku'ia rā ki runga i te vairanga kia kitea te mārama e te aronga e tomo mai ki roto.
17 Māt 10.26; Luk 12.2 “Ē kāre rava 'e mea ngaro e kore e 'akakite'ia mai. Kāre katoa 'oki 'e mea muna e kore e kitea'ia, ē e vāvāria katoa 'oki.
18 Māt 25.29; Luk 19.26 “Ē tēnā na, e matakite i tō kōtou 'akarongo'anga mai: ko tei pu'apinga'ia ra, 'e ma'ata te ka 'ōronga'ia atu ki aia; ē kāre āna rā, e rave kē'ia ia tāna ē te mānga 'ua tāna i manako ē nāna te reira.”
Tō Iēsū metua va'ine ē tōna 'ai taeake(Mātaio 12.46-50; Māreko 3.31-35)19Kua 'aere maira tō Iēsū metua va'ine ē tōna 'ai taeake ki aia, ē kāre tākiri rātou i vaitata mai ki aia nō te urupū tangata 'oki.
20Kua 'akakite'ia maira ki a Iēsū, nā kō'ia mai, “Tē tū 'ua maira tō metua va'ine ē tō 'ai taeake i va'o, ē tē 'inangaro maira kia kite i a koe.”
21Kua pa'u maira a Iēsū ki a rātou, “Tērā tōku metua va'ine ē tōku 'ai taeake, ko tei 'akarongo mai ē tei 'ākono i te tuatua a te Atua.”
Tō Iēsū 'akamarino'anga i te 'uri'ia(Mātaio 8.23-27; Māreko 4.35-41)22E tae akera ki tēta'i rā, 'aere atura a Iēsū ma tāna au pipi ki runga i tēta'i poti, ē kua karanga atura aia ki a rātou, “E 'akatere atu tātou ki tērā pae roto.” Tuku atura rātou.
23Tē tere atura rātou, kua varea'ia atura aia e te moe. Kua tupu maira tēta'i matangi 'uri'ia i taua roto ra. Kua kī rava te poti i te tai, ē kua roko'ia rātou e tēta'i tūmatetenga ma'ata.
24Kua 'aere atura te au pipi ki aia e 'akaara i aia, nā kō atura, “E te 'Atu! E te 'Atu! Ka maremo mātou!”
Tū akera a Iēsū ki runga, kauvae atura i te matangi ē te tikitiki'anga o te kāre. 'Akatupu akera, marino atura.
25Kua 'akamura atura aia i tāna au pipi, “Tei 'ea ra tō kōtou 'akarongo?”
Mataku akera rātou, ūmere atura, nā kō i'ora rātou rātou 'ua'orāi, “Ko 'ai tēia? Tē 'akaue a 'oki aia i te matangi ē te kāre, ē kua kauraro mai i aia.”
Te 'akaora'anga a Iēsū i te tangata tei uru'ia e te au dēmoni(Mātaio 8.28-34; Māreko 5.1-20)26E 'akatere atura a Iēsū ē tāna au pipi ki te 'enua o tō Gerāsini, i anga tika ki Galilea.
27E tae atura aia ki uta, kua 'ārāvei maira i aia tēta'i tangata nō taua 'ōire ra, i uru'ia ana aia e ēta'i dēmoni. Kua roa te tuātau kāre aia e kāka'u ana i te kāka'u; kāre e no'o ki roto i te 'are, i roto rā i te au tanumanga ra.
28E kite akera aia i a Iēsū, kua kāpiki 'ua maira, 'akatopa i'ora i aia ki raro ki mua i aia, ē kua nā kō maira ma te reo ma'ata, “'E a'a tā'au i āku nei, e Iēsū, e te Tamaiti a te Atua Teitei Rava? Tē pati atu nei au ki a koe ē, auraka koe e tāmamae mai i āku.”
29Kua 'akaue ana 'oki a Iēsū i te vaerua vi'ivi'i kia 'aere mai ki va'o mei roto mai i taua tangata ra. 'E mānganui tō te dēmoni 'opu'anga i aia. Ē kia tāpeka'ia aia ki te 'āuri ē te piri'anganaoa ma te tiaki'ia, 'ati'ati tākiri rava akera i aia te ruru'anga 'āuri, ē tuaru'ia atura aia e te dēmoni ki te au ngā'i mēdēbara ra.
30Kua ui atura a Iēsū ki aia, nā kō atura, “Ko 'ai tō'ou ingoa?”
Kua nā kō maira aia, “Ko Manotini,” nō te mea 'e mānganui 'oki te au dēmoni i ō ki roto i aia.
31Ē kua kaku maira rātou ki aia, auraka aia e 'akaue i a rātou e 'aere ki te pō.
32'E 'ānana puaka ma'ata tei reira i te kai'anga i te kai i runga i te maunga. Kua kaku maira rātou ki aia, e tuku aia i a rātou kia tomo 'ua ana ki roto i te au puaka. Ē kua tuku 'ua atura aia i a rātou.
33'Aere atura te au dēmoni ra ki va'o i taua tangata ra, tomo atura ki roto i te au puaka. E 'oro viviki 'ua atura taua 'ānana ra ki raro nā te ngā'i pā'eke'eke ra ē ki roto rava i te roto ra, maremo atura.
34E kite akera te aronga 'āngai puaka i taua mea ra, 'ati i'ora, ē 'akakitekite 'aere atura ki roto i te 'ōire ē te au kāinga katoa ra.
35Kua 'aere atura te au tangata ki va'o i te 'ōire e 'ākara i tei tupu ē kua tae maira ki a Iēsū ra, kitea atura i te tangata nā roto i aia te au dēmoni ra i te no'o'anga i te pae vaevae o Iēsū, kua kāka'u'ia ki te kāka'u, ē kua mārama 'aka'ou tōna manako.
36Ē te aronga i kite ra, kua 'akakite atura ki a rātou i te tū o te 'akaora'anga o taua tangata dēmoni ra.
37Kua pati maira te tangata tini rava rāi o taua pae 'enua i Gerāsini ra ki a Iēsū e 'aere kē atu mei a rātou mai. Kua roko'ia 'oki rātou e te mataku ma'ata. 'Aere atura aia ki runga i te poti, 'oki atura.
38Kua pati 'ua maira taua tangata ra nā roto i aia te au dēmoni ra ē, kia āru aia i a Iēsū.
Kua tono atura rā a Iēsū i aia, nā kō atura,
39“Ka 'oki ki tō'ou ngutu'are, e 'akakite atu i te ma'ata o tā te Atua rāvenga ki a koe na.”
'Aere atura aia, 'akakite atura e pini 'ua ake taua 'ōire ra i te ma'ata o tā Iēsū rāvenga ki aia.
Te tamā'ine a Iāiro ē te va'ine tei 'āmiri atu i te kāka'u o Iēsū(Mātaio 9.18-26; Māreko 5.21-43)40I te 'oki'anga mai a Iēsū ra, kua 'āriki mai te tangata tini rava rāi i aia, nō te mea, tē tāpapa anake ra rātou i aia.
41Ē inā, kua 'aere maira tēta'i tangata, ko Iāiro te ingoa, 'e tūtara nō te sūnago, ē kua 'akatopa maira aia ki raro i te pae vaevae o Iēsū, ē kaku maira, e 'aere ki tōna 'are.
42'E tamā'ine 'ānau ta'i 'oki tāna, 'okota'i nga'uru mā rua ōna mata'iti, kua vaitata rava i te mate.
Kia 'aere ra a Iēsū, kua 'ōtotitoti maira te tangata i aia.
43Tei reira tēta'i va'ine, rau nga'uru mā rua ōna mata'iti i te riu 'ua'anga. Kua pou rava tōna 'apinga i te aronga rapakau maki, ē kāre rava aia i ora i a rātou.
44Kua 'aere maira aia nā muri i a Iēsū ē kua 'āmiri maira i tōna tapa kāka'u, ē mao i'ora tōna riu i reira rāi.
45Kua tuatua akera a Iēsū, “Ko 'ai ra tei 'akatūkia mai i āku nei?” E 'u'una anake i'ora rātou. Kua karanga atura a Pētero, “E te 'Atu, tē kōnoninoni'ia mai nei koe e tēianei urupū'anga tangata.”
46Kua tuatua maira a Iēsū, “Kua 'akatūkia mai tēta'i i āku. Kua nakiro 'oki au ē, 'e mana tei riro atuna nō konei atu i āku nei.”
47E kite atura taua va'ine ra ē kāre aia i ngaro, kua 'aere maira aia ma te rūtetetete, 'akatopa 'ua maira aia ki raro ki mua i a Iēsū, 'akakite 'ua maira i mua i te aroaro o te tangata rava rāi ē, 'e a'a te tumu i 'akatūkia mai ei aia i a Iēsū, ē katoa kua ora rava aia i reira.
48Ē kua karanga atura a Iēsū ki aia, “E mā'ine, kua ora koe i tō'ou 'irinaki'anga i āku, e 'aere ma te 'au.”
49Ē tē tuatua ra a Iēsū, kua 'aere maira tēta'i tangata mei kō mai i te ngutu'are o Iāiro, te tūtara ma'ata o te sūnago ra, kua 'akakite maira, “Kua mate rava tō tamā'ine. Auraka e tāmanamanatā 'aka'ou i te Pū'āpi'i.”
50Kua 'akarongo rā a Iēsū i te reira, ē kua karanga atura aia ki a Iāiro, nā kō atura, “Auraka e ngarangara, e 'irinaki 'ua, ē ka ora'ia tā'au tamā'ine.”
51E tae atura aia ki te ngutu'are o Iāiro, kāre rava aia i 'akatika i tēta'i tangata kia tomo ki roto, māri rā ko Pētero, ko Ioane ē ko Iākōbo, ē te metua tane ma te metua va'ine o taua tamā'ine ra.
52Tē auē ra ē tē tangi ra te tangata rava rāi i aia. Ē inā, kua karanga atura a Iēsū, “Auraka e auē, kāre aia i mate, kua moe rā.”
53Kua tā'ito'ito maira rātou i aia, kua kite 'oki rātou ē, kua mate rava taua tamā'ine ra.
54Ko Iēsū rā, kua rave atura aia i tōna rima, kua kāpiki atura, nā kō atura, “E tamā'ine, e tū ki runga!”
55Kua 'oki maira tōna vaerua, kua tū maira aia ki runga i reira rāi. Kua 'akaue atura a Iēsū kia 'ōronga'ia tēta'i kai nā taua tamā'ine ra.
56Vā 'ua atura tōna ngā metua. Kua 'akaue atu rā a Iēsū i a rāua ē, auraka rava e 'akakite ki tēta'i 'ua atu i tei tupu ra.
Who We AreWhat We EelieveWhat We Do
2025 by iamachristian.org,Inc All rights reserved.
