Ebera 6 - Cook Island Maori Revised New Testament(CIMRNT)

1Nō reira, e vai'o atu ana tātou i te 'āpi'i'anga mōmua nō runga i te Mesia; e 'aere rā tātou ki mua, ki te pakari meitaki tikāi ra. 'Eia'a e 'akatinamou 'ua i taua 'āpi'i'anga mōmua ra: koia 'oki, te 'irinaki'anga i te Atua ē te 'āriu kē'anga mei te au 'anga'anga pu'apingakore,

2te 'āpi'i'anga nō runga i te au bāpetīto'anga ē te tuku'angā rima, te tū'aka'ou'anga o tei mate ē te 'akavā'anga mutukore ra.

3E 'aere rā tātou ki mua. Ka 'akapērā rāi tātou mē ka tika i te Atua.

4-6Kāre rava e rauka kia tatarā'ara 'aka'ou te aronga tei 'akamārama'ia ra, tei tongi ana i te 'apinga aro'a o te rangi ē tei 'āriki mai ana i te Vaerua Tapu, ko te aronga 'oki tei tongi ana i te karere meitaki a te Atua ē te mana o te tuātau ā muri atu, ē tei 'akaruke rāi i te 'irinaki'anga; nō te mea, tē 'akasātauro 'aka'ou nei rātou i te Tamaiti a te Atua ē tē 'akava'ava'a nei rātou i aia i mua i te kātoatoa.

7Kua 'akameitaki'ia e te Atua te 'enua tei ngote i te ua e topa putuputu ki runga a'o ra ē tei 'akatupu mai i te au kai meitaki nā te aronga i tanu ra.

8Gen 3.17,18Mē 'akatupu mai rā te reira 'enua i te au rākau taratara ē te matie, kāre tākiri ōna pu'apinga, ē kāre e roa ka tauma'a'ia ia. Ē i te 'openga i'ora ka ta'una'ia ki te a'i.

9E te au taeake ē, noa atu ē kua pērā tā mātou tuatua'anga ki a kōtou, 'e mea pāpū rā i a mātou ē, tei a kōtou rāi te au mea mēmeitaki o te rāvenga ora.

10'E tuatua tika tā te Atua! Kāre tākiri tā kōtou 'anga'anga e ngaropōina i aia. Kua mātuāpuru 'oki kōtou ē tē mātuāpuru nei rāi i te aronga tapu. Nā roto i te reira, tē 'akaāri'ia mai nei tō kōtou na aro'a. Nō tōna ingoa i pērā ai kōtou.

11Ē tē 'inangaro nei mātou kia 'akaāri tātakita'i mai kōtou i taua māro'iro'i ra, ē i te 'openga i'ora ka tupu tikāi tā kōtou i mānakonako ra.

12Kāre mātou e 'inangaro i a kōtou kia riro ei kōpē, kia āru rā kōtou i te aronga tei 'irinaki ē tei 'akakoromaki, ē kia rauka mai 'oki tā te Atua i papa'u.

Tā te Atua papa'u'anga pāpū tikāi

13I tā te Atua papa'u'anga ki a Āberahāma, kua taputo'u aia ki aia 'ua'orāi, i te mea ē kāre 'e mana ma'ata atu i aia.

14Gen 22.16,17Kua nā kō aia ē, “Tē 'akapāpū nei au ē, ka 'akameitaki roa au i a koe ē ka 'akama'ata rava au i tō'ou 'uānga.”

15'E roa akera tō Āberahāma 'akakoromaki mārie'anga, rauka i'ora i aia tei papa'u'ia maira.

16Mē taputo'u 'oki te tangata nei, ka tā'iku rātou i te ingoa o tēta'i tei ma'ata atu i a rātou 'ua'orāi. Ē nā taua taputo'u ra e 'akamutu i te au tau'ētono'anga katoa ra.

17Kua anoano ma'ata rava 'oki te Atua i te 'akaāri mai ki te aronga te ka rauka mai i a rātou tei papa'u'ia ra ē, kāre rava e 'akatūkē'ia tōna 'akakoro'anga. Nō reira, kua 'akapāpū aia i te reira ki te taputo'u.

18Ko ngā mea e rua i reira, kāre e rauka kia 'akatūkē'ia taua papa'u'anga ra, ē kāre katoa e tika i te Atua kia pikika'a. E 'akapērā 'oki tātou nei tei 'oro atu ki aia ra, kia 'akamāro'iro'i ma'ata'ia ē kia mou meitaki tātou i te mānakonako'anga tei 'ōronga'ia mai.

19Lev 16.2Tō tātou nei mānakonako'anga 'oki 'e mea ma'utikore ē te mou meitaki mei tēta'i tūtau o te ora'anga, ē tē 'aere nei rāi taua mānakonako'anga ki roto i te ngā'i tapu rava i muri i te ārai ra,

20Sal 110.4te ngā'i 'oki tā Iēsū i tomo 'ei mōmua nō tātou. Kua riro 'oki aia 'ei Ta'unga Ma'ata mei a Melekizedeka te tū e tuātau 'ua atu.