1Mē tuatua 'ua rāi au i roto i te au reo o te tangata ē o te au 'āngela katoa ra, ē mē kāre ōku aro'a, kua riro'ia au mei te veo tangitangi ra, ē mei te tini tangi turituri ra.
2Māt 17.20; 21.21; Mār 11.23Ē mē tei āku 'ua rāi te toto'u, ē mē kite 'ua rāi au i te au mea muna ngaro kātoatoa ra ē te au tū kite kātoatoa ra, ē mē tei āku te 'irinaki'anga ma'ata kia rauka i āku i te 'akaātea i te au maunga, ē mē kāre ōku aro'a, 'e mea pu'apingakore 'ua rāi au i reira.
3Ē mē 'ōronga atu au i tāku 'apinga rava rāi nā te aronga puta'ua ma tōku kōpapa katoa kia ta'unaia ki te a'i, ē kāre ōku aro'a i ēta'i kē, kāre 'ua atu rāi ōku 'e pu'apinga i reira.
4'E 'akakoromaki'anga roa tō te aro'a ē te tākinga meitaki. Kāre te aro'a e vare'ae, kāre te aro'a e 'akateitei i aia 'ua'orāi, kāre e 'akaparau.
5Kāre katoa te aro'a e rave i te au mea 'akamā'ia, kāre e kimi i te meitaki nōna 'ua'orāi, kāre e riri vave, kāre e tāmou 'ua i te kino i rave'ia ki aia.
6Kāre katoa te aro'a e rekareka i te 'anga'anga tikakore, e rekareka rā i te tuatua mou.
7E pāruru katoa te aro'a i te au mea kātoatoa, e 'irinaki i te au mea kātoatoa, e mānakonako i te au mea kātoatoa, e mou mārie i te au mea kātoatoa.
8Kāre 'ua te aro'a e kore. Mē tē vai ra te au toto'u, ka ngaro rātou; mē tē vai ra te tuatua i roto i te au reo kekē, ka mutu te reira; mē tē vai ra te kite, ka kore ia.
9Nō te mea, tē kite pāpāki ta'i 'ua nei tātou, ē tē toto'u pāpāki ta'i 'ua nei tātou.
10Kia tae mai rā te au mea tika tikāi ra, e pu'apingakore 'ua ai te au mea pāpāki ta'i ra.
11I tōku tamariki'anga ra, mei tā te tamariki rāi taku tuatua, mei tō te tamariki rāi tōku kite, mei tō te tamariki rāi tōku manako; i tōku riro'anga rā 'ei tangata pakari, kua tuku kē atura au i te peu a te tamariki ra.
12I tēianei 'oki tē kite makiri 'ua nei tātou, mei te mea ra ē, i nā roto i te i'o; mē tae rā ki te reira rā, ka 'ākara tātou mata ki te mata. I tēianei, tē kite pāpāki ta'i 'ua nei au, ē i reira au e kite pū tikāi ei, mei āku 'oki e kite pū tika'ia nei.
13I tēianei, tē vai nei ngā mea e toru: te 'akarongo, te mānakonako'anga ē te aro'a; ko tei ma'ata rava atu rā, ko te aro'a ia.
Who We AreWhat We EelieveWhat We Do
2025 by iamachristian.org,Inc All rights reserved.
