Māreko 6 - Cook Island Maori Revised New Testament(CIMRNT)

Tē kōpae'ia nei a Iēsū i Nāzarēta(Mātaio 13.53-58; Luka 4.16-30)

1Kua 'akaruke i'ora a Iēsū i taua ngā'i, 'aere atura ki tōna 'ua'orāi 'enua; kua āru katoa tāna au pipi i aia.

2E tae akera ki te rā Sābati, 'akamata atura i te 'āpi'i i roto i te sūnago ra. Kua nā kō akera te aronga 'e mānganui i 'akarongo i aia ma te vā 'ua, “Nō 'ea mai te au rāvenga a tēianei tangata? 'E a'a tēia pakari i 'ōronga'ia mai ei ki aia nei, i tikāi i aia tēia au 'akairo i rave'ia e ia nei?

3Kāre āinei tēia te kāmuta, te tamaiti a Māria, te taeake nō Iākōbo, ē nō Iōse, ē nō Iūda, ē nō Simona? Ē tōna 'ai tua'ine, kāre āina ko tei no'o ki ō tātou nei?” Kua maitu i'ora rātou i aia.

4 Ioa 4.44 Kua nā kō atura a Iēsū ki a rātou, “'E ngāteitei tō te peroveta i te au ngā'i rava rāi, māri rā i tōna 'ua'orāi 'enua, ē i tōna 'ua'orāi kōpū tangata, ē i tōna 'ua'orāi puna.”

5Kāre atura i rauka i aia kia rave i te au 'akairo i reira, māri rā ko ēta'i 'ua tangata maki i 'akaora'ia e ia i te tuku'anga i tōna rima ki runga a'o i a rātou ra.

6Kua vā 'ua atura aia i tō rātou 'akarongokore.

Tono i'ora a Iēsū i te au pipi tino nga'uru mā rua ra(Mātaio 10.5-15; Luka 9.1-6)

'Aere atura a Iēsū nā roto i te au 'ōire rikiriki i reira a'o i te 'āpi'i 'aere'anga.

7Kua karanga atura aia ki te tino nga'uru mā rua e 'aere mai ki aia ra, tātaki tokorua atura i te tono'anga atu i a rātou. Tuku atura i te mana ki a rātou nō runga i te au vaerua vi'ivi'i ra,

8ē kua ako atura 'oki aia i a rātou, auraka 'ei 'apinga e 'apai'ia atu i tō rātou tere; auraka 'ei mānga, auraka 'ei pūtē, auraka 'ei moni i te tātua ra, ko te tokotoko anake rā.

9'Ei tāmaka tākai'ia, 'eia'a rā kia takirua pereue kia kāka'u.

10Kua karanga katoa atura aia ki a rātou, “Te ngā'i e tomo atu ei kōtou ki roto i te 'are ra, 'ei reira e no'o ei ē ka 'aere atu ei kōtou.

11Anga 13.51

Luk 10.4-11Ē te ngā'i kāre te tangata e 'āriki mai i a kōtou, ē kāre e 'akarongo mai i a kōtou, kia 'aere atu kōtou ra, ka rūrū atu i te one o tō kōtou vaevae 'ei 'akamatakite'anga atu i a rātou. Koia tika tāku e karanga atu ki a kōtou, kia tae ki te rā 'akavā'anga ra, 'e ngari ake tō Sodoma ē tō Gōmora i te reira 'ōire.”

12'Aere atura rātou ē ako atura i te tangata kia tatarā'ara.

13Iako 5.14Kua tuaru atura 'oki rātou i te au dēmoni 'e mānganui ki va'o, ē kua 'akaora atura i te au maki 'e mānganui ma te tā'inu i a rātou ki te manongi.

Te mate'anga o Ioane Bāpetīto(Mātaio 14.1-12; Luka 9.7-9)

14 Māt 16.14; Mār 8.28; Luk 9.19 Kua rongorongo atura te ariki ko Heroda i a Iēsū, kua vāria 'oki tōna ingoa. Kua nā kō akera ēta'i tangata, “Kua tū 'aka'ou a Ioane Bāpetīto mei te mate mai, ē nō reira i tikāi tēianei au 'akairo tāna i rave nei.”

15Nā kō akera tēta'i pae, “Ko Ēlia ia.”

Nā kō akera ēta'i, “'E peroveta ia, mei tēta'i o te au peroveta ta'ito ra.”

16Kite akera a Heroda, kua nā kō akera aia, “Ko Ioane tēia tāku i tīpū i te ūpoko ra. Kua tū 'aka'ou mai nei mei te mate mai.”

17Luk 3.19,20Nā Heroda i 'akaue atu kia 'opukia a Ioane ē titiri'ia ki roto i te 'are 'āuri, nō Hērōdia 'oki, te va'ine a tōna taeake ko Philipa, tei 'akaipoipo'ia e ia.

18I tuatua ana a Ioane ki a Heroda, “Kāre ia e tau i te ture kia 'akaipoipo koe i te va'ine a tō taeake.”

19Riri i'ora a Hērōdia i aia, i 'inangaro 'oki i te tā tākiri i aia. Kāre akera i rauka,

20nō te mea, kua mataku a Heroda i a Ioane. Kua kite 'oki aia ē, 'e tangata tuatua tika a Ioane ē te tapu, ē kua pāruru 'oki i aia. Kua 'akarongo mai i aia ma te rekareka, noa atu ē kua kinokino tōna ngākau i te 'akarongo mai.

21E tae akera ki te rā e rauka ai i a Hērōdia tāna rāvenga ra. I te rā i 'ānau ei a Heroda, 'e kaingākai ma'ata tāna i 'akatupu nā te au mata'iapo nunui ki ōna ra, ē te 'ui rangatira va'e'au ra ē te aronga tao'i'au katoa i Galilea ra.

22Kua 'aere maira te tamā'ine a Hērōdia ki roto, kua 'ura maira ki mua a'o i a rātou, mareka rava akera a Heroda ē te au manu'iri katoa nāna ra. Kua karanga atura te ariki ki taua tamā'ine ra, “Ka pati 'ua mai i tā'au mea i 'inangaro ra, e 'ōronga'ia atu ia e au.”

23Ē kua taputo'u atura aia, “Ko tā'au e 'inangaro i āku nei, ka 'ōronga'ia atu e au, e tae 'ua atu ki te 'āpa i tōku nei bāsileia.”

24'Aere atura taua tamā'ine ra e ui atura ki tōna metua va'ine, “'E a'a tāku e pati atu?”

Kua pa'u maira aia, “Te ūpoko o Ioane Bāpetīto ra.”

25Kua 'oki vave 'ua maira aia ki te ariki ra, kua pati maira, nā kō maira, “Tēia tōku 'inangaro, ka 'ō mai i te ūpoko o Ioane Bāpetīto i runga i tēta'i 'āriki ma'ata i tēianei rāi.”

26Ma'ata rava atura te auē o te ariki; nō te taputo'u rā nāna ra ē te au manu'iri 'oki nāna, kāre atura i 'akakore atu.

27Kua 'akaue atura aia i tēta'i va'e'au i reira e tiki i te ūpoko. 'Aere atura taua va'e'au ra, tīpū atura i tō Ioane ūpoko i roto i te 'are 'āuri ra,

28ē kua 'apai maira 'oki i te reira i runga i tēta'i 'āriki ma'ata, ē kua tuku mai ki taua tamā'ine ra. Ē nā te tamā'ine i 'apai atura ki tōna metua va'ine.

29E kite akera tā Ioane au pipi, kua tiki maira rātou i te kōpapa, 'apai atura ki roto i tēta'i tanumanga.

'Āngai i'ora a Iēsū i te rima tauatini tangata(Mātaio 14.13-21; Luka 9.10-17; Ioane 6.1-14)

30E 'uipā maira te au 'āpōsetolo ki a Iēsū ra, kua 'akakitekite maira ki aia i tā rātou i rave ē tā rātou i 'āpi'i atu.

31Kua karanga atura aia ki a rātou, “Ka taki 'aere tātou, ko tātou anake 'ua'orāi, ki tēta'i ngā'i motuta'a, e no'ono'o iti 'ua ana.” Kāre 'oki ō rātou mānga tuātau kia kai i te kai nō te ma'ata o te tangata, ana atura, ana maira.

32'Aere pōiri atura rātou nā runga i te poti ki tēta'i ngā'i motuta'a.

33Kua kite rā te tangata i a rātou i te 'aere'anga. 'E mānganui 'oki tei kite ē, ko 'ai rātou, ē kua 'oro atura nā uta mei roto atu i te au 'ōire katoa ra. Kua tae 'oki rātou i mua ake i aia.

34Num 27.17; 1 Arik 22.17; 2 Par 18.16; Ezek 34.5; Māt 9.36Ē tei te tāpae'anga atu a Iēsū, 'ākara atura aia i te pouou tangata ma'ata, tangi atura i a rātou, nō te mea, mei te māmoe tiakikore rātou. Ē kua 'āpi'i atura aia i a rātou i te au tuatua 'e mānganui.

35E parepare akera te rā, kua 'aere maira te au pipi ki aia ra, nā kō maira, “'E ngā'i motuta'a tēia ē kua parepare 'oki te rā.

36Ka tuku atu i a rātou nei kia 'aere ana rātou ki te au ngā'i 'are ra ē te au 'ōire rikiriki vaitata nei, e 'oko i te kai nā rātou.”

37Kua pa'u atura aia ki a rātou, nā kō atura, “Nā kōtou e 'ōronga atu i te kai nā rātou.”

Kua nā kō maira rātou ki aia, “E 'apai ana mātou e rua 'ānere moni 'ārio, ka 'oko atu ei i te mānga e 'āngai atu i a rātou?”

38Kua nā kō atura aia ki a rātou, “E 'ia ake ā kōtou mānga? Ka 'aere ka 'ātoro.”

E kite akera rātou, kua nā kō maira, “E rima, ē ngā ika 'oki e rua.”

39Kua karanga atura a Iēsū ki a rātou, “E 'akano'o pupu 'aere i a rātou rava rāi ki runga i te mātā.”

40Kua no'o atura rātou ki raro, takita'i 'ānere i ēta'i pupu, takirima nga'uru 'oki i ēta'i.

41Kua rave i'ora a Iēsū i ngā taupūpū varāoa e rima, ē ngā ika e rua, nānā akera ki runga i te rangi, 'akameitaki atura, vāvā'i i'ora i ngā taupūpū varāoa, 'ōronga atura nā te au pipi e tuku atu ki mua i te aroaro o taua aronga ma'ata ra. Ē ngā ika 'oki e rua kua tu'a katoa atura aia nā rātou rava rāi.

42Kai anake i'ora rātou ē pangia rava akera.

43Kua 'akaputuputu i'ora rātou i te toetoengā kai ra ma te au ika, ē kī akera ngā tāpora ē rau nga'uru mā rua.

44Ē te aronga i kai i taua kai ra, e rima pa'a tauatini tāne.

'Aere atura a Iēsū nā runga i te vai(Mātaio 14.22-33; Ioane 6.15-21)

45Kua 'akaue atura a Iēsū i tāna au pipi i reira rāi, e 'aere ki runga i te poti, ē e 'akatere nā mua i aia ki tēta'i pae i Betesaida, ka tuku atu ei aia i te tangata tini.

46Ē kia tuku'ia rātou e ia, 'aere atura aia ki runga i tēta'i maunga e pure.

47E pō akera, tei rotopū atura te poti i taua roto ra, ko ia anake 'ua tei uta.

48'Ākara atura aia i a rātou, kua ro'iro'i rava i te 'oe 'ua'anga; tē nā mua maira 'oki te matangi. I rotopū i te ora toru ē te ora ono i te pō ra, 'aere atura aia ki a rātou, nā runga i te kāre i te 'aere'anga. Kua 'aka'aere kē atura nā te pae i'o i a rātou ra.

49Kia 'ākara maira rātou i aia i te 'aere 'ua'anga nā runga i te kāre, manako akera 'e turuma, kua auē i'ora rātou,

50nō te mea, kua kite rātou pou roa i aia ē kua ngarangara rava akera.

Kua tuatua maira a Iēsū ki a rātou i reira, nā kō maira, “Ka 'akamāro'iro'i, ko au tēia. Auraka e mataku!”

51Kake maira aia ki runga i te poti ki a rātou ra, ākī tākiri akera te matangi. Vā ma'ata rava atura rātou,

52nō te mea, kāre rātou i mārama ake nō runga i te mānga, kua piri rā tō rātou ngākau.

Kua 'akaora a Iēsū i te aronga maki i Genesāreta(Mātaio 14.34-36)

53E tae atura a Iēsū ē tāna au pipi ki tēta'i pae, tāpae atura ki te 'enua ra ki Genesāreta, 'aere atura ki uta.

54Ē kia 'akaruke rātou i te poti, kua kite maira te au tangata i aia.

55'Oro 'aere 'ua atura, e pini rava akera taua 'enua ra; ē kua 'apai mai i te aronga maki ma te ro'i katoa ki tēta'i 'ua atu ngā'i tā rātou i 'akarongo ē tei reira aia.

56Ē te au 'ōire mama'ata ē te au 'ōire rikiriki ē te au kāinga rava rāi tāna i tomo ra, kua tuku maira rātou i te aronga maki ki te au ngā'i 'oko'oko'anga, kua 'akanauru maira i aia kia 'akatūkia 'ua ake rātou i tōna tapa kāka'u. Ē ko tei 'akatūkia mai i aia ra, kua ora anake atura rātou.