Ebera 2 - Cook Island Maori Revised New Testament(CIMRNT)

Te rāvenga ora ma'ata

1Nō reira, 'e mea tau rāi kia mou meitaki tātou i te tuatua mou tā tātou i 'akarongo ana, kia kore tātou e 'aka'āriu kē'ia atu.

2'E mana 'oki tō te karere ta'ito tei 'akakite'ia mai e te au 'āngela. Ē ko te tangata tātakita'i tei kore i 'ākono, mē kāre tei kore i kauraro, 'e utunga te tūtaki tau nōna.

3Ka 'oro kē āinei tātou i te utunga mē kore tātou e 'āriki i te karere o tēia rāvenga ora ma'ata nei? Kua nā mua 'oki te reira i te 'akakite'ia mai e te 'Atu ko Iēsū, ē i 'akapāpū'ia mai ki a tātou e te aronga tei 'akarongo ana i aia.

4Ē nā te Atua 'ua'orāi i 'akaāri katoa mai i te reira nā roto mai i te au 'akairo ē te au rāvenga ūmeremere, nā roto katoa mai i te au 'anga'anga mana tūkēkē ē te au 'apinga aro'a a te Vaerua Tapu mei tei tau ki tōna anoano.

Te tumu o te rāvenga ora

5Kāre 'oki te Atua i 'akariro i te au 'āngela 'ei 'aka'aere nō te ao 'ōu te ka tae mai. Ko te ao 'oki ia tā mātou e tuatua nei.

6Sal 8.4-6Kua 'akakite rā tēta'i 'īrava o te Tuatua Tapu, tei nā kō mai ē,

“'E a'a te tangata nei i ma'ara mai ei koe i aia,

ē 'e a'a tō te tangata nei 'uānga i 'ākono mai ei koe i aia?

7Nō tēta'i roa iti 'ua ake, kua 'akariro mai koe i aia 'ei iti ake i te au 'āngela,

ē i reira kua 'akakorōna mai koe i aia ki te kakā ē te ngāteitei,

8ē kua 'akariro mai koe i aia 'ei 'aka'aere nō te au mea kātoatoa.”

Nō reira, kāre rava 'e mea toe tei kore i tukuna'ia ki raro ake i aia. Tē kite nei rā tātou i tēia 'ati'anga nei ē, kāre te au mea kātoatoa i tukuna'ia ake ki raro i te tangata.

9Inārā, tē kite nei tātou i a Iēsū, ko tei 'akariro'ia 'ei iti ake i te au 'āngela nō tēta'i roa iti 'ua ake, i 'akakorōna'ia ia ki te kakā ē te ngāteitei nō tōna 'āriki'anga i te mate, nō te mea, nā roto i te aro'a 'ua o te Atua i mate ei aia nō te kātoatoa.

10Nō te Atua te au mea kātoatoa ē nāna rāi i 'anga i te au mea kātoatoa. 'E mea tika i aia i te 'akariro i a Iēsū 'ei tau meitaki rava nā roto i te au mate. Ko Iēsū 'oki te tumu nō te rāvenga ora tei arataki i te tangata 'e mānganui ki roto i te kakā.

11Ko ia e 'akatapu i te tangata ē ko rātou tei 'akatapu'ia, 'okota'i rāi ō rātou Metua. Nō reira, kāre aia i 'akamā i te karanga i a rātou ē, 'e au taeake,

12Sal 22.22i te nā kō'anga ē,

“Ka 'akakite au i tō'ou ingoa ki tōku ra au taeake.

Ka 'akapa'apa'a au i a koe i rotopū i te 'uipā'anga ra.”

13 a: Isa 8.17; b: Isa 8.18 Ē tē pērā katoa ra aia ē, “Ko au, ka 'irinaki au ki aia.” Ē tē pērā katoa rāi aia ē, “Inā, tēia au nei ē te au tamariki tā te Atua i 'ōronga mai nāku ra.”

14Ko tēia au tamariki, 'e tū tangata tō rātou kātoatoa ma te kiko ē te toto. Ē kua riro katoa mai a Iēsū mei a rātou te tū, kia 'akakore aia nā roto i tōna mate i te mana o te Tiāporo, tei mana nō runga i te mate,

15ē kia 'akarangatira katoa aia i a rātou tei riro mei te tuika'a rāi i tō rātou ora'anga katoa nō tō rātou mataku i te mate.

16Isa 41.8,9'E tika rāi, kāre aia e tauturu mai i te au 'āngela, inārā (mei tei tā'iku'ia i roto i te Tuatua Tapu ē), tē tauturu nei aia i te 'uānga a Āberahāma.

17Nō reira, kia 'akariro'ia aia mei tōna au taeake rāi e tikāi i te au mea kātoatoa, ē i rauka ai i aia i te riro mai 'ei Ta'unga Ma'ata tuatua mou tei tau kia 'irinaki'ia i tōna tāvini'anga i te Atua ē tei 'akaāri mai i te aro'a, kia 'akakore'ia te au 'ara a te tangata nei.

18I tēianei, ka rauka i aia i te tauturu i a rātou tei tīmata'ia, nō te mea, ko ia 'ua'orāi tei roko'ia e te au mate.