2 Kōrīnētia 5 - Cook Island Maori Revised New Testament(CIMRNT)

1Kua nakiro tikāi 'oki tātou ē, kia tuku'ia te pū'ākapa ki raro, koia te 'are kōpapa tā tātou e no'o nei ki roto i tēianei ao, 'e 'are tō tātou ki kō i te Atua ra, 'e 'are mutukore i te rangi ra, kāre i ma'ani'ia e te tangata.

2Tē ngunguru nei 'oki tātou i roto i tēia pū'ākapa ma te tino tāpapa atu kia 'akakāka'u'ia tātou ki tō tātou 'are rangi ra,

3nō te mea, mē 'akakāka'u'ia tātou ki te reira, kāre tātou e kitea'ia i te no'o tā'ākā 'ua'anga.

4I a tātou 'oki e no'o nei i roto i tēia pū'ākapa nei, tē ngunguru nei tātou ma te taitaiā, kāre nō te mea ē, tē 'inangaro nei tātou kia kiriti'ia tō tātou kāka'u, kia 'akakāka'u 'aka'ou'ia rā tātou nā runga ake, 'ei reira e 'āpuku'ia ai te mea mate 'ua e te mea ora.

5Ko te Atua 'oki tei te'ate'amamao i a tātou nō tēia 'akakoro'anga tikāi. Ko ia rāi tei tuku mai i te Vaerua 'ei 'akairo ki roto i a tātou.

6Nō reira, tē kī nei rāi tātou i te 'irinaki'anga. Kua nakiro 'oki tātou ē, mē tei roto tātou i te kōpapa nei, tē no'o takakē ra i a tātou i te 'Atu.

7Tē ora nei 'oki tātou nā roto i te 'akarongo, kāre nā roto i te kite mata.

8Tē kī nei tātou i te 'irinaki'anga ē, 'e mea mareka'ia e tātou kia 'akaruke i te kōpapa ē kia no'o atu ki ō te 'Atu ra.

9Ko tō tātou 'akakoro'anga 'oki kia mareka mai aia i a tātou, noa atu 'oki ē, tei roto tātou i te ngutu'are kōpapa, mē kāre rā tei va'o ake.

10Rōm 14.10Ka tū 'oki tātou kātoatoa ki mua i te 'akavā'anga a te Mesia e tikāi, kia rauka i te tangata tātakita'i te tūtaki kia tau ki tāna i rave i roto i te kōpapa nei, mē 'e meitaki, mē 'e kino.

Te 'anga'anga 'aka'au

11Tē kite nei 'oki mātou i te mataku i te 'Atu, ē nō reira, tē tīmata nei mātou i te ako i te tangata kia āru mai i a mātou. Ē ko mātou nei rā, kua kitea ātea 'ua'ia e te Atua. Tē mānakonako nei au ē, tē kitea ātea katoa'ia maira au i roto i te 'ō'onu'anga o tō kōtou ngākau.

12Kāre 'oki ē, tē 'akameitaki 'aka'ou nei mātou i a mātou 'ua'orāi ki a kōtou na, tē 'ōronga atu nei rā mātou i te 'ati'anga nō kōtou kia ngākau parau tikāi kōtou i a mātou, kia rauka i a kōtou i te pa'u atu i te aronga i 'akaparau i a rātou nō runga i te au mea ō va'o 'ua o te tangata nei, ē kāre nō runga i te au mea i roto tikāi o te tangata nei.

13'E manako tūkē tākiri āina tō mātou? Nō te Atua ia i pērā ai. Tē tau meitaki āina tō mātou manako? Nō kōtou ia i pērā ai.

14Nā te aro'a 'oki o te Mesia i 'akanauru i a mātou. Kua pāpū meitaki tikāi 'oki i a mātou ē, i mate tēta'i tangata nō te kātoatoa, nō reira 'oki i mate ei te kātoatoa.

15Ē i mate 'oki aia nō te kātoatoa, kia kore te aronga e ora ra e ora nō rātou 'ua'orāi, nōna rā tei mate ē tei 'akatū'ia nō rātou.

16Mei tēianei atu i reira, kāre mātou e 'ārite manako tangata 'ua i te tū o tēta'i 'ua atu tangata; mei te mea ē, kua 'ārite manako tangata 'ua ana mātou i te Mesia, kāre mātou e 'akapērā 'aka'ou ana i tēianei.

17Nō reira, mē tei roto te tangata i te Mesia ra, kua riro ia 'ei tangata 'ōu; kua kore 'oki te au mea ta'ito ra, inā, kua riro te au mea rava rāi 'ei au mea 'ōu.

18Nō kō mai tēia au mea kātoatoa i te Atua tei 'aka'au i a tātou ki aia 'ua'orāi nā roto mai i te Mesia, ē kua tuku mai aia i te 'anga'anga 'aka'au ki a mātou nei.

19Ko te Atua 'oki tei 'aka'au nā roto i te Mesia i te tangata rava rāi ki aia 'ua'orāi, ma te kore aia e 'akamou i tō rātou au tārevakē i mua i aia. Ē kua tuku mai aia i te karere o te 'aka'au ki a mātou.

20I riro mai ei mātou nei 'ei au mata nā te Mesia, mei te mea atura ē, tē 'akamāro'iro'i nei te Atua i a kōtou nā roto atu i a mātou nei. Nō te Mesia 'oki mātou e pati 'akatenga atu nei i a kōtou: e 'aka'ongi kōtou i a kōtou ki te Atua.

21Nō tātou 'oki i 'akariro ei te Atua i te Mesia, te tangata 'arakore, 'ei tangata 'ara, kia riro tātou nā roto i te Mesia 'ei aronga 'akatikatika'ia i mua i te Atua.