Galatia 5 - Cook Island Maori Revised New Testament(CIMRNT)

1I 'akarangatira mai ei te Mesia i a tātou i taua tū rangatira ra. Nō reira, e tāmou mārie kōtou i te reira, e auraka kōtou e riro 'aka'ou 'ei tuika'a.

Te tū rangatira Keretitiāno

2Inā, ko au tēia, ko Paulo, tē 'akakite atu nei au ki a kōtou na ē, mē ka 'āriki kōtou kia peritome'ia kōtou, kāre rava ā kōtou pu'apinga e rauka mei te Mesia mai.

3Ē tē 'akamatakite 'aka'ou atu nei au i te tangata rava rāi te ka peritome'ia, 'e kaio'u aia ē kia 'ope rava atu te Ture i te 'ākono'ia e ia.

4Ko kōtou rava rāi tei umuumu kia 'akatikatika'ia e te Ture, kua 'akatakakē'ia i a kōtou mei te Mesia mai. Kua 'akaruke i a kōtou i te aro'a 'ua.

5Ko mātou rā, tē tāpapa nei mātou i te mānakonako'anga 'akatikatika nā roto i te 'irinaki'anga, nō te Vaerua 'oki.

6I roto 'oki i te Mesia ko Iēsū, kāre 'e pu'apinga o te peritome, kāre 'oki o te peritomekore. Ko te pu'apinga rā tei roto ia i te 'irinaki'anga; ē tē 'anga'anga nei te reira nā roto i te aro'a.

7I 'oro meitaki ana 'oki kōtou. Nā 'ai kōtou i ārai i'o nei, i kore ei kōtou i kauraro 'aka'ou i te tuatua mou?

8Ko taua 'akanauru'anga ra, kāre ia nō kō mai i tei kāpiki i a kōtou na.

91 Kōr 5.6“Ko tēta'i mānga 'ōpue meangiti ra ka 'aka'ōpue'ia i te pōpō varāoa oi katoa'ia ra.”

10'E mea pāpū rā i āku i roto i te 'Atu nō runga i a kōtou ē, kāre kōtou e 'akatūkē i tō kōtou manako. Ko tei 'akapekapeka rā ki a kōtou, ka 'akautunga'ia aia e te Atua, noa atu ē ko 'ai aia.

11Ko au nei 'oki, e te au taeake, nāringa ē tē 'āpi'i nei rāi au i te peritome'anga, 'e a'a au i tākinga kino'ia mai ei? Kua 'akakore'ia 'oki i reira te maitu'anga o te sātauro.

12'E mea meitaki 'oki i āku kia 'akatakakē tākiri'ia atu te aronga i 'akapekapeka ki a kōtou na.

13I kāpiki'ia 'oki kōtou nō te tū rangatira, e te au taeake; auraka nō te tū rangatira kia rave i tā te kōpapa ra, kia tāvini rā tēta'i i tēta'i nā roto i te aro'a.

14Lev 19.18Kua 'akako'u'ia 'oki te Ture katoa ki te tuatua 'okota'i ra, koia 'oki, “E aro'a atu koe i tō'ou tangata tupu mei a koe 'ua'orāi na.”

15Mei te mea ra ē, tē 'oni'oni nei ē te 'āpuku nei kōtou tēta'i i tēta'i, e matakite, ko te pou tākiri ā'ea 'oki kōtou i a kōtou 'ua'orāi.

Ko te ora'anga rangatira nā roto mai ia i te Vaerua

16Tēia 'oki tāku tuatua: e 'ā'āere ma te Vaerua, kia kore kōtou i reira e 'akatupu i te noinoi o te tū tangata 'ua nei.

17Rōm 7.15-23Tē pāto'i nei 'oki te tū tangata 'ua nei i tā te Vaerua, ē tē pāto'i nei te Vaerua i tā te tū tangata 'ua nei. 'E 'enemi 'oki rāua tēta'i ki tēta'i, i kore ei i tika i a kōtou kia rave 'ua kōtou i tā kōtou i 'inangaro ra.

18Mē te 'aka'aere'ia rā kōtou e te Vaerua, kāre i a kōtou i raro ake i te Ture.

19Ē tēianei, kua kitea meitaki'ia te au 'anga'anga a te tū tangata 'ua nei, koia 'oki, te 'akaturi, te 'anga'anga vi'ivi'i, te kanga taukore,

20te 'akamori 'ītoro, te purepure, te no'o 'enemi, te taumārō, te vare'ae pukupuku, te riri 'oto'oto, te karo, te 'akamavete, te pae kē,

21te vare'ae, te kona, te peu kikino, ē te au mea mei te reira te tū. Tē 'akakite ātea atu nei au ki a kōtou, mei tāku rāi i 'akakite atu i muatangāna ra ē, ko rātou tē rave ra i taua au mea ra, kāre ō rātou tu'anga i roto i te bāsileia o te Atua.

22Kāreka tā te Vaerua e 'akatupu ra, ko te aro'a ia, te rekareka, te 'au, te 'akakoromaki'anga roa, te tākinga meitaki, te meitaki, te tū 'ākono meitaki tikāi,

23te marū ē te no'o mārie. Kāre 'oki 'e ture e pāto'i nei i te reira au mea.

24Ko rātou 'oki ko tō te Mesia ra ko Iēsū, kua 'akasātauro'ia tō rātou tū tangata 'ua nei ma te au 'inangaro kino ē te noinoi.

25Mē tē ora nei tātou i te Vaerua ra, e āru rāi tātou i tā te Vaerua ra.

26'Eia'a tātou kia nengonengo pu'apingakore ma te 'akaongoongo atu tēta'i i tēta'i ē te vare'ae atu tēta'i i tēta'i.