Rōma 14 - Cook Island Maori Revised New Testament(CIMRNT)

Auraka e 'akavā atu i tō kōtou taeake

1 Kol 2.16 Te tangata 'oki tei paruparu i te 'akarongo, ē 'āriki atu kōtou i aia, auraka rā e taumārōrō atu i tāna e manako ra.

2Tē 'irinaki ra 'oki tēta'i tangata ē, ka tika 'ua i te kai i te au mānga rava rāi, kāreka te tangata paruparu ra ko te kai tanutanu anake 'ua tāna ka kai.

3Auraka rā tei kai i te au mānga rava rāi e 'akava'ava'a atu i tei kore i kai ra, ē auraka tei kore i kai ra e 'akavā atu i tei kai ra; nō te mea, kua 'āriki'ia mai aia e te Atua.

4Ko koe na 'oki, ko 'ai koe kia 'akavā atu i te tāvini o tēta'i kē ra? I te tika a tōna 'ua'orāi pū e tū ei aia, mē kāre e 'inga ai aia. Ē ka tū rāi aia nō te mea, e tika 'oki i te 'Atu i te 'akatū i aia.

5Tē manako nei tēta'i tangata ra ē, 'e meitaki atu tēta'i rā i tēta'i, kāreka tēta'i tangata tē manako ra ē, 'āiteite 'ua te au rā kātoatoa; kia pāpū meitaki rā i te tangata tātakita'i i tōna 'ua'orāi manako.

6Ko tei 'ākono i tēta'i rā takakē, tē 'ākono ra ia nō te 'Atu. Ko tei kai ra 'oki, tē kai ra ia nō te 'Atu, nō te mea, tē 'akameitaki ra aia i te Atua. Tei kore i kai ra, kāre atura aia i kai nō te 'Atu, ē tē 'akameitaki ra rāi aia i te Atua.

7Kāre rava 'oki tēta'i o tātou e ora nei nōna 'ua'orāi, ē kāre rava 'oki tēta'i o tātou e mate nei nōna 'ua'orāi.

8Mē tē ora nei tātou, e ora i a tātou nō te 'Atu, ē mē tē mate nei tātou, e mate i a tātou nō te 'Atu. Ē tēianei, mē tē ora nei tātou, mē kāre tē mate nei, nō te 'Atu rāi tātou.

9Nō reira 'oki te Mesia i mate ei, ē i ora 'aka'ou ei, kia riro aia 'ei 'Atu nō tei mate ē nō tei ora 'oki.

102 Kōr 5.10Ko koe na 'oki, 'e a'a rā koe i 'akavā ai i tō'ou taeake? Mē kāre, 'e a'a koe i 'akava'ava'a ai i tō'ou taeake? Ka tū kātoatoa 'oki tātou ki mua i te 'akavā'anga a te Atua ra,

11Isa 45.23mei tei tātā'ia ra ē,

“Nō te mea, tē ora nei au, i tuatua mai ei te 'Atu,

ka tuturi te au turi katoa ki raro ki mua i āku,

ē ka 'a'aki te au va'a rava rāi ki te Atua.”

12Nō reira, ka 'ope tākiri rava tātou i te 'a'aki ki te Atua i tā tātou i rave ra.

Auraka e 'akatupu i te tūrori'anga ki tō'ou taeake

13Ē tēianei, oti ra 'ua tātou i te 'akavā atu tēta'i ki tēta'i, ē 'akapāpū rā ē, auraka e tuku i te tūrori'anga, mē kāre, te mea e 'inga ai tō'ou taeake.

14Kua kite au, ē kua pāpū katoa 'oki i āku i roto i te 'Atu i a Iēsū ē, kāre rava 'e mea e vi'ivi'i tō roto i aia 'ua'orāi; inārā, ko tēta'i 'ua atu tangata tei manako ē, 'e vi'ivi'i tēta'i mea, 'e vi'ivi'i rāi taua mea ra ki aia.

15Mē marekakore tō'ou taeake i tā'au e kai ra, kāre tākiri tō'ou i te 'aerenga aro'a. Auraka 'oki e 'akariro i tā'au e kai ra 'ei tūrori'anga nō tēta'i, nō te mea, kua mate katoa te Mesia nōna ra.

16Auraka e 'akatika i tā kōtou i manako ē 'e mea meitaki kia tuatua'ia ē 'e mea kino.

17Ko te bāsileia 'oki o te Atua kāre i te kai ē te inu, māri rā, 'e tuatua tika ē te 'au ē te rekareka i roto i te Vaerua Tapu.

18Ko tei pērā i te tāvini'anga i te Mesia ra, ka mareka'ia mai ia e te Atua ē ka 'āriki'ia mai e te tangata rava rāi.

19Ē tēianei, ka umuumu atu tātou i te au mea e tupu ei te 'au ē te 'akamāro'iro'i'anga tēta'i ki tēta'i.

20Auraka e riro ē, nā te kai e 'akakore i te 'anga'anga a te Atua. 'E vi'ivi'ikore te au mea rava rāi, inārā, 'e mea kino i tēta'i tangata kia 'akatupu i te tūrori'anga nā roto i tāna e kai ra.

21'E mea meitaki 'oki auraka e kai i te kiko manu, mē kāre, e inu i te uaina, mē kāre, e rave i tēta'i mea ka 'inga ai tō'ou taeake.

22Ko tā'au e 'akarongo ra, tei rotopū ia i a koe 'ua'orāi ē te Atua. 'E ao tō te tangata tei kore i 'aka'apa'ia e tōna 'akavā ngākau, nō te mea, kua tau ia ki tāna i 'āriki ra.

23Ko tei 'ēkōkō rā, kua 'aka'apa'ia ia mē kai aia, nō te mea, kāre aia i rave nā roto mai i te 'akarongo. Ko te au mea kātoatoa 'oki kāre i rave'ia nā roto mai i te 'akarongo ra, 'e 'ara ia.