Luka 2 - Cook Island Maori Revised New Testament(CIMRNT)

Te 'ānau'anga o Iēsū(Mātaio 1.18-25)

1Ē i taua tuātau ra, kua tuku maira a Kaisara Auguso i te 'akaue'anga ē, e 'aka'ope i te au 'enua kātoatoa kia tārē'ia.

2Ko te tārē'anga muatangāna tēia ka tūtara ai a Kurenio i Sūria.

3E 'ope tākiri rava akera te tangata i te 'aere ki tō rātou 'ua'orāi 'ōire kia tārē'ia.

4'Aere katoa atura a Iōsēpha mei roto atu i te 'ōire ko Nāzarēta i Galilea ra, ki te 'ōire nō Dāvida i Iūdea i tuatua'ia ra ē ko Bētelehēma; nō te mea, nō te 'uānga aia ē nō te kōpū tangata o Dāvida,

5kia tārē katoa'ia rāua ko Māria, te va'ine i momoko'ia nāna ra, ē tē nui ra aia.

6Ē i tō rāua no'o'anga i reira, 'ope rava akera ōna puke rā ka 'ānau ei aia ra.

7Kua 'ānau i'ora aia i tāna tama mua, va'ī atura ki te kāka'u, e tuku atura ki roto i te vairangā kai a te puakatoro, nō te mea, kāre rāua i ō ki te 'are tāpae'anga.

Te au tiaki māmoe ē te au 'āngela

8'E aronga tiaki māmoe tei taua 'enua ra e no'o ra i roto i te au koro i te tiaki'anga i tā rātou au 'ānana i te pō.

9Ē inā, kua mama maira tēta'i 'āngela a te 'Atu ki a rātou, ē kua kako rava i'ora rātou e te mārama ma te kakā o te 'Atu. Ē ma'ata rava akera tō rātou mataku.

10Kua tuatua maira te 'āngela ki a rātou, “'Eia'a e mataku! Inā 'oki 'e tuatua meitaki tāku e tao'i mai ki a kōtou na, ka riro ia 'ei rekareka ma'ata nō te tangata rava rāi.

11I nakōnei 'oki i 'ānau ei te 'Akaora nō kōtou i te 'ōire o Dāvida, koia 'oki te Mesia ra ko te 'Atu.

12Ē tēia tā kōtou 'akairo: ka kite kōtou i tēta'i tamaiti i te vai 'ua'anga ki roto i tēta'i vairangā kai a te puakatoro, kua va'ī'ia ki te kāka'u.”

13Ē i reira rāi, kua kāpiti'ia maira taua 'āngela ra 'e tēta'i urupū ma'ata nō te rangi mai i te 'akameitaki'anga i te Atua ē te nā kō'anga,

14“Kia 'akakakā'ia te Atua i te rangi teitei,

ē kia 'au te aronga i te ao nei tei aro'a'ia mai e ia.”

15Ē kia 'oki atura taua au 'āngela ra ki te rangi ra, kua tuatua i'ora te au tiaki māmoe tēta'i ki tēta'i ra, “E taki 'aere tātou ki Bētelehēma, e 'ākara i taua mea ra i tā te 'Atu i 'akakite mai ki a tātou nei.”

16'Aere viviki atura rātou, ē kite atura i a Māria rāua ko Iōsēpha, ē te tamaiti i te vai 'ua'anga ki roto i te vairangā kai a te puakatoro.

17E kite atura rātou, 'akakite 'aere atura i te tuatua nō taua tamaiti ra i tuatua'ia mai ki a rātou ra.

18Ē te aronga i 'akarongo ra, ūmere anake atura i te au mea tā te au tiaki māmoe i 'akakite atu ki a rātou ra.

19Kāreka a Māria, 'akaea atu i'ora i taua au tuatua ra ē 'akamā'ara'ara akera i roto i tōna ngākau.

20'Oki atura taua au tiaki māmoe ra i te 'akakakā'anga i te Atua i te au mea rava rāi tā rātou i kite, mei tei tuatua'ia mai ki a rātou ra.

Kua tapa'ia te ingoa ko Iēsū

21 a: Lev 12.3; b: Luk 1.31 I te oti'anga te peritome'anga'ia o te tamaiti i te rā varu, tapa'ia i'ora tōna ingoa ko Iēsū, te ingoa tā te 'āngela i tapa mai nōna 'ōu tōna metua va'ine i tō ei i aia ra.

Kua 'apai'ia a Iēsū ki roto i te 'iero

22I te pou'anga o te au rā tāmā'anga nōna, mei tā te Ture a Mōse i 'akaue ra, 'apai atura a Iōsēpha rāua ko Māria i a Iēsū ki Iērūsalēma nō te tuku atu i aia ki mua i te aroaro o te 'Atu ra,

23Exo 13.2,12mei tei tātā'ia 'oki i te Ture a te 'Atu ra ē, “Ko te au tama tāne mua rava rāi, kua tapu ia nō te 'Atu;”

24Lev 12.6-8ē nō te 'apai katoa atu 'oki i tēta'i 'ātinga, mei tei tuatua'ia i te Ture a te 'Atu, “E rua kūkupa, mē kāre ra e rua punuā rupe.”

25Ē inā, tei Iērūsalēma tēta'i tangata ko Simeona te ingoa; 'e tangata tuatua tika ē te 'ākono Atua, tē tāpapa ra i te 'akapūma'ana nō Īserā'ela, tei runga 'oki i aia te Vaerua Tapu.

26Kua 'akakite takere'ia ana aia e te Vaerua Tapu ē, kāre aia e mate vave kia kite rā aia i te Mesia a te 'Atu ra.

27Ē i arataki'ia aia e te Vaerua ki roto i te 'iero. Ē tē 'apai maira 'oki ngā metua i te tamaiti ra i a Iēsū ki roto nō te rave i tā te Ture i aia,

28kua rave akera a Simeona i aia, 'iki'iki i'ora, ē 'akameitaki atura i te Atua, nā kō atura,

29“E taku 'Atu ē, e tuku koe i tō'ou tāvini i tēianei ma te 'au,

kia tau 'oki ki tā'au tuatua.

30Kua kite ake nei 'oki tōku mata i te ora nā'au,

31tei 'ākono'ia e koe ki mua i te mata o te au 'iti tangata kātoatoa nei,

32 Isa 42.6; 49.6; 52.10 'ei tūrama nō te 'akamārama'anga i te au 'ētene,

ē nō te kakā o tō'ou 'iti tangata Īserā'ela.”

33E ūmere rava atura te metua tāne rāua ko te metua va'ine i te au mea i tuatua'ia nōna ra.

34Kua 'akameitaki atura a Simeona i a rāua, ē kua nā kō atura ki a Māria tōna metua va'ine, “Inā, e riro tēia tamaiti nei 'ei mea e 'inga ai ē e tū 'aka'ou ei tō Īserā'ela 'e mānganui; ē 'ei 'akairo te ka tau'ētono'ia,

35kia kitea te au manako o te au ngākau 'e mānganui. Ē ko koe 'oki, ka puta mama rava tēta'i koke ki tō'ou ngākau.”

36Ē tēta'i peroveta va'ine ra ko Ana, 'e tamā'ine nā Phānuela, nō te kōpū o Āsera. Kua rua'ine roa aia. E 'itu ōna mata'iti i te no'o'anga rāua ko te tāne mei tōna pāretēnia'anga ra.

37Kua taka'ua rā aia, ē kua varu nga'uru ē 'ā ara ōna mata'iti. Ē kāre rava aia i 'akaruke i te 'iero, ē kua 'akamori i te Atua i te pō e te ao ma te pure ē te 'akakore'angā kai.

38Ē tei reira a Ana i taua ora ra, 'akapa'apa'a atura i te Atua, ē kua tuatua i'ora i aia ki te aronga katoa i tāpapa i te ora rangatira nō Iērūsalēma ra.

Te 'oki'anga ki Nāzarēta

39 Māt 2.23 E oti akera i a rāua i te rave i tei tuatua'ia mai i roto i te Ture a te 'Atu ra, 'oki atura rāua ki Galilea ki tō rāua 'ua'orāi 'ōire tikāi, ki Nāzarēta.

40Tupu atura taua tamaiti ra, e māro'iro'i atura, kī atura 'oki i te pakari, ē tei aia 'oki te 'akaperepere'anga o te Atua.

Ko Iēsū i roto i te 'iero

41 Exo 12.1-27; Deut 16.1-8 Kāre 'e mata'iti i tukua e ngā metua nō Iēsū i te 'aere'anga ki Iērūsalēma nō te 'Ōro'a Pāsa ra.

42E tae akera ki te nga'uru mā rua o tōna mata'iti, 'aere atura rātou nō te 'ākono'anga o taua 'Ōro'a ra.

43E pou akera taua au rā ra, 'o'oki maira rāua, no'o atura te tamaiti ko Iēsū ki muri ki Iērūsalēma. Kāre 'ua tōna ngā metua i kite.

44Kua manako 'oki rāua ē, tei roto aia i te pouou tangata. Ka ta'i akera 'oki pō i tō rāua 'aerenga, ē kua kimi atura i aia i roto i tō rāua 'ua'orāi kōpū tangata ē i tō rāua au taeake ra.

45Ē kāre rava akera aia i kitea, 'o'oki atura rāua ki Iērūsalēma i te kimi'anga i aia.

46E toru akera rā i topa, kite atura rāua i aia i roto i te 'iero, tē no'o ra i rotopū i te au pū'āpi'i, tē 'akarongo atura ē tē ui atura ki a rātou.

47Ūmeremere anake i'ora te aronga katoa i 'akarongo i aia ra i tōna kite ē tāna au pa'u'anga.

48E kite atura tōna ngā metua i aia, pō'itirere atura rāua. Ē kua karanga atura tōna metua va'ine ki aia, “E tama, 'e a'a koe i pērā mai ei koe ki a māua? Inā, i kimi 'ua ana au ma tō'ou metua tāne i a koe ma te auē.”

49Kua tuatua maira aia ki a rāua, “'E a'a kōrua i kimi mai ei i āku? Kāre kōrua i kite ē 'ei roto rāi au i te 'are o taku Metua e tau ei?”

50Kāre akera rāua i mārama i te tuatua tāna i tuatua mai ki a rāua.

51E 'oki maira aia ē rāua katoa ki Nāzarēta, ē kauraro atura i a rāua. Kua mānakonako mārie i'ora tōna metua va'ine i taua au mea katoa ra i roto i tōna 'ua'orāi ngākau.

521 Sam 2.26; Mase 3.4Tupu atura a Iēsū ki te ma'ata'anga ē te kite pakari, ē te 'akaperepere'ia mai e te Atua ma te tangata katoa.