1Ka 'akapē'ea nei rā 'oki tātou? Ka rave tāmou 'ua atu rāi tātou i te 'ara kia ma'ata 'ua mai te aro'a 'ua o te Atua?
2Auraka rava ia! Kua mate 'oki tātou nei i te 'ara, e 'akapē'ea tātou e ora tāmou 'ua atu ei i roto i te reira?
3Kāre āinei kōtou i mārama ake ē, ko tātou kātoatoa i bāpetīto'ia i roto i te Mesia ra i a Iēsū, kua bāpetīto'ia tātou i roto i tōna mate?
4Kol 2.12I tēianei, kua tanumia tātou ma ia katoa ki roto i te mate nā roto i tō tātou bāpetīto'anga'ia ra; ē mei te Mesia i 'akatū'ia mei te mate maira e te mana kakā o te Metua, kia pērā katoa rāi tātou i te 'ā'āere'anga i roto i te ora'anga 'ōu.
5Mei te mea ē, kua kāpiti'ia tātou ki aia i roto i tōna matenga, e kāpiti katoa'ia rāi tātou ki roto i tōna tū'aka'ou'anga.
6Kua kite 'oki tātou ē, kua 'akasātauro'ia tō tātou tūranga ta'ito ma ia katoa 'oki, kia 'akaparukā rava'ia te kōpapa o te 'ara, kia kore rava tātou e tāvini 'aka'ou atu i te 'ara,
7nō te mea, ko te tangata i mate ra, kua tatara'ia mai aia mei roto mai i te mana o te 'ara.
8Inā, mē kua mate tātou ma te Mesia katoa, tē 'irinaki nei tātou ē, ka ora tātou ma ia katoa.
9Kua kite 'oki tātou ē, i 'akatū'ia te Mesia mei te mate maira, ē kāre ia e mate 'aka'ou, kāre 'oki te mate e mana 'aka'ou ki runga i aia.
10Nō te mea 'oki ē, ko te Mesia i mate ra, i mate 'okota'i 'ua mate'anga kia kore e mana 'aka'ou te 'ara. Tē ora nei rā aia, ē tē ora nei nō te Atua ra.
11Kia pērā katoa kōtou i te manako'anga i a kōtou 'ua'orāi ē, kua mate kōtou i te 'ara, kua ora rā i te Atua i roto i te Mesia ra i a Iēsū.
12Ē nō reira, auraka e 'akatika i te 'ara 'ei 'aka'aere i tō kōtou kōpapa mate 'ua nei, ko te 'āriki ā'ea 'ua kōtou i tōna tū noinoi ma'ata.
13Auraka e 'ōronga 'ua atu i tēta'i mero o tō kōtou kōpapa 'ei rave i te kino kia 'akatupu i te 'ara. E 'ōronga rā i a kōtou 'ua'orāi ki te Atua mei te aronga i mate ana ē kua ora maira, ē e 'ōronga i te au mero o tō kōtou kōpapa 'ei rave i te tuatua tika nō te Atua ra.
14Auraka rava te 'ara kia riro mai 'ei pū nō kōtou, nō te mea, kāre kōtou i 'aka'aere'ia e te Ture, i 'aka'aere'ia rā e te aro'a 'ua o te Atua.
'E tuika'a nō te tuatua tika15Ka 'akapē'ea rā? Ka rave tāmou 'ua atu rāi tātou i te 'ara, nō te mea ē, kāre tātou i 'aka'aere'ia e te Ture, i 'aka'aere'ia rā e te aro'a 'ua o te Atua? Auraka rava ia!
16Kāre āinei kōtou i kite ē, mē 'ōronga atu kōtou i a kōtou 'ua'orāi 'ei au tāvini nō te kauraro atu i tēta'i tangata, 'e au tuika'a rāi i a kōtou nōna tā kōtou e kauraro ra? Mē 'e au tuika'a kōtou nō te 'ara, 'e mate te 'openga; mē 'e au tuika'a rā nō te kauraro, ko te rāvenga ia kia 'akatikatika'ia.
17Kia 'akameitaki'ia rā te Atua i te mea ē, 'e au tuika'a kōtou i mua ana nō te 'ara, kua kauraro tikāi rā kōtou i tēianei ma te ngākau katoa i te au tū 'āpi'i'anga i tukuna'ia atu ki a kōtou na.
18Kua tatara'ia kōtou mei roto mai i te 'ara, ē kua riro i'o mai nei rā kōtou 'ei au tuika'a nō te tuatua tika ra.
19Tē tuatua nei 'oki au mei tā te tangata nei rāi, nō te mea, 'e tū pōiri 'oki tō kōtou. Mei a kōtou i 'ōronga 'ua ana i a kōtou 'ua'orāi 'ei au tāvini nō te au mea mākore ē te kino ma'ata nō te rave i te 'anga'anga kikino ra, kia pērā katoa kōtou i te 'ōronga'anga i a kōtou 'ua'orāi 'ei au tāvini nō te au mea tuatua tika ra nō te rave i te au 'anga'anga tapu ra.
20I tō kōtou tāvini'anga i te 'ara ra, kāre kōtou i raro ake i te tuatua tika ra.
21'E a'a tei rauka mai i a kōtou i te rave'anga i te au mea tā kōtou e 'akamā ra i tēianei? Ko te 'openga o aua mea ra, 'e mate!
22I tēianei rā, kua tatara'ia kōtou mei roto mai i te 'ara, ē kua riro i'o mai nei 'ei au tāvini nō te Atua, ē kua rauka i a kōtou te pu'apinga nō te 'anga'anga tapu ra, ē ko te ora mutukore ra 'oki te 'openga.
23'E utunga 'oki te mate nō te 'ara; kāreka te ora mutukore ra, 'e mea 'ōronga 'ua'ia mai ia e te Atua i roto i te Mesia ra ko Iēsū tō tātou 'Atu.
Who We AreWhat We EelieveWhat We Do
2025 by iamachristian.org,Inc All rights reserved.
