Ebera 8 - Cook Island Maori Revised New Testament(CIMRNT)

Te Ta'unga Ma'ata o tēta'i kōreromotu 'ōu ē te meitaki atu

1 Sal 110.1 Ko tēia 'oki te 'akakoro'anga ma'ata o tā mātou au tuatua: 'e Ta'unga Ma'ata tō tātou tei no'o i te rima katau o te terōno o te Atua pāpānunui i te rangi.

2Ko ia tei rave i te 'anga'anga ta'unga o te ngā'i tapu, ko te pū'ākapa mou 'oki tei kore i pātia'ia e te tangata, e te Atua rā.

3Ko te au ta'unga ma'ata kātoatoa kua 'akataka'ia 'ei 'apai i te au 'ātinga ē te au tārangā'ara ki te Atua. Ko tō tātou ta'unga i reira kua 'inangaro'ia kia 'apai katoa aia i te 'ātinga.

4Nāringa tei tēianei ao aia, kāre aia i te ta'unga, nō te mea, tē vai nei rāi te au ta'unga tei 'apai atu i te au 'ātinga tei tau i te Ture.

5Exo 25.40Ko te 'anga'anga tā taua au ta'unga ra i rave, 'e 'akatūtū'anga 'ua te reira, mē kāre, i tēta'i ata 'ua nō te au mea o te rangi, kāre i te mea tika tikāi. Mei a Mōse rāi, i aia e vaitata ra i te ma'ani i te Pū'ākapa o te kōreromotu, i ako'ia e te Atua i te nā kō'anga ē, “E matakite, kia rave koe i te au mea katoa kia tau i te 'ākara'anga tei 'akaāri'ia atu ki a koe i runga i te maunga.”

6Kua 'ōronga'ia rā i tēianei ki a Iēsū te 'anga'anga ta'unga tei ma'ata rava atu i tā rātou. Nō te mea, 'e ma'ata atu te meitaki o te kōreromotu tāna i 'akatupu i rotopū i te Atua ē tōna 'iti tangata, ē kua 'akatumu'ia 'oki ki runga i te papa'u'anga o te au mea mēmeitaki tikāi.

7Nāringa 'oki 'e meitaki rava taua kōreromotu mua ra, kāre e umuumu'ia kia mono'ia e tēta'i kōreromotu kē.

8Ier 31.31-34Tē 'aka'apa nei rā te Atua i tōna 'iti tangata i te nā kō'anga ē,

“Inā, e tae maira te au rā, tē tuatua maira te 'Atu,

e papa'u ei au i tēta'i kōreromotu 'ōu ki te ngutu'are o Īserā'ela ē ki te ngutu'are o Iūda.

9Auraka rā mei te kōreromotu tāku i papa'u ki tō rātou 'ui tupuna,

i te rā i mou ei au i tō rātou rima 'ei arataki i a rātou mei Aiphiti mai.

Kāre 'oki rātou i 'ākono tāmou i tāku kōreromotu,

ē kāre au i ma'ara 'aka'ou atu i a rātou, tē tuatua maira te 'Atu.

10Ko tēia te kōreromotu tāku ka papa'u ki te ngutu'are o Īserā'ela

i muri ake i taua au rā ra, tē tuatua maira te 'Atu:

E tuku au i tāku au ture ki roto i tō rātou manako,

ē e tātā au i te reira ki runga i tō rātou ngākau.

Ē e riro au 'ei Atua nō rātou,

ē e riro 'oki rātou 'ei 'iti tangata nōku.

11Ē kāre tēta'i tangata e 'āpi'i 'aka'ou atu i te tangata 'enua,

ē tēta'i taeake i tēta'i taeake i te nā kō'anga ē,

‘E kite ē, ko te Atua te 'Atu.’

Ka 'ope 'oki te kātoatoa i te kite mai ē, ko au te Atua,

mei tei iti e tae 'ua atu ki tei ma'ata ra.

12Ka 'akakore 'oki au i tā rātou au tuatua tikakore,

ē kāre au e 'akama'ara 'aka'ou i tā rātou au 'ara.”

13Nā roto i te tā'iku'anga ē, ko “te kōreromotu 'ōu,” kua 'akariro te Atua i te kōreromotu mua 'ei mea ta'ito. Ko tēta'i 'ua atu mea 'oki tei riro 'ei mea ta'ito ē te piro ra, kāre e roa, e ngaro kē ia.