1 Tesalōnia 1 - Cook Island Maori Revised New Testament(CIMRNT)

Te aro'a'anga

1 ē Tīmōteo ki tō Tēsālōnia 'ēkālēsia, 'e 'ēkālēsia 'oki o te Atua Metua ē te 'Atu ra ko Iēsū Mesia.

'Ei a kōtou te aro'a 'ua ē te 'au.

2Tē 'akameitaki atu nei mātou i te Atua nō kōtou rava rāi kāre e tīvata, i te tā'iku'anga i a kōtou i tā mātou nei pure.

3Kāre 'oki mātou e vata ana i te ma'ara atu i mua i te aroaro o te Atua tō tātou Metua i tō kōtou 'akarongo oraora, tō kōtou aro'a 'anga'anga pakari ē tō kōtou mou mārie'anga i te mānakonako'anga i te 'Atu ra i a Iēsū Mesia.

Te 'akarongo ē te 'ākara'anga o tō Tēsālōnia

4Tē nakiro nei mātou, e te au taeake ē, tē 'akaperepere nei te Atua i a kōtou, ē kua 'iki aia i a kōtou nōna.

5Kāre 'oki tā mātou karere i tae atu ki a kōtou na ma te tuatua va'a anake 'ua, i pērā katoa rā ma te mana, ma te Vaerua Tapu ē te pāpū'anga o te kite pū tikāi. Ē kua kite kōtou i tō mātou tū i rotopū i a kōtou. Kua riro te reira 'ei tauturu nō kōtou.

6 Anga 17.5-9 Ē ko kōtou 'oki, kua āru mai kōtou i a mātou ē te 'Atu 'oki, nā roto i te 'āriki'anga mai i te karere ma te rekareka a te Vaerua Tapu, noa atu ē, 'e tīnaimate ma'ata tō kōtou nō te reira.

7Ē i pērā i riro mai ei kōtou 'ei 'ākara'anga nō te aronga 'akarongo kātoatoa i Mākedōnia na ē i Ākaia nei.

8Nō kō mai 'oki i a kōtou i pararauare atu ei te karere a te 'Atu. Ē kāre i Mākedōnia ē Ākaia anake 'ua! I te au ngā'i rava rāi rā kua tae atu te tuatua o tō kōtou 'irinaki'anga i te Atua. Kāre e umuumu 'aka'ou'ia kia tuatua atu mātou i tēta'i mea.

9Nā rātou 'ua'orāi e 'akakitekite mai ana i te tū o tō kōtou 'ō'ō'anga mai i a mātou i rotopū i a kōtou, ē i tō kōtou 'āriu'anga mai mei te au 'ītoro ki te Atua, kia tāvini kōtou i te Atua ora ē te mou,

10ē kia tatari katoa kōtou i tāna Tamaiti nō te rangi mai, tāna i 'akatū mei te mate maira, ko Iēsū 'oki, tē 'akaora nei i a tātou mei te riri ā muri atu.