1E tae atura a Paulo rāua ko Bānaba ki Īkōnio, kua tomo atura rāua ki roto i te sūnago o te Ngāti Iūda, ē nō te tau tikāi i tā rāua ako'anga, 'e mānganui i'ora te Ngāti Iūda ē te au Eleni katoa i 'irinaki ra.
2Ko te au Ngāti Iūda 'irinakikore rā, kua tāoriori atura rātou i te au 'ētene ma te 'akakī atu i tō rātou ngākau ki te riri 'oto'oto ki te au taeake ra.
3'E no'o'anga roa tā rāua ki reira i te ako matakukore'anga i te karere o te 'Atu tei 'akapāpū mai i te karere o tōna aro'a 'ua, ē tei 'ōronga mai i te mana kia rave'ia te au 'akairo vāvāria ē te au mea ūmeremere e tō rāua rima.
4Kua ve'e i'ora te tangata o taua 'ōire ra: ko tēta'i pae kua piri atu ki aua Ngāti Iūda ra, ko tēta'i pae rā kua piri atu ki ngā 'āpōsetolo ra.
5I reira taua au 'ētene ra ē te Ngāti Iūda ma tō rātou au arataki katoa ra, i tāmata ai i te tākinga kino mai ē te pē'i i a rāua ki te toka.
6Kite akera rāua i te reira, kua 'oro kē atura rāua ki te 'ōire o Lūkaonia ra, ko Lūsētera ē Dērebe ē te au 'ōire katoa i reira a'o.
7Ē kua tūtū 'aere atura rāua i te 'ēvangelia ki reira.
Tei Lūsētera a Paulo rāua ko Bānaba8Tē no'o ra tēta'i tangata i Lūsētera ra, 'e vaevae parukā 'ua tōna, 'e pirikoki 'oki aia mei tōna 'ānau'anga mai, ē kāre rāi aia i 'aere'aere ake.
9Tē 'akarongo 'ua maira aia i a Paulo i te tuatua'anga mai. Kua tīroi matariki atura a Paulo ki aia. Kua nakiro a Paulo ē, 'e 'irinaki'anga tō taua tangata ra kia 'akaora'ia atu,
10kua nā kō atura aia ma te reo ma'ata, “E tū ki runga i tō vaevae!” Rere 'ua maira taua tangata ra ki runga, e 'ā'āere i'ora.
11E kite atura te urupū tangata ra i tā Paulo i rave ra, kua 'akateitei atura i tō rātou reo, ē kua nā kō akera i roto i te reo Lūkaonia, “Kua 'eke mai te au atua ki raro ki ō tātou nei mei te tangata nei rāi te tū.”
12Kua tapa akera rātou i a Bānaba ē, ko Dia, ē ko Paulo ra, ko Hēreme ia, nō te mea, ko ia te va'a tuatua.
13Tei va'o 'ua ake 'oki te marae o Dia i te 'ōire, ē kua arataki maira tōna ta'unga i te au puakatoro ma te au 'ei runga ra ki te ngūtupa ra. Kua 'inangaro akera 'oki aia ē te tangata katoa ra i te 'apai i te 'ātinga ki a rāua.
14Kite mākirikiri akera ngā 'āpōsetolo ra ko Bānaba ē Paulo i te reira, 'a'ae atura i tō rāua kāka'u, 'o'oro atura ki rotopū i taua au tangata ra, ma te kāpiki ma'ata, nā kō atura,
15Exo 20.11; Sal 146.6“E tama mā, 'e a'a tā kōtou e rave nei? 'E tangata 'ua rāi 'oki māua mei a kōtou katoa na te tū. Ē tē 'apai atu nei māua i te tuatua meitaki ki a kōtou, kia 'āriu kē atu kōtou mei taua au mea pu'apingakore nei ki te Atua ora ra, ko tei 'anga i te rangi ē te 'enua ē te tai ē te au mea rava rāi i roto ra.
16I muatangāna ra 'oki, kua 'akatika 'ua aia i te tangata rava rāi kia 'aere 'ua nā tō rātou 'ua'orāi au arāta'a.
17Kāre rā aia i ngere i te 'akaāri mai i aia 'ua'orāi nā roto i tōna au tākinga meitaki: nā roto 'oki i te 'ōronga'anga mai i te ua nō te rangi mai ē te tuātau mou, kua 'akakī aia i a kōtou ki te kai ē tō kōtou au ngākau ki te rekareka.”
18Noa atu rā tēianei au tuatua, koi rauka māri 'ua i a rāua i te ārai atu i te au tangata ra i te 'apai i te 'ātinga ki a rāua ra.
19Kua 'aere maira te Ngāti Iūda mei Ānētiōka mai ē Īkōnio, e oti akera te tangata rava rāi i te 'akanauru'ia e rātou, kua pē'i i'ora rātou i a Paulo ki te toka, e kika atura rātou i aia ki va'o i taua 'ōire ra i te manako'anga ē, kua mate tākiri aia.
20Ē kia koropini maira te au pipi i aia ra, kua tū 'ua maira aia ki runga, ē kua tomo atura ki roto i te 'ōire. E ao akera, 'aere atura rāua ko Bānaba ki Dērebe.
Tō Paulo rāua ko Bānaba 'oki'anga ki Ānētiōka i Sūria ra21E oti akera tā rāua tūtū 'aere'anga i te 'ēvangelia ki Dērebe ē te 'akariro'anga i te au tangata 'e mānganui 'ei au pipi, kua 'oki maira rāua ki Lūsētera, ki Īkōnio ē ki Ānētiōka.
22Ē kua 'akamātūtū atura rāua i te ngākau o te au pipi, ē kua 'akamāro'iro'i katoa atura i a rātou kia mou piri tikāi i te 'akarongo i te nā kō'anga atu ē, “Kia nā roto tātou i te au tūmatetenga 'e mānganui e tomo atu ei ki roto i te bāsileia o te Atua.”
23E oti akera i te 'akataka i te au tangata pakari i te 'ēkālēsia tātakita'i, kua pure rāua ma te 'akakore i te kai, ē kua tuku atura i a rātou ki te 'Atu tā rātou e 'irinaki ra.
24Kua 'aere atura rāua nā roto i te tu'anga 'enua ko Pisidia e tae maira ki te tu'anga 'enua ko Pāmephūlia.
25E oti akera i a rāua i te 'akakite i te karere i roto i te 'ōire ko Perege, 'aere atura rāua ki raro ki te 'ōire ko Ātālia.
26Ē mei reira 'oki, kua tere atura rāua ki Ānētiōka, te ngā'i mei reira mai 'oki rāua i tuku'ia atu ei ki te aro'a 'ua o te Atua nō te 'anga'anga tei oti ake nei i a rāua i te rave.
27E tae mai rāua ki reira, kua 'akaputuputu maira rāua i te 'ēkālēsia, ē kua 'akakite atura i te au mea rava rāi tā te Atua i rave nā roto i a rāua, ē tōna 'akatu'era'anga i te ngūtupa o te 'akarongo ki te au 'ētene ra.
28Ē kua roa tō rāua no'o'anga ki ō te au pipi ra.
Who We AreWhat We EelieveWhat We Do
2025 by iamachristian.org,Inc All rights reserved.
