Rōma 15 - Cook Island Maori Revised New Testament(CIMRNT)

E 'akarekareka atu'ia ēta'i kē, 'eia'a i a tātou anake 'ua

1Ko tātou ko tei māro'iro'i i te 'akarongo ra, kia 'akakoromaki tātou i te paruparu o te au māro'iro'ikore e tikāi, 'eia'a e 'akarekareka 'ua i a tātou 'ua'orāi.

2E 'akarekareka rā tātou tātakita'i i tōna tangata tupu kia meitaki aia ē kia māro'iro'i atu tōna 'akarongo.

3Sal 69.9Kāre katoa 'oki te Mesia i 'akarekareka 'ua i aia 'ua'orāi; māri rā, kua tupu tei tātā'ia ra ē, “Ko te au 'akakino'anga a te aronga tei 'akakino mai i a koe ra, kua 'iri mai ia ki runga i āku nei.”

4Ko te au tuatua rava rāi 'oki i tātā'ia i muatangāna ra, i tātā'ia ia 'ei 'āpi'i'anga i a tātou kia rauka i a tātou te mānakonako'anga nā roto i te 'akakoromaki'anga ē te 'akamāro'iro'i'anga mei roto mai i te tuatua i tātā'ia ra.

5Ē tēianei, kia 'ōronga mai te Atua, tei aia te 'akakoromaki ē te 'akamāro'iro'i, i te ngākau 'okota'i i roto i a kōtou 'ua'orāi, mei tei tau ki tā te Mesia ra i a Iēsū,

6kia 'akakakā kōtou i te Atua, te Metua o tō tātou 'Atu ra ko Iēsū Mesia ma te ngākau 'okota'i ē te va'a 'okota'i.

Te 'ēvangelia nō te Ngāti Iūda ē nō te 'ētene katoa

7Ē tēianei, e 'āriki atu kōtou tēta'i ē tēta'i, mei te Mesia i 'āriki mai i a kōtou na nō te kakā o te Atua.

8Tē 'akakite atu nei au ki a kōtou ē, kua riro mai te Mesia 'ei tāvini nō te Ngāti Iūda nō runga i te tūranga tūkēkore o te Atua, kia tupu tāna i papa'u mai ki te 'ui tupuna ra

92 Sam 22.50; Sal 18.49ē kia rauka katoa i te au 'ētene i te 'akakakā i te Atua nō tōna aro'a, mei tei tātā'ia ra ē,

“Nō reira, e 'akameitaki au i a koe i rotopū i te au 'ētene ra;

e 'īmene 'akapa'apa'a rāi au i tō'ou ingoa.”

10 Deut 32.43 Tē nā kō ra 'oki,

“E rekareka, e te au 'ētene, ē tōna katoa ra 'iti tangata.”

11 Sal 117.1 Ē tē nā kō 'aka'ou ra 'oki,

“E 'akameitaki atu i te 'Atu, e te au 'ētene katoa ē;

e 'akapa'apa'a atu i aia, e te au 'iti tangata katoa na.”

12 Isa 11.10 Tē nā kō 'aka'ou maira 'oki a Īsaia,

“E tupu mai te aka o Iēse;

ē ko ia te ka tū mai 'ei ariki nō te au 'ētene,

ē 'ei aia te mānakonako'anga o te au 'ētene ra.”

13Kia tika i te Atua, te tumu o tō kōtou mānakonako'anga, kia 'akakī'ia mai kōtou ki te au rekareka rava rāi ē te 'au, nō te mea, kua 'irinaki kōtou i aia; ē kia māringiringi 'ua mai te mānakonako'anga mei roto mai i a kōtou, nā roto i te mana o te Vaerua Tapu ra.

Tā Paulo tātā'anga pakari

14E aku au taeake ē, kua pāpū tikāi i āku 'ua'orāi, kua kī kōtou i te meitaki ē te au kite rava rāi, ē ka rauka rāi i a kōtou kia tauturu atu tēta'i i tēta'i i te pae o te 'akarongo.

15-16Kua tātā atu au ki a kōtou ma te matakukore nō runga i ēta'i mea, mei te mea atura ē, 'e 'akamā'ara'ara 'aka'ou'anga atu i a kōtou ē, kua riro mai au 'ei tāvini nō te Mesia ra ko Iēsū ki te au 'ētene, nō te aro'a 'ua o te Atua i 'ōronga'ia mai ki āku nei, nō te 'anga'anga ta'unga 'oki o te 'ēvangelia a te Atua, kia riro mai te au 'ētene 'ei 'ātinga 'āriki'ia e te Atua, i 'akatapu'ia e te Vaerua Tapu.

17Ē nō reira, tē ngākau parau nei au i tōku tāvini'anga i te Atua ra nō tōku piri'anga ki te Mesia ra i a Iēsū.

18Ka tuatua 'ua atu au ma te matakukore nō runga i te au mea anake, tā te Mesia i oti i te rave nā roto atu i āku nei, kia kauraro te au 'ētene i te Atua. Kua rave'ia te reira nā roto i tāku i tuatua atu, ē i tāku i rave,

19ē nā roto katoa 'oki i te mana o te au 'akairo ē te au mea ūmeremere'ia, ma te mana o te Vaerua o te Atua. Ē nō reira, kua 'akakite pū 'ua au i te 'ēvangelia o te Mesia mei Iērūsalēma mai i te 'akapini 'aere'anga e tae rava ake nei ki Iliriko.

20Koia tikāi ia, i umuumu pakari tikāi ana au kia tūtū atu au i te 'ēvangelia ki te au ngā'i kāre i kite ake i te ingoa o te Mesia ra, kia kore 'oki au e patu atu ki runga i tā tēta'i kē atu tango.

21Isa 52.15Mei tei tātā'ia ra 'oki ē,

“Ko rātou tei kore te Mesia i 'akakite'ia atu ana, ka 'ākara rātou;

ē ko rātou tei kore i 'akarongo ake, ka nakiro rātou.”

Te manako o Paulo nō te 'aere atu ki Rōma

22 Rōm 1.13 Nō reira 'oki au i roa ai, i kore ei i 'aere vave atu ki a kōtou na.

23I tēianei rā, kua oti tāku 'anga'anga i ēia tu'anga 'enua nei, ē nō te mea 'oki ē, 'e 'inangaro ma'ata tōku 'e mānganui ake nei te mata'iti i te 'ārāvei atu i a kōtou na,

24mē 'aere atu au ki Hisepānia, ka 'inangaro au i te 'ārāvei i a kōtou, nō te mea 'oki, ka nā Rōma atu au, ē ka 'inangaro rāi au kia tauturu mai kōtou i tōku 'aere'anga atu ki Hisepānia, i muri ake rā i tōku no'ono'o'anga poto ē te mataora ki ō kōtou na.

251 Kōr 16.1-4Tē 'aere nei rā au i tēianei ki Iērūsalēma, e tauturu atu i te aronga tapu i reira.

26Kua rekareka 'oki tō Mākedōnia ē tō Ākaia i te 'ātinga 'ei tauturu atu i te aronga 'apingakore i roto i te aronga tapu i Iērūsalēma ra.

271 Kōr 9.11Kua rekareka tikāi rātou i te rave i te reira. Kua tano rāi 'oki; 'e kaio'u 'oki rātou nā te Ngāti Iūda. Nō te mea 'oki ē, kua tauturu te Ngāti Iūda i te au 'ētene ki tō rātou 'akameitaki'anga ora'anga vaerua. 'E mea tau rāi i reira kia tauturu atu te au 'ētene i te Ngāti Iūda ki tō rātou 'akameitaki'anga ora'anga kōpapa.

28Kia oti i āku tēia 'anga'anga nei, koia 'oki i te 'akapāpū ē, kua tae tā rātou tauturu ki reira, ka 'aere atu ei au ki Hisepānia ra nā kō na atu i a kōtou na.

29Kua kite tikāi 'oki au ē, mē tae atu au ki a kōtou na, ka tae atu au ma te kī tikāi i te 'akameitaki'anga nō kō mai i te Mesia ra.

30E te au taeake, tē ako atu nei rā au i a kōtou i te 'Atu ra i a Iēsū Mesia ē te aro'a nō kō mai i te Vaerua ra, kia kāpiti mai kōtou rava rāi i tāku pure'anga ki te Atua nōku nei.

31E pure kia pāruru'ia mai au mei te aronga 'akarongokore i Iūdea ra; ē ko tāku ka rave ki Iērūsalēma ra, kia 'āriki meitaki'ia mai e te aronga tapu;

32ē e pure kia tika i te Atua ra kia tae atu au ki a kōtou na ma te rekareka, ē kia 'akangāro'i poto au ki ō kōtou na.

33'Ei a kōtou kātoatoa na te Atua, te tumu o te 'au. Āmene.