Mātaio 27 - Cook Island Maori Revised New Testament(CIMRNT)

Kua arataki'ia a Iēsū ki a Pilato(Māreko 15.1; Luka 23.1-2; Ioane 18.28-32)

1Ē i te pōpongi roa ra, kua kotikoti kupenga i'ora te kau ta'unga nunui kātoatoa ē te aronga pakari o te 'iti tangata ra ē kia tāmate'ia a Iēsū.

2E oti akera aia i te rī'ia, kua arataki kē atura rātou i aia, ē kua tuku atura i aia ki te tūtara ki a Ponotio Pilato.

Te matenga o Iūda('Anga'anga 1.18-19)

3 Anga 1.18,19 E kite akera a Iūda i tuku pikika'a i a Iēsū ra ē, kua 'aka'apa'ia aia, kua tatarā'ara i'ora aia, kua 'aka'oki atura i te moni 'ārio e toru nga'uru ki te kau ta'unga nunui ē te aronga pakari ra,

4nā kō atura, “Kua 'ara au i te tuku pikika'a'anga atu i te tangata 'arakore nei.”

Kua tuatua maira rātou, “'E a'a 'ua 'oki ki a mātou? Tei a koe anake 'ua.”

5Kua titiri i'ora aia i te au moni 'ārio ki raro i roto i te nao, 'oro kē atura, 'aere atura aia ki va'o, 'akanono'a i'ora i aia 'ua'orāi.

6Kua rave i'ora te kau ta'unga nunui i te moni 'ārio, nā kō akera, “Kāre e tika i te Ture kia tuku i tēia moni ki roto i te pi'a moni tapu nei, i te mea ē, 'e moni 'oko toto tēia.”

7Kua kimikimi manako i'ora rātou, ē kua 'oko maira i te kāinga o te tangata ma'ani pōtera ra 'ei tanumanga nō te au manu'iri.

8Nō reira i tapa'ia ai taua kāinga ra ē, ko te “Kāinga ā Toto”, e tae roa ake nei ki tēianei rā.

9 Zek 11.12,13 I reira te tupu'anga o te tuatua a te peroveta Iēremia i te nā kō'anga maira ē, “Kua rave i'ora rātou i te moni 'ārio e toru nga'uru ra, ko te 'oko i 'akatau'ia nōna e te tamariki a Īserā'ela, 'ei 'oko i aia ra,

10ē kua tāo'i rātou i te reira 'ei 'oko i te kāinga o te tangata ma'ani pōtera ra, mei tā te 'Atu 'oki i 'akaue mai i āku ra.”

Tē uiui'ia nei a Iēsū e Pilato(Māreko 15.2-5; Luka 23.3-5; Ioane 18.33-38)

11Kua tū atura a Iēsū ki mua i te aroaro o te tūtara ra, ē kua ui maira a Pilato ki aia, nā kō maira, “Ko te ariki āinei koe o te Ngāti Iūda?”

Kua pa'u atura a Iēsū ki aia, “Ko tā'au ia e tuatua maina.”

12Kia tāpepe'ia mai rā aia e te kau ta'unga nunui ē te aronga pakari ra, kāre aia i pa'u 'ua atu.

13I reira, kua tuatua maira a Pilato ki aia, “Kāre āinei koe e 'akarongo ana i te au mea 'e mānganui tā rātou e tāpepe maina i a koe nei?”

14Kāre roa aia i kī 'ua atu 'e 'okota'i tuatua. Kua vā ma'ata 'ua atura te tūtara.

Tē 'akautunga'ia nei a Iēsū ki te mate(Māreko 15.6-15; Luka 23.13-25; Ioane 18.39—19.16)

15'E peu 'oki nā te tūtara, kia tae ki te rā 'ōro'a ra, i te tuku atu i tēta'i tangata mou'āuri ki te urupū tangata tei 'inangaro'ia e rātou.

16Tē vai ra 'oki i reira tēta'i mou'āuri rongorongoā, ko Bāraba te ingoa.

17Ē kia putuputu maira te aronga i tāpepe i a Iēsū, kua ui atura a Pilato ki a rātou, “Ko 'ai tā kōtou e 'inangaro kia tuku atu au ki a kōtou, ko Bāraba āina, mē ko Iēsū āina, ko tei karanga'ia ē ko te Mesia?”

18Kua kite 'oki aia ē, nō te vare'ae i tuku mai ei rātou i a Iēsū.

19Ē tē no'o ra aia ki runga i te no'o'anga 'akavā'anga ra, kua tono maira tāna va'ine i te karere ki aia, nā kō maira, “Auraka roa koe e rave 'ua atu i tēnā na tangata 'arakore. Kua tupu 'oki te tūmatetenga ma'ata ki āku inapō i roto i tōku moemoeā'anga i aia.”

20Kua 'akanauru atura te kau ta'unga nunui ē te aronga pakari i te au urupū tangata ra ē, kia pati rātou i a Bāraba, ē kia tā'ia atu a Iēsū.

21Ē kua ui maira te tūtara ki a rātou, nā kō maira, “Ko tē'ea i ngā tangata tokorua nei, tā kōtou e 'inangaro kia tuku atu au ki a kōtou na?”

Kua nā kō atura rātou, “Ko Bāraba!”

22Kua karanga maira a Pilato ki a rātou, “E 'akapē'ea atu au i reira i a Iēsū, ko tei karanga'ia ē ko te Mesia?”

Kua kāpiki atura rātou kātoatoa ki aia, “Kia 'akasātauro'ia atu aia!”

23Kua nā kō maira te tūtara, “'E a'a 'oki tāna 'anga'anga kino i rave?”

Inārā, kua ma'ata 'ua atura tā rātou kāpikipiki'anga, nā kō atura, “Kia 'akasātauro'ia atu aia!”

24 Deut 21.6-9 E kite akera a Pilato ē, kāre 'e tika e rauka mai, māri 'ua 'e 'ōrure'au ma'ata te ka tupu mai, kua rave i'ora aia i te vai, kua 'ōrei i'ora i ōna rima ki mua a'o i te urupū tangata ra, nā kō maira, “Kāre āku 'ara i te toto o tēianei tangata. Ko kōtou rāi ka kite.”

25Kua pa'u atura te tangata kātoatoa, nā kō atura, “'Ei runga a'o i a mātou tōna toto ē tā mātou au tamariki!”

26I reira, kua tuku maira a Pilato i a Bāraba ki a rātou; inārā, kua tuku mai aia i a Iēsū kia 'akasātauro'ia, kia oti rā i te pāpā'ia.

Tē 'āviri nei te au va'e'au i a Iēsū(Māreko 15.16-20; Ioane 19.2-3)

27I reira kua arataki atura te au va'e'au o te tūtara i a Iēsū ki roto i te ngā'i 'akavā'anga ra, ē kua 'akaputuputu maira i te pupu va'e'au katoa ra ki tōna pae.

28Kua kīritiriti i'ora rātou i tōna kāka'u, ē kua 'akakāka'u maira i aia ki te kāka'u kutekute ra.

29Kua 'iri i'ora rātou i tēta'i 'ei nō roto mai i te rākau taratara ra, kua tuku maira ki runga a'o i tōna ūpoko, ē i tēta'i kāka'o ki tōna rima katau ra; tuturi i'ora ki mua a'o i aia, ē kua 'āviri maira rātou i aia, nā kō maira, “Kia orana, e te Ariki o te Ngāti Iūda ē!”

30Kua tūtu'a maira i te 'uāvare ki runga a'o i aia, rave maira i te kāka'o ra, ē kua ruturutu 'aere atura i tōna ūpoko.

31E oti akera tā rātou 'āviri'anga mai i aia, kua kiriti i'ora rātou i taua kāka'u ra, ē kua 'akakāka'u i'ora i aia ki tōna 'ua'orāi kāka'u, ē kua arataki atura i aia kia 'akasātauro'ia.

Te 'akasātauro'anga'ia a Iēsū(Māreko 15.21-32; Luka 23.26-43; Ioane 19.17-27)

32Ē tē 'aere atura te au va'e'au ki va'o ra, 'ārāvei atura rātou i tēta'i tangata Kurene, ko Simona te ingoa. Kua 'akaue atura rātou i aia e 'apai i tō Iēsū sātauro.

33E tae atura rātou ki tēta'i ngā'i i karanga'ia ē ko Golagota, koia 'oki, “Te ngā'i katu tangata.”

34Sal 69.21Kua 'apai atura rātou i te uaina i 'irokia ki te au ki a Iēsū ra kia inu aia. Kia tāmata rā aia, kāre aia i keu i te inu.

35 Sal 22.18 E oti akera aia i te 'akasātauro'ia, kua tu'a i'ora rātou i tōna kāka'u nā roto i te tuku kērero'anga,

36no'o i'ora rātou ki raro, tiaki i'ora i aia.

37Kua tuku atura rātou ki runga a'o ake i tōna ūpoko i te tumu o tōna tāpepe'anga tei tātā'ia ra ē, “Ko Iēsū tēia, te Ariki o te Ngāti Iūda.”

38Tei reira katoa e rua tangata keikeiā tei 'akasātauro'ia ma ia katoa, e ta'i ki te pae katau i aia, e ta'i ki te pae kaui.

39 Sal 22.7; 109.25 Ē te au tangata i 'aere nā reira a'o ra, kua 'akakino maira rātou i aia ma te tākirikiri i tō rātou ūpoko,

40Māt 26.61; Ioa 2.19nā kō maira, “Ko tei vāvā'i i te nao ē, ē ka oti i te 'akatū 'aka'ou i te pō toru anake! E 'akaora i a koe 'ua'orāi, mē ko te Tamaiti a te Atua koe na, ē ka 'eke mai ki raro mei te sātauro mai!”

41Mei te reira katoa te kau ta'unga nunui, te au Pū'āpi'i Ture ē te aronga pakari ra i te 'āviri'anga mai i a Iēsū, nā kō maira,

42“Kua 'akaora aia i ēta'i kē ra, kāre rā e rauka i aia i te 'akaora i aia 'ua'orāi. Ko ia te Ariki o Īserā'ela, kia 'eke mai aia i tēianei mei runga mai i te sātauro, ē ka 'irinaki atu mātou i aia!

43Sal 22.8Kua 'irinaki 'oki aia ki te Atua! Kia 'akaora te Atua i aia i tēianei, mē ka anoano'ia aia e te Atua. Nāna rāi 'oki i karanga ē, ‘Ko au te Tamaiti a te Atua.’ ”

44Ē ko ngā tangata keikeiā 'oki i 'akasātauro'ia ma ia katoa ra, kua 'akapērā katoa i te 'akakino'anga mai i aia ra.

Te matenga o Iēsū(Māreko 15.33-41; Luka 23.44-49; Ioane 19.28-30)

45Ē mei te avatea pū mai rāi, e tae 'ua atura ki te ora toru ra, kua kako rava akera te 'enua kātoatoa i te pōiri.

46Sal 22.1Ē mei te ora toru ra, kua kāpiki atura a Iēsū ma te reo ma'ata, nā kō atura, “Ēli, Ēli, lāma sābākatani?” koia 'oki, “E taku Atua, e taku Atua, 'e a'a koe i 'akaruke mai ei i āku?”

47Ē kia 'akarongo ēta'i aronga e tū 'ua ra i reira ra, kua nā kō akera, “Tē kāpiki nei tēia tangata i a Ēlia.”

48Sal 69.21I taua 'ati'anga rāi, kua 'oro atura tēta'i i ō rātou ra, kua rave atura i tēta'i rimu, ē kua 'akakī atura ki te vinika, tōpiri i'ora ki runga i tēta'i kāka'o, 'apai atura kia inu aia.

49Kua nā kō akera rā tēta'i pae, “'Eia'a, e 'ākara ana tātou ē, mē ka 'aere mai rāi a Ēlia e 'akaora i aia.”

50Kua kāpiki 'aka'ou atura a Iēsū ma te reo ma'ata, ē kua tuku atura i te vaerua.

51 Exo 26.31-33 Ē inā, kua nga'ae i'ora te ārai o te nao ra mei runga mai e raro rava. Kua ngāruerue i'ora te 'enua ē nga'anga'ā atura te au toka.

52Ma'eu akera te au mēnema ra. Ē kua tū maira te au kōpapa o te aronga tapu i moe ra 'e mānganui.

53Ē kua 'aere maira rātou ki va'o mei roto mai i te au mēnema ra i muri ake i tōna tū'aka'ou'anga, ē kua tomo atura ki roto i te 'ōire tapu, ē kua kitea'ia mai rātou e te tangata 'e mānganui.

54Ko te rangatira 'ānere ra ē rātou katoa e tiaki ra i a Iēsū ra, i te kite'anga i te ngāruerue'anga 'enua ē te au mea i tupu ra, roko'ia i'ora rātou e te mataku ma'ata, ē kua nā kō i'ora, “Ko te Tamaiti tikāi tēia a te Atua!”

55 Luk 8.2,3 'E mānganui 'oki te au va'ine i reira i te 'ākarakara'anga mai mei te ātea kē ra, ko tei āru mai i a Iēsū mei Galilea maira ma te mātuāpuru katoa mai ki aia ra.

56Tei roto 'oki i a rātou a Māria i Māgadala, ē Māria te metua va'ine o Iākōbo rāua ko Iōse ra, ē te metua va'ine 'oki o ngā tamariki a Zebedaio ra.

Te tanumanga o Iēsū(Māreko 15.42-47; Luka 23.50-56; Ioane 19.38-42)

57E a'ia'i i'ora, kua 'aere maira tēta'i tangata 'apinga nui nō Ārīmātea mai, ko Iōsēpha te ingoa ē te pipi katoa 'oki aia nā Iēsū,

58kua 'aere atura aia ki a Pilato, ē kua pati atura i te kōpapa o Iēsū. I reira kua 'akaue atura a Pilato kia tuku'ia mai te kōpapa.

59Kua rave atura a Iōsēpha i te reira, ē kua 'opa i'ora ki te kāka'u 'ōrongā mā ra,

60ē kua tuku atura ki roto i tōna 'ua'orāi mēnema 'ōu i pao'ia e ia ki roto i te mato. Kua pōtaka atura aia i tēta'i toka ma'atama'ata ki te ngūtupa o te mēnema ra, 'aere atura.

61Tei reira katoa 'oki a Māria i Māgadala, ē tēta'i Māria katoa, i te no'o'anga i mua i te tanumanga ra.

Te tiaki i te mēnema ra

62E pōpongi akera, koia 'oki i muringa a'o i te rā 'akate'ate'amamao'anga ra, kua putuputu maira te kau ta'unga nunui ē te au Phārīsea ra ki a Pilato,

63Māt 16.21; 17.23; 20.19; Mār 8.31; 9.31; 10.33,34; Luk 9.22; 18.31-33nā kō maira, “E te 'atu, kua ma'ara i a mātou ē, kua tuatua ana taua tangata pikika'a ra i te ora'anga a ia ra ē, ‘I muri ake i te pō toru, ka tū 'aka'ou au ki runga.’

64Ē nō reira, e 'akaue ake koe kia tiaki meitaki'ia te tanumanga kia tae ki te toru o te pō, kia kore tāna au pipi e 'aere mai e keiā atu i aia, ē te nā kō'anga atu ki te tangata tini ē, kua tū 'aka'ou mai aia mei tei mate maira. Ē ka kino ma'ata atu te pikika'a'anga 'openga i tō tei muatangāna ra.”

65Kua karanga atura a Pilato ki a rātou, “'E pupu tiaki 'oki tō kōtou. E 'aere atu, e tiaki meitaki ki tā kōtou 'inangaro ra.”

66'Aere atura rātou, e tiaki meitaki atura i te tanumanga ra, koropini atura i te toka ki te au tiaki.