2 Tesalōnia 3 - Cook Island Maori Revised New Testament(CIMRNT)

E pure i a mātou

1'Ei tā'openga, e te au taeake, e pure kōtou i a mātou kia toto'a viviki te karere nō runga i te 'Atu ē kia 'akangāteitei'ia, mei tei ō kōtou na,

2ē auraka mātou kia tāmanamanatā'ia mai e te aronga kikino roa. Kāre 'oki i 'ope kātoatoa te tangata i te 'āriki i te karere.

3E 'irinaki'ia rā te Atu, nāna e 'akamātūtū ē e pāruru i a kōtou i te Mea Kino.

4'E mea pāpū 'oki i a mātou i roto i te 'Atu ē, tē rave nei kōtou ē ka rave rāi kōtou i tā mātou i 'akaue atu ki a kōtou na.

5Kia arataki te 'Atu i a kōtou kia ma'ata atu tō kōtou mārama i te aro'a o te Atua ē te 'akakoromaki o te Mesia ra.

Te 'akamatakite'anga i te aronga no'o 'anga'angakore 'ua

6Tē 'akaue atu nei mātou i a kōtou, e te au taeake, i te ingoa o tō tātou 'Atu ra ko Iēsū Mesia, e 'akatakakē mai kōtou i a kōtou mei te au taeake rava rāi tei no'o 'anga'angakore 'ua, ē kāre i āru i te 'āpi'i'anga tā rātou i rauka mai nō konei atu i a mātou.

7Ko kōtou, kua nakiro 'oki kōtou ē, ko te tika'anga tikāi kia āru kōtou i a mātou. Kāre 'oki mātou i no'o 'anga'angakore 'ua i ō kōtou na.

8Kāre katoa mātou i kai i tā ēta'i kē ra kai ma te tūtakikore. Kua 'anga'anga pakari rā mātou ma te ro'iro'ikore i te pō ē te ao kia kore mātou e riro 'ei 'apainga ki tēta'i o kōtou na.

9Kāre rā mei te mea ē, kāre ō mātou tika'anga kia pērā. Kua 'inangaro rā mātou i te tuku atu i a mātou 'ei 'ākara'anga nō kōtou i te āru mai.

10I a mātou 'oki i no'o i ō kōtou na kua mātau mātou i te 'akakite atu ki a kōtou ē, ko te tangata kāre e rave i te 'anga'anga, auraka katoa aia e kaikai.

11Tē 'akarongo nei 'oki mātou ē, tē no'o 'anga'angakore 'ua ana tēta'i pāpāki o kōtou na. Kāre rātou 'ua'orāi e rave i tēta'i 'anga'anga, tē tāmanamanatā nei rā rātou i te 'anga'anga a ēta'i kē ra.

12I te ingoa o te 'Atu ra, ko Iēsū Mesia, tē 'akaue atu nei ē tē 'akamāro'iro'i atu nei mātou i te aronga tē pērā ra, kia rave mārie rātou i tēta'i 'anga'anga nā rātou 'ua'orāi ka kai ei i tā rātou 'ua'orāi kai.

13Ko kōtou ra, e te au taeake, auraka kōtou e ro'iro'i i te rave i te meitaki.

14Mē 'e tangata tēta'i kāre e kauraro i tā mātou 'āpi'i'anga i roto i tēia leta nei, e matakite i te reira tū tangata. Auraka e kāpiti atu ki aia kia 'akamā aia.

15Auraka rā e 'akariro i aia mei tēta'i 'enemi, e ako rā i aia mei te taeake ra.

Te ve'eve'e'anga aro'a

16Nā te 'Atu 'ua'orāi, te tumu o te 'au, e 'ōronga mai i te 'au ki a kōtou i te au 'ati'anga rava rāi nā roto i te au rāvenga rava rāi. 'Ei a kōtou kātoatoa te 'Atu.

17Ko au, ko Paulo, tei tātā i tēia aro'a'anga ki tōku 'ua'orāi rima, ē ko tāku 'akairo takakē ia i roto i tāku au leta kātoatoa. I pērā tāku tātā'anga.

18'Ei a kōtou kātoatoa te aro'a 'ua o tō tātou 'Atu ra ko Iēsū Mesia.