1 Tesalōnia 2 - Cook Island Maori Revised New Testament(CIMRNT)

Tā Paulo 'anga'anga 'ēvangelia i Tēsālōnia

1E te au taeake ē, kua nakiro kōtou ē kāre tō mātou ō'anga atu i rotopū i a kōtou na i riro 'ei mea pu'apingakore.

2a: Anga 16.19-24; b: Anga 17.1-9Noa atu ē i mate 'ua mātou ē i 'akakino'ia i Philipi i mua ake, mei tā kōtou i mārama, kua tūtū 'aere rāi mātou i te 'ēvangelia nō kō mai i te Atua ki a kōtou na ma te māro'iro'i ma'ata. Kua 'ōronga mai tō tātou Atua i te reira ki a mātou i roto rāi i te taumārōrō ma'ata.

3Kāre 'oki tā mātou ako'anga ki a kōtou nō te tā'ē'ē, te 'akakoro'anga taukore, mē kāre te tāpikipiki.

4Kua tuatua rā mātou mei te tangata tā te Atua i 'iki e tau kia tuku atu i tāna karere ki a rātou. Ē kāre mātou i kimikimi i te 'akarekareka i te tangata, i te Atua rā tei kimi matatio i tō mātou ngākau.

5Kāre 'ua 'oki a mātou tuatua kōperepere, mei tā kōtou i mārama. Ē kāre tākiri ō mātou tū noinoi 'apinga; ko te Atua 'oki te kite!

6Ē kāre katoa mātou i kimi i te 'akangāteitei'anga nō kō mai i te tangata, mē kāre nō kō mai i a kōtou, mē kāre nō kō mai i te aronga kē atu,

7noa atu ē, 'e tika'anga tō mātou i tō mātou tūranga 'āpōsetolo a te Mesia kia tuku i te 'apainga ki runga i a kōtou. Inārā, kua marū 'ua mātou i rotopū i a kōtou, mei te metua va'ine e mātuāpuru nei i tāna tamariki.

8Kua aro'a ma'ata 'oki mātou i a kōtou, ē kua mareka mātou i te tuku atu ki a kōtou i te tuatua meitaki nō kō mai i te Atua. Ē kua tuku katoa mātou i tō mātou 'ua'orāi ora'anga ki a kōtou, nō te mea, kua 'akaperepere ma'ata tikāi mātou i a kōtou.

9Kāre 'oki e ngaro i a kōtou, e te au taeake, tā mātou 'anga'anga ma'ata ē te ro'iro'i. I te pō ē te ao 'oki i rave ei mātou i te 'anga'anga kia kore mātou e riro 'ei 'apainga ki tēta'i ō kōtou na i tā mātou tūtū 'aere'anga i te 'ēvangelia a te Atua ki a kōtou na.

10Ko kōtou tō mātou kite, ē te Atua katoa 'oki, i tō mātou tū meitaki ē te tika ē te 'apakore i rotopū i a kōtou, te aronga 'akarongo.

11Tē nakiro nei kōtou ē, kua 'ākono mātou i a kōtou tātakita'i, mei te metua tāne i tāna 'ua'orāi tamariki.

12Kua 'akamāro'iro'i, kua 'akapūma'ana ē kua ako pakari atu mātou i a kōtou kia tau tō kōtou 'aerenga ki tō te Atua tei kāpiki mai i a kōtou ki tōna bāsileia ē tōna kakā.

13Ē tē 'akameitaki katoa nei mātou i te Atua ma te tīvatakore, nō te mea, i tō kōtou rongo'anga i tā mātou ako'anga i te tuatua a te Atua, kāre kōtou i 'āriki i te reira 'ei tuatua tangata, 'ei tuatua rā nō kō mai i te Atua. Ē koia tikāi rāi ia! Ē tē 'anga'anga nei rāi taua tuatua ra i rotopū i a kōtou tei 'irinaki i te reira.

14Anga 17.5Ko kōtou 'oki, e te au taeake, kua riro mai kōtou mei te au 'ēkālēsia a te Atua i Iūdea, koia 'oki, te aronga i reira tei piri ki te Mesia ra i a Iēsū. Kua tāmamae'ia 'oki kōtou e tō kōtou 'ua'orāi 'iti tangata mei a rātou rāi i tāmamae'ia e te au Ngāti Iūda,

15Anga 9.23,29; 13.45,50; 14.2,5,19; 17.5,13; 18.12tei tā i te 'Atu ra i a Iēsū ē te au peroveta, ē tei tākinga kino mai i a mātou nei. E marekakore 'oki rātou i te Atua! 'E au 'enemi rātou nō te au tangata rava rāi.

16Ē tē ārairai nei rātou i a mātou kia kore mātou e ako atu ki te au 'ētene kia rauka i a rātou te rāvenga ora. Ko te 'akaoti'anga 'oki tēia o te au 'ara tā rātou i mātau i te rave. Ē i te 'openga i'ora, kua tae mai te riri o te Atua ki runga i a rātou.

Tē 'inangaro nei a Paulo i te 'ārāvei 'aka'ou i tō Tēsālōnia

17Ko mātou nei, e te au taeake, kua 'akatakakē'ia ake nei mātou i tēta'i roa iti 'ua ake mei a kōtou na, i te pae kōpapa 'ua te reira, kāre rā i te ngākau. Kua umuumu pakari tikāi mātou ma te 'inangaro ma'ata i te kite 'aka'ou i tō kōtou mata.

18Kua tautā pakari mātou i te 'aere 'aka'ou atu ki a kōtou na. Ko au, ko Paulo, kua tāmata au ē kua tāmata 'aka'ou rāi au. Nā Sātani rā i ārai i'o i a mātou nei.

19Ko 'ai 'oki te tumu o tō mātou mānakonako'anga ē tō mātou rekareka'anga, ē ko 'ai te korōna o tō mātou 'akaparau'anga i mua i tō tātou 'Atu ra ko Iēsū i tōna tae'anga mai, māri rā ko kōtou?

20Ko kōtou 'oki te tumu o tō mātou kakā ē te rekareka.