1 Kōrīnētia 10 - Cook Island Maori Revised New Testament(CIMRNT)

E 'akamatakite'anga nō te 'akamori 'ītoro

1 a: Exo 13.21,22; b: Exo 14.22-29 E te au taeake ē, tē 'inangaro nei 'oki au kia 'akama'ara meitaki kōtou ē, i raro ake tō tātou 'ui tupuna rava rāi i te tumurangi ē kua 'aere rātou kātoatoa nā raro i te Tai Muramura.

2Ē i roto i te tumurangi ē te tai 'oki i bāpetīto'ia ai rātou kātoatoa ki roto i te tā'okota'i'anga ki a Mōse.

3Exo 16.35Kua kai kāpiti rātou kātoatoa i te mānga vaerua ra,

4Exo 17.6; Num 20.11ē kua inu kāpiti rātou i te vai vaerua ra, nō te mea, kua inu rātou i te vai nā roto mai i te mato vaerua i āru i a rātou ra, ē taua mato ra ko te Mesia 'oki ia.

5Num 14.29,30Kāre rā te Atua i mareka i te ra'i o rātou ra; kua tanumia i'ora rātou i te mētēpara ra i tērā ngā'i ē i tērā ngā'i.

6 Num 11.4 Kua riro taua au mea ra 'ei 'ākara'anga nā tātou ē 'ei 'akamatakite'anga kia kore tātou e noinoi i te au mea kikino ra, mei a rātou i noinoi ra.

7Exo 32.6Auraka katoa e 'akariro i a kōtou 'ei aronga 'akamori 'ītoro, mei tēta'i pāpāki o rātou ra, mei tei tātā'ia ra ē, “Kua no'o te tangata ki raro, kua kai ē kua inu 'oki, ē kua tū akera ki runga ē kua 'ura mārikongakore rātou.”

8Num 25.1-18Auraka katoa tātou e kanga vi'ivi'i, mei tēta'i pāpāki o rātou i kanga vi'ivi'i ra, ē mate i'ora e rua nga'uru mā toru tauatini i te rā 'okota'i ra.

9Num 21.5,6Auraka katoa tātou e tīmata atu i te 'Atu, mei tēta'i pāpāki o rātou i tīmata ra, ē kua mate i'ora rātou i te au 'ōvī.

10Num 16.41-49Auraka katoa kōtou e uruto'e, mei tēta'i pāpāki o rātou i uruto'e ra, ē kua mate i'ora rātou i te 'āngela o te mate ra.

11Kua tupu taua au mea ki a rātou ra 'ei 'ākara'anga; kua tātā'ia rā 'ei 'akamatakite'anga i a tātou, i te aronga e ora ra i te 'openga o te au tuātau nei.

12Ē tēianei, ko te tangata e manako ra ē, tē tū ra aia, kia matakite aia ko te 'inga ā'ea aia.

13Kāre kōtou i roko'ia e tēta'i tīmata'anga, māri rā, mei tā te tangata nei rāi i mātau. 'E tika kia 'irinaki'ia te Atua, tei kore e 'akatika kia tīmata'ia mai kōtou i runga ake i tō kōtou kōtinga 'akakoromaki, ko tei 'ōronga katoa rā i te rāvenga ma te tīmata'anga, kia rauka i a kōtou kia 'akakoromaki.

14Nō reira, e aku au 'akaperepere ē, e rere kē atu i te 'akamori 'ītoro.

15Tē tuatua atu nei au ki a kōtou mei āku i tuatua atu ki te tangata pakari; nā kōtou 'ua'orāi e kimi i te tika o tāku nei tuatua.

16Māt 26.26-28; Mār 14.22-24; Luk 22.19,20Te kapu nō te 'akameitaki'anga tā tātou e 'akameitaki nei, kāre āina ia i te kāpiti'anga ki te toto o te Mesia nei? Te varāoa tā tātou e 'ati'ati nei, kāre āina ia i te kāpiti'anga ki te kōpapa o te Mesia nei?

17Nō te mea, 'okota'i anake rāi varāoa, ko tātou pou roa 'okota'i rāi ia kōpapa, noa atu ē 'e mānganui rāi tātou; tē kai kātoatoa nei rā 'oki tātou i taua varāoa 'okota'i ra.

18 Lev 7.6 E 'ākara i te 'iti tangata Īserā'ela. Kāre āina te aronga i kai i te 'ātinga, i te aronga i raverave i tō te 'atarau ra?

19'E a'a te 'āite'anga o tēia tuatua nāku? 'E mea tika tikāi āina te 'ātinga nā te 'ītoro ra? 'E mea tika tikāi āina te 'ītoro?

20Deut 32.17Tēia rā te 'āite'anga: tā te 'ētene i 'aka'ātinga ra, i 'aka'ātinga rātou nā te au dēmoni, ē kāre nā te Atua. Ē kāre au e 'inangaro kia kāpiti katoa kōtou ki te au dēmoni.

21Kāre 'e tika i a kōtou kia inu i te kapu a te 'Atu ē te kapu a te au dēmoni. Kāre 'e tika i a kōtou kia kai i te kaingākai a te 'Atu ra ē te kaingākai a te au dēmoni ra.

22Deut 32.21Ka 'akakōkō āina tātou i te 'Atu kia vare'ae? 'E ma'ata atu āina tō tātou ririnui i tōna?

E rave i te au mea kātoatoa ma te 'akakakā i te Atua

23 1 Kōr 6.12 Tē karanga rā kōtou ē, “'E tika te au mea kātoatoa i a tātou!” 'E tika rāi, kāre rā 'e pu'apinga i te au mea rava rāi! “'E tika te au mea kātoatoa i a tātou!” 'E tika rāi, kāre rā te au mea rava rāi e 'akatupu i te meitaki.

24Auraka rava 'e tangata e kimi i tōna 'ua'orāi meitaki, māri rā i tō ēta'i kē ra.

25E kai 'ua kōtou i te kiko manu rava rāi i 'oko'ia i te ngā'i 'oko'oko'anga ra ma te kore e tāmanamanatā i tō kōtou 'akavā ngākau ra,

26Sal 24.1nō te mea, “nō te 'Atu 'oki te 'enua ē tōna kī katoa ra.”

27Mē pati mai tēta'i tangata 'akarongokore i a kōtou nō te kaikai ē tē 'inangaro ra kōtou i te 'aere, e kai rāi kōtou i te au mea pou roa i tuku'ia mai ki mua i a kōtou na ma te kore e tāmanamanatā i tō kōtou 'akavā ngākau.

28Mei te mea rā ē, kua tuatua mai tēta'i tangata ki a kōtou ē, “'E 'ātinga tēia i 'apai'ia ana nā te au 'ītoro,” 'eia'a e kai, nō taua tangata 'oki i 'akakite maira ē nō tōna 'akavā ngākau.

29E 'akama'ara ē, tē tuatua nei au: nō tōna 'akavā ngākau, kāre nō tō'ou 'ua'orāi 'akavā ngākau.

Tē ui rā kōtou ē, “'E a'a i ārai'ia ai tōku tika'anga nō te 'akavā ngākau o tēta'i kē?

30Mē tē kai nei au ma te 'akameitaki i te Atua, 'e a'a au i 'akakino'ia ai nō te kai tāku i 'akameitaki i te Atua?”

31Ē tēianei, noa atu ē 'e a'a tā kōtou e rave ra, mē tē kai nei kōtou, mē kāre tē inu nei kōtou, e rave anake ia ma te 'akakakā i te Atua.

32Auraka kōtou kia riro 'ei tūrori'anga ki te Ngāti Iūda, ki te Eleni, ē ki te 'ēkālēsia a te Atua,

33mei āku rā e 'akarekareka i te tangata rava rāi ki te au mea katoa nei, nō te mea, kāre au e kimi i tōku 'ua'orāi meitaki, i te meitaki rā o te tangata 'e mānganui kia ora rātou.