Ephesia 2 - Cook Island Maori Revised New Testament(CIMRNT)

Ka ora tātou i roto i te Mesia

1 Kol 2.13 Ko kōtou, 'e aronga mate kōtou i te pae vaerua i muatangāna nō tō kōtou au tārevakē ē te 'ara.

2Kua āru 'oki kōtou i te mataara kino o tēianei ao; kua kauraro kōtou i te tūtara o te mana kino o te reva 'ua nei, ko te vaerua ia e 'anga'anga nei i roto i te aronga kaurarokore i te Atua.

3Kua 'āite 'oki tātou pou roa mei taua aronga kaurarokore rāi nā roto i te au noinoi o tō tātou kōpapa, ma te rave 'ua i te au 'inangaro o te kōpapa ē te manako. Ē nō tō tātou tū tangata 'ua nei 'e aronga rāi tātou tei tau kia 'akautunga'ia e te riri o te Atua, mei te au tangata rava rāi nei 'oki.

4Ko te Atua rā i roto i tōna tākinga meitaki ma'ata, kua aro'a ma'ata rava mai i a tātou,

5ē kua 'ōronga mai ki a tātou nei i te ora i roto i te Mesia, noa atu ē 'e aronga mate tātou nō te au 'ara. Kua 'akaora'ia kōtou e te aro'a 'ua!

6Ē nō tō tātou tā'okota'i'anga ki a Iēsū Mesia kua 'akatū aia i a tātou ma ia katoa ki runga, ē kua 'akano'o i a tātou ma ia katoa i te ao ra.

7I pērā ai aia 'ei 'akaāri mai i te au tuātau ki mua i te ma'ata 'āitekore o tōna aro'a 'ua nā roto i tōna tākinga meitaki ki a tātou i roto i te Mesia ra i a Iēsū.

8Kua 'akaora'ia 'oki kōtou e tōna aro'a 'ua nā roto i te 'akarongo. Ē kāre te reira ē nō kō mai i a kōtou 'ua'orāi, 'e mea 'ōronga'ia mai rā ia e te Atua.

9Kāre te reira i nā roto i te 'anga'anga tangata, ko te 'akati'eti'e ā'ea tēta'i 'ua atu tangata.

10Ko tātou 'oki tāna 'anga'anga; i 'anga 'aka'ou'ia 'oki tātou i roto i te Mesia i a Iēsū kia rave tātou i te au 'anga'anga mēmeitaki tā te Atua i 'akate'ate'amamao takere kia rave tātou.

Tā'okota'i'anga ki te Mesia

11Nō reira, e ma'ara kōtou ē, 'e au tangata 'ētene kōtou i muatangāna, ē kua tapa'ia kōtou i te “peritomekore” e te aronga tei tapa'ia i te “peritome'anga” nō te 'anga'anga 'oki tei rave'ia ki te kōpapa nei.

12E ma'ara katoa kōtou ē, kua takakē kōtou mei te Mesia maira i taua tuātau ra. 'E aronga kekē kōtou mei te kāpipiti'anga o Īserā'ela. Kāre ō kōtou piri'anga ki te au kōreromotu i papa'u'ia maira, kāre ō kōtou mānakonako'anga i te ao nei, ē kāre ō kōtou Atua.

13Inārā, nā roto i te tā'okota'i'anga ki te Mesia ra i a Iēsū, ko kōtou tei ātea kē i muatangāna, i āvaitata mai i tēianei nā roto i te toto o te Mesia ra.

14Ko te Mesia 'oki te tumu o te 'au nō tātou! Kua 'akariro 'oki aia i te Ngāti Iūda ē te 'ētene 'ei 'iti tangata 'okota'i nā roto i tōna matenga i te 'akaātea'anga i te tū 'enemi, koia 'oki te patu 'akatakakē i rotopū.

15Kol 2.14Kua 'akakore aia i te mana o te Ture ē tāna 'akaue'anga ē te poroki'anga, kia 'anga 'aka'ou'ia taua ngā 'iti tangata e rua ra 'ei 'iti tangata 'ōu 'okota'i. I pērā 'oki tōna 'au i tupu ei.

16Kol 1.20Ē tēia katoa tōna 'akakoro'anga: kia 'aka'ongi aia i a rāua i te kāpiti'anga 'okota'i ki te Atua nā roto i te mate'anga i runga i te sātauro, ē kua 'akakore aia i te tū 'enemi.

17Isa 57.19Ē kua 'aere maira 'oki aia ē kua tūtū maira i te tuatua meitaki o te 'au ki a kōtou tō te ātea kē, ē pērā katoa ki a rātou tei vaitata.

18Ē nā roto i aia e tikāi i a tātou rava rāi kia tae atu tātou ki mua i te aroaro o te Metua ra nā roto i te Vaerua 'okota'i.

19Ē nō reira, kāre atura kōtou i te tangata kekē ē te tuitārere, 'okota'i rā ō kōtou 'ōire ē tō te aronga tapu ra. Nō te ngutu'are rāi kōtou o te Atua.

20Kua patu'ia 'oki kōtou ki runga i te tango o te au 'āpōsetolo ē te au peroveta ra, ē ko te Mesia ko Iēsū, ko te toka ti'avā ia;

21ē te 'are katoa i tā'okota'i'ia i roto i aia ra kua riro mai ia 'ei nao tapu nō te 'Atu.

22Ē i tō kōtou tā'okota'i'anga'ia ki te Mesia ra, kua patu katoa'ia kōtou e te Vaerua ra 'ei ngā'i no'o'anga nō te Atua.