Apokalupo 15 - Cook Island Maori Revised New Testament(CIMRNT)

Ngā 'āngela toko'itu ē te au mate 'openga

1Kua kite atura au i tēta'i 'akairo kē i runga i te rangi, 'e mea ma'ata rava ē te vāvāria, koia 'oki, ngā 'āngela e 'itu ma ngā mate 'openga e 'itu. Nā tēia au mate 'oki i 'akaoti ei te riri o te Atua.

2Kua kite atura au i tēta'i mea mei 'e tai i'o ra i 'irokia ki te a'i. Kua kite katoa au i te aronga i 'autū ki runga a'o i te puaka tā'ae, tōna tiki ē te nūmero o tōna ingoa. Tē tū 'ua ra rātou i runga i taua tai i'o ra, ē tē mou ra i te au kītara a te Atua.

3Exo 15.1Tē 'īmene ra rātou i te 'īmene a Mōse te tāvini o te Atua, ē te 'īmene o te Punua Māmoe, i te nā kō'anga ē,

“'E ma'ata ē te vāvāria tā'au au 'anga'anga,

e te 'Atu, te Atua Mana Kātoatoa ē!

'E mea tau ē te tika tā'au au 'anga'anga,

e te Ariki o te au 'iti tangata ē!

4 a: Ier 10.7; b: Sal 86.9 Ko 'ai 'oki te ka kore e mataku i a koe,

ē e 'akakakā i tō'ou ingoa, e te 'Atu ē?

Ko koe anake 'oki tei tapu,

ē ka 'ope te au 'iti tangata rava rāi i te 'aere mai ē te 'akamori atu i a koe,

nō te mea, ko tā'au 'anga'anga tau rava,

tē 'akaāri 'ua'ia nei ia.”

5 Exo 38.21 I muri ake i te reira, tēia tāku i kite: i runga i te rangi kua ma'eu'ia te nao, koia 'oki, te ngā'i i no'o ei te Atua.

6Ē mei roto mai i te nao, kua 'aere maira ngā 'āngela e 'itu ma ngā mate e 'itu. Kua kāka'u'ia rātou ki te kāka'u vi'ivi'ikore ē te kakā, ē kua tātua'ia tō rātou umauma ki te tātua 'auro.

7Kua tuku maira tēta'i o ngā mea ora e 'ā ra ki ngā 'āngela e 'itu e 'itu kapu 'auro tei kī i te riri o te Atua tē ora 'ua nei e tuātau 'ua atu.

8Exo 40.34; 1 Arik 8.10,11; 2 Par 5.13,14; Isa 6.4Kua kī i'ora te nao i te au nō kō mai i te kakā o te Atua ē tōna mana, ē kāre e rauka i tēta'i 'ua atu tangata kia tomo ki roto i te nao e 'ope 'ua atu i te 'akatupu'ia e ngā 'āngela e 'itu taua ngā mate ra.