1 Timōteo 3 - Cook Island Maori Revised New Testament(CIMRNT)

Te aronga arataki i roto i te 'ēkālēsia

1'E tuatua mou tēia: Kia umuumu tēta'i tangata i te tao'onga arataki 'ēkālēsia, tē 'inangaro nei aia i te 'anga'anga tau meitaki.

2Tito 1.6-9Ko te arataki 'ēkālēsia, 'ei tangata 'apakore ia e tikāi, 'ei tāne va'ine 'okota'i, te 'ākono meitaki, te ngākau marū, te mako meitaki, te 'ō'ō mai i te tangata kekē, ē te kite i te 'āpi'i atu.

3Auraka 'ei tangata inuinu uaina ē te 'akatupu pekapeka, kia marū rā; auraka 'ei tangata tau'ētono ē te noinoi moni.

4'Ei tangata 'aka'aere meitaki rā i tōna 'ua'orāi ngutu'are ma tāna au tamariki i te kauraro mārie i aia nā roto mai i te ngākau mā'ora'ora.

5Ko te tangata 'oki kāre e kite i te 'aka'aere meitaki i tōna 'ua'orāi ngutu'are, ka 'akapē'ea e rauka ai i aia i te tiaki meitaki i te 'ēkālēsia a te Atua?

6Ko te tangata arataki 'ēkālēsia ra, auraka aia 'ei tangata 'ōu 'ua i te pae o te 'akarongo, ko te 'akateitei'ia ā'ea ē te ngākau parau, ē ka roko'ia aia e te 'aka'apa'anga i 'aka'apa'ia ai te Tiāporo ra.

7'Ei tangata rongo meitaki katoa aia e tikāi ki te aronga i va'o i te 'ēkālēsia ra, kia kore aia e 'akakino'ia ē e tā'ē'ē'ia e te 'ere'ere a te Tiāporo ra.

Te aronga tao'onga tauturu i roto i te 'ēkālēsia

8Ko te au tauturu, 'ei au tangata marū katoa rātou e tikāi, 'eia'a te va'a rua, te inuinu uaina ē te morimori 'apinga.

9Kia mou piri rā rātou i te tuatua ngaro o te 'akarongo ma te 'akavā ngākau mā.

10Kia 'ākarakara meitaki'ia rātou nā mua, ē mē kāre 'ua ō rātou tāpepe'anga, ka rave ei rātou i te tao'onga tauturu.

11Mei te reira katoa tā rātou au va'ine, kia marū rātou e tikāi, 'eia'a te uruto'e ē te 'o'onitua, 'ei au va'ine 'ākono meitaki rā ē te 'irinaki'ia i te au mea kātoatoa ra.

12Ko te au tauturu, 'ei au tāne va'ine 'okota'i rātou e tikāi, ē tei 'aka'aere meitaki i tā rātou tamariki ē tō rātou 'ua'orāi ngutu'are.

13Ko te aronga 'oki e rave meitaki ana i te tao'onga tauturu, ka rauka i a rātou te tūranga ngāteitei nō rātou 'ua'orāi, ē pērā katoa te pāpū'anga o te 'irinaki'anga i te Mesia ra i a Iēsū tā rātou e 'akakite nei.

Te tuatua ngaro o te 'akarongo

14Tē tātā atu nei au ki a koe ma te mānakonako'anga ē, ka tae vave atu au ki a koe.

15Mē roa rā au, kia kite rāi koe ē, ka 'akapē'ea koe i te 'ākonokono i a koe 'ua'orāi i roto i te ngutu'are o te Atua ra, ko te 'ēkālēsia ia a te Atua ora, 'e pou ē 'e tumu 'oki o te tuatua mou.

16'E mea pāpū tikāi ē, ko te mea tā tātou e 'irinaki nei 'e tuatua ngaro ma'ata te reira, koia 'oki:

Kua kitea mai aia i roto i te kōpapa tangata nei,

i 'akatika'ia mai e te Vaerua,

i 'ākara'ia e te au 'āngela,

i tūtū 'aere'ia ki ō te 'ētene ra,

i 'irinaki'ia e tō te ao nei,

i 'apaina'ia ki runga ma te kakā.