1 Kōrīnētia 11 - Cook Island Maori Revised New Testament(CIMRNT)

1 1 Kōr 4.16; Phil 3.17 E āru mai kōtou i āku, mei āku katoa e āru i te Mesia ra.

Kia tāpoki'ia āinei te ūpoko i te tuātau 'akamori?

2Tē 'akameitaki atu nei au i a kōtou, ko kōtou i ma'ara mai i āku i roto i te au mea kātoatoa, ē te tāpū'anga i te au 'āpi'i'anga tāku tikāi i tuku atu ki a kōtou na.

3Ko tēia rā tōku 'inangaro i a kōtou, kia kite kōtou ē, ko te ūpoko o te au tangata rava rāi ko te Mesia ia; ko te ūpoko o te va'ine ko te tāne ia, ē ko te ūpoko o te Mesia ra ko te Atua ia.

4Ko te au tangata rava rāi e pure ra, mē kāre, e ako i te tuatua a te Atua ra ma te ūpoko tāpoki'ia ra, tē tā'aka'aka ra aia i tōna ūpoko, koia 'oki, ko te Mesia.

5Ē ko te au va'ine rava rāi e pure ra, mē kāre e ako i te tuatua a te Atua ra ma te ūpoko tāpokikore'ia ra, tē tā'aka'aka ra aia i tōna ūpoko, koia 'oki, ko tāna tāne. 'Āiteite rāi te reira ē, kua varu'ia tō taua va'ine ra ūpoko.

6Mē kāre tēta'i va'ine e tāpoki i tōna ūpoko, 'e ngari aia kia pākoti i tōna rauru; mei te mea rā ē, 'e mea 'akamā'ia e te va'ine kia pākoti'ia tōna rauru, mē kāre ra, kia varu katoa'ia tōna ūpoko, 'e ngari aia kia tāpoki i tōna ūpoko.

7Gen 1.26,27Kāre 'oki te tāne e tika'ia kia tāpoki i tōna ūpoko, i te mea ē, ko te tūtū 'oki aia ē te kakā o te Atua. Kāreka te va'ine ra, ko te kakā ia o tāna tāne.

8Gen 2.18-23Kāre 'oki te tāne ē nō roto mai i te va'ine; ko te va'ine rā nō roto mai ia i te tāne.

9Kāre katoa rāi 'oki te tāne i 'anga'ia nō te va'ine, ko te va'ine rā nō te tāne.

10Nō tēia tumu nei ē nō te au 'āngela, 'ei tāpoki rāi tō te va'ine i runga i tōna ūpoko.

11I roto rā i tō te Atua 'akakoro'anga kāre 'e meitaki i te va'ine kia kore 'e tāne, ē te tāne kia kore katoa 'e va'ine.

12Mei te va'ine 'oki ē nō roto mai i te tāne ra, koia katoa te tāne e 'ānau mai nā roto mai i te va'ine. Nō kō mai rāi te au mea kātoatoa i te Atua.

13E 'akamanako meitaki ana kōtou 'ua'orāi, 'e mea tau āinei kia pure te va'ine ki te Atua ma te kore tōna ūpoko i tāpoki'ia?

14Kāre āina tō kōtou mata e 'akakite mai ana ki a kōtou ē, ko te tāne 'e rauru roroa tōna, 'e mea 'akamā ia ki aia;

15kāreka rā te va'ine 'e rauru roroa tōna, ko tōna ia mānea tikāi. Nō te mea, kua 'ōronga'ia te rauru roroa ki aia 'ei tāpoki.

16Mē 'inangaro tēta'i 'ua atu tangata i te taumārō mai i tēia, tē 'akakite atu nei au ki aia ē, kāre ia peu i a mātou nei, ē kāre katoa i te au 'ēkālēsia a te Atua ra.

Te kaikai 'openga a te 'Atu ra(Mātaio 26.26-29; Māreko 14.22-25; Luka 22.14-20)

17I roto i ēia 'akaue'anga e āru mai nei, kāre au e rekareka ana i a kōtou, nō te mea, kia 'akaputuputu kōtou na, kāre 'e meitaki e tupu ana, māri rā te kino.

18Ko te mea mua, kua 'akarongo au ē i tō kōtou 'akaputuputu'anga 'ēkālēsia na, tē paepae kē ra kōtou; ē tē manako nei au ē, tē tika ra tēta'i mānga i te reira.

19Kāre e 'ēkōkō, ka tupu rāi te pae kē i roto i a kōtou, kia kitea meitaki'ia ē, ko 'ai te aronga 'e manako tika tikāi tō rātou.

20Kia 'akaputuputu kōtou ki te ngā'i 'okota'i, kāre ē ko te kaikai 'openga tikāi a te 'Atu tā kōtou e kai ra,

21nō te mea, kia kaikai kōtou ra, tē 'apai maira te tangata tātakita'i i tāna 'ua'orāi kai, ē e kai atura i tāna ma te kore e tiaki i tēta'i 'ua atu. Kua no'o pongi 'ua i'ora tēta'i, ē kua kona i'ora tēta'i.

22Kāre ō kōtou ngutu'are tikāi kia kaikai kōtou ē kia inu? Mē tē 'akava'ava'a nei kōtou i te 'ēkālēsia a te Atua, ē tē tā'akamā nei i te aronga kāre ā rātou ra? E 'akapē'ea atura au ki a kōtou? E 'akameitaki atu āina au i a kōtou nō tēia? Kāre roa!

23Ko tāku i 'āpi'i atu ki a kōtou na, ko tāku i rauka mai mei kō mai i te 'Atu ra, koia 'oki: kua rave te 'Atu ra ko Iēsū i te varāoa i te pō i tuku pikika'a'ia mai ei aia ra,

24ē kia oti akera i aia i te 'akameitaki, kua vāvā'i i'ora, nā kō atura, “Ko tōku kōpapa tēia nā kōtou. Ka rave mai 'ei 'akama'ara'anga i āku.”

25a: Exo 24.8; Ier 31.31-34; b: Exo 24.6-8Kua pērā katoa 'oki aia i te rave'anga i te kapu i muri ake i te kaikai'anga, nā kō atura, “Ko tēianei kapu ko te kōreromotu 'ōu ia i tōku nei toto. E pērā 'ua atu rāi kōtou mē inu kōtou i te reira 'ei 'akama'ara'anga i āku.”

26Nō reira, mē kai kōtou i tēianei varāoa ē tē inu i tēianei kapu, tē 'akakite ra kōtou i te matenga o te 'Atu e 'oki 'ua mai aia ra.

27Mē tē kai nei rā tēta'i tangata i tēianei varāoa ē tē inu i te kapu a te 'Atu ma te tū taukore ra, e 'apa aia i te kōpapa ē te toto o te 'Atu.

28Kia kimi matatio ra te tangata i aia 'ua'orāi i mua ake ka kai ei aia i te varāoa ē ka inu ei i te kapu ra.

29Ko tēta'i 'ua atu 'oki tangata tei kai ē tei inu ma te kore e 'akangāteitei i te kōpapa o te 'Atu ra, kua riro aia i te 'aka'apa i aia 'ua'orāi.

30Nō reira i ma'ata ai te aronga 'āpikepike ē te aronga maki i roto i a kōtou na, ē i mate ei tēta'i pāpāki o kōtou na 'e mānganui.

31Nāringa 'oki tātou i 'akavā i a tātou 'ua'orāi ma te tika, kāre tātou e 'akavā'ia mai.

32Kia 'akavā'ia mai rā tātou e te 'Atu, ka 'akatika katoa'ia maira tātou e ia kia kore tātou e 'akautunga'ia mai ma tō te ao nei.

33Ē nō reira, e aku au taeake, mē putuputu kōtou nō te kai, e tatari mārie kōtou tēta'i i tēta'i.

34Mē 'e pongi tēta'i 'ua atu tangata ra, e kaikai mai aia i te ngutu'are, kia kore tō kōtou putuputu'anga ra e riro 'ei tumu nō te 'aka'apa'anga.

Ē kia tae atu au ra, nāku e 'akakite atu i te au mea toe ra.