Ebera 3 - Cook Island Maori Revised New Testament(CIMRNT)

'E ma'ata a Iēsū i a Mōse

1Ē tēianei, e te au taeake tei piri ki te Atua ē tei kāpiki katoa'ia mai mei te rangi mai mei āku nei rāi, e 'akamanako tāmou i a Iēsū, ko te karere ia ē te Ta'unga Ma'ata o te 'akarongo tā tātou e 'a'aki nei.

2Num 12.7Ē ko ia rāi tei 'ākono meitaki i te anoano o te Atua tei 'akataka mai i aia ra, mei a Mōse ra 'oki i 'ākono meitaki i te ngutu'are tangata o te Atua ra.

3'E ma'ata atu te ngāteitei o te tangata tei 'akatū i tēta'i 'are i tō taua 'are 'ua'orāi ra. Pērā katoa, e tau rāi kia ma'ata atu tō Iēsū ngāteitei i tō Mōse.

4Tēta'i 'ua atu 'are kua 'akatū'ia ia e tēta'i tangata; te au mea rava rāi rā, kua 'anga'ia ia e te Atua.

5Ko tā Mōse 'ākono'anga i te ngutu'are tangata o te Atua, mei te tāvini 'ua ia kia 'akaāri mai i te au mea te ka tuatua'ia mai ā muri atu.

6Ko tā te Mesia rā 'ākono'anga mei tō te Tamaiti ia i runga a'o i tōna ngutu'are tangata. Ko tātou 'oki tōna ngutu'are tangata, mē ka tinamou tikāi tō tātou māro'iro'i ē te ngākau parau o tā tātou e mānakonako nei.

Te 'akangāro'i'anga nō te ngutu'are tangata o te Atua

7 Sal 95.7-11 Nō reira, mei tā te Vaerua Tapu i tuatua maira:

“Mē 'akarongo kōtou i tēia rā nei i te reo o te Atua,

8auraka e 'akamārōki'aki'a i tō kōtou ngākau!

Auraka e meameā'au mei tō kōtou 'ai metua i te rā

i tīmata ei rātou i āku i te mēdēbara ra.

9Kua tāmata 'oki rātou ē kua 'akakōkō mai i āku

noa atu ē, kua kite rāi rātou i tāku au 'anga'anga

10e 'ā nga'uru 'oki mata'iti.

Nō reira, kua takakē roa tōku ngākau i taua au tangata ra,

ē kua nā kō akera au: ‘Tē 'aere kē 'ua nei tō rātou ngākau;

kāre rātou i āru i te au mataara tāku i 'ākono nō rātou.’

11Kua taputo'u'ia i reira e au i tōku riri'anga ra ē,

‘Auraka roa rātou kia ō ki roto i tōku ngā'i 'akangāro'i'anga.’ ”

12E te au taeake ē, kia matakite kōtou kia kore te manako kino ē te 'akarongokore e 'aka'uri kē i tēta'i o kōtou mei te Atua ora mai.

13E 'akamāro'iro'i rā kōtou tēta'i ki tēta'i i tērā rā ē i tērā rā, koi vai ake “tēia rā nei” o te Tuatua Tapu, kia kore tēta'i o kōtou na e mārōki'aki'a nō te tāpikipiki'anga a te 'ara.

14Ka piri 'oki tātou ki te Mesia, mē ka tinamou tikāi tātou i tō tātou 'irinaki'anga mua e tae 'ua atu ki te 'openga.

15 Sal 95.7,8 Tē nā kō ra 'oki te Tuatua Tapu ē,

“I tēia rā nei, mē 'akarongo kōtou i tōna reo,

auraka e 'akamārōki'aki'a i tō kōtou ngākau!

Auraka e meameā'au.”

16 Num 14.1-35 Ko 'ai 'oki tei 'akarongo i te reo o te Atua ē kua meameā'au ra? Kāre āinei ko te aronga kātoatoa tei arataki'ia mai e Mōse mei Aiphiti mai?

17Ko 'ai 'oki tā te Atua i riri 'oto'oto e 'ā nga'uru mata'iti? Kāre āinei ko te aronga tei rave i te 'ara, ē nō reira, i mate ei ē i 'akaruke'ia ai i roto i te mēdēbara ra?

18Ē ko te aronga tāna i taputo'u ra ē, kāre rātou e ō ki roto i tōna ngā'i 'akangāro'i'anga, ko 'ai rātou? Kāre āinei ko rātou tei kore i kauraro ana?

19Ē tē mārama nei 'oki tātou ē, nō tō rātou 'akarongokore i kore ei i rauka i a rātou kia ō.