Apokalupo 3 - Cook Island Maori Revised New Testament(CIMRNT)

Te karere ki te 'Ēkālēsia o Sāradi

1“E tātā koe ki te 'āngela o te 'ēkālēsia i Sāradi:

Tē nā kō maira tei mou i ngā vaerua e 'itu o te Atua ra, ē tei mou katoa i ngā 'ētū ē 'itu ra: Tē kite nei au i tā'au au 'anga'anga. Tē karanga'ia nei ē, tē ora nei koe, kua mate tākiri rā koe.

2E ara mai! E 'akapakari i te au mea toe ra tei vaitata 'oki i te mate. Kāre rāi i kitea e au 'e 'anga'anga meitaki rava tā'au i tā te Atua 'ākara'anga.

3Māt 24.43,44; Luk 12.39,40; Apo 16.15Nō reira, e ma'ara i tā'au i rauka mai ē tā'au i 'akarongo mai; ē 'ākono i te reira ē e tatarā'ara. Kia kore rā koe e ara 'ua, ka tae atu au ki a koe na mei te keiā ra te tū, ē kāre koe e kite i te ora e tae atu ei au ki a koe na.

4Tē vai nei rā tēta'i pae tangata i Sāradi na ko tei kore i 'akavi'ivi'i i tō rātou kāka'u, ē tē 'ā'āere 'ua nei rātou ē au ma te kāka'u teatea, nō te mea, tē tau meitaki ra 'oki rātou.

5 a: Exo 32.32,33; Sal 69.28; Apo 20.12; b: Māt 10.32; Luk 12.8 Ko tei 'autū ra, ka 'akakāka'u katoa'ia aia ki te kāka'u teatea, ē kāre rava au e tīpū i tōna ingoa mei roto mai i te puka o te ora, ka 'a'aki rā au i tōna ingoa ki mua i te aroaro o taku Metua ē ki mua katoa i te aroaro o tāna au 'āngela.

6'E taringa tōna ra, ka 'akarongo aia i tā te Vaerua e tuatua mai nei ki te au 'ēkālēsia.

Te karere ki te 'Ēkālēsia o Philadelaphia

7 Isa 22.22; Iob 12.14 “E tātā koe ki te 'āngela o te 'ēkālēsia i Philadelaphia:

Tē nā kō maira aia ko tei tapu ē te mea mou, ko tei mou i te tāviri a Dāvida. Mē tē ma'eu nei i aia tēta'i ngūtupa, kāre rava 'e tangata e tōpiri, ē mē tē tōpiri nei aia i te reira, kāre rava e ma'eu i tēta'i tangata.

8Tē kite nei au i tā'au 'anga'anga. Inā, kua tuku atu au i te ngūtupa mātea ki mua i a koe na, ē kāre 'e tangata e rauka kia tōpiri. Kua kite 'oki au ē, 'e mana meangiti 'ua tō'ou, kua 'ākono rā koe i tāku tuatua, ē kāre koe i 'u'una i tōku ingoa.

9a: Isa 49.23; 60.14; b: Isa 43.4Inā, tē vai nei tēta'i aronga nō roto mai i te sūnago o Sātani, tei 'akakite ē, 'e au Ngāti Iūda rātou, kāre rā rātou i te Ngāti Iūda. Tē pikika'a nei rātou. Inā, e 'akariro au i a rātou i te 'aere mai e tīpapa ki tō pae vaevae ē ka kite rātou ē, kua aro'a'ia ana koe e au.

10Nō te mea, kua tāmou mārie rāi koe, mei tāku i 'akaue atu, ka 'ākono rāi au i a koe i te tuātau tīmata'anga te ka tae mai ki runga i tēianei ao katoa i te tīmata i tōna au tangata rava rāi.

11Kāre e roa, kua tae atu au. E mou meitaki i tei rauka i a koe, kia kore tā'au korōna e riro i tēta'i kē.

12 a: Apo 21.2; b: Isa 62.2; 65.15 Ko tei 'autū ra, e 'akariro au i aia 'ei pou ki roto i te nao o taku Atua, ē kāre rava aia e 'akaruke 'aka'ou i te reira. Ē ka tātā au i te ingoa o taku Atua ki runga i aia, ē te ingoa o te 'ōire o taku Atua, ko Iērūsalēma 'ōu tei tae mai nō te rangi mai, nō kō mai i taku Atua. Ē ka tātā katoa au i tōku 'ua'orāi ingoa ki runga i aia.

13'E taringa tōna ra, ka 'akarongo aia i tā te Vaerua e tuatua mai nei ki te au 'ēkālēsia.

Te karere ki te 'Ēkālēsia o Laodikea

14 Mase 8.22 “E tātā koe ki te 'āngela o te 'ēkālēsia i Laodikea:

Tē nā kō maira te Āmene, te kite mou ē te pikika'akore, te 'akamata'anga o te au mea i 'anga'ia e te Atua ra.

15Kua kite au i tā'au au 'anga'anga. Kāre koe i anu ē kāre 'oki koe i vera. Nāringa 'oki koe i anu, mē kāre i vera!

16Ē tēnā na, nō te mea te mā'ana'ana 'ua na koe, kāre 'oki i vera ē kāre 'oki i anu, ka ruaki atu au i a koe ki va'o mei roto atu i tōku va'a.

17Tē karanga na 'oki koe ē, ‘'E tangata 'apinga nui au, kua ma'ata rava tōku pu'apinga, kāre 'ua au e ngere.’ Kāre rā koe i kite ē, 'e tū mate ma'ata tō'ou, 'e tū kino rava, te puta'ua, te matapō ē te tā'ākā 'ua.

18Nō reira, tē ako atu nei au i a koe, e 'oko mai koe mei konei atu i āku nei i te 'auro tāmā'ia ki te a'i ra, kia ma'ata rava tō'ou pu'apinga. E 'oko katoa mai i te kāka'u teatea 'ei 'akakāka'u i a koe kia kore e kitea'ia mai te 'akamā o tō'ou vai tā'ākā 'ua'anga. E 'oko katoa mai i te vairākau e parai i tō'ou mata kia kite mata koe.

19Mase 3.12; Ebe 12.6Ko rātou tāku e 'akaperepere ra, ko tāku ia e ako ē e pāpā 'oki. Nō reira, kia māro'iro'i koe ē e tatarā'ara.

20Inā, tē tū nei au ki te ngūtupa ē tē tōpāpā atu nei, ē kia 'akarongo mai tēta'i tangata i tōku reo ē kia ma'eu i aia te ngūtupa, ka tomo atu au ki roto ē ka kai māua i te mānga ko ia ē au, ē ko au ē ia.

21Ko tei 'autū ra, e 'akano'o au i aia i tōku pae ki runga i tōku terōno, mei āku i 'autū ra ē kua no'o i te pae o taku Metua ki runga i tōna terōno.

22'E taringa tōna ra, ka 'akarongo aia i tā te Vaerua e tuatua mai nei ki te au 'ēkālēsia.”