Kolosa 1 - Cook Island Maori Revised New Testament(CIMRNT)

Te aro'a'anga

1Ko Paulo, 'e 'āpōsetolo nō te Mesia ra ko Iēsū, nā roto i te tika'anga o te Atua, ē ko Tīmōteo katoa tō tātou taeake,

2ki te au taeake i Kolosa, te aronga tapu ē te 'ākono meitaki i roto i te Mesia ra.

Kia 'ōronga 'ua mai te Atua tō tātou Metua i te aro'a 'ua ē te 'au ki a kōtou.

Te pure 'akameitaki'anga

3Tē 'akameitaki atu nei mātou i te Atua, te Metua o tō tātou 'Atu ra ko Iēsū Mesia i tō mātou pure'anga nō kōtou ma te tīvatakore.

4Kua 'akarongo 'oki mātou i te tū o tō kōtou 'irinaki'anga i te Mesia ra, i a Iēsū, ē i te tū o tō kōtou aro'a i te aronga tapu katoa ra,

5nō te mānakonako'anga tei vai'o'ia nō kōtou i te ao ra. Kua 'akarongo kōtou i muatangāna i te reira nā roto i te tūtū 'aere'anga'ia o te tuatua mou o te 'ēvangelia ki a kōtou.

6Mei te 'ēvangelia e 'akatupu nei i te meitaki ē tē toto'a nei i tēianei ao katoa, i pērā katoa i rotopū i a kōtou, mei te rā mai i 'akarongo ei kōtou ē i kite tikāi i te aro'a 'ua o te Atua.

7Kol 4.12; Phlm 1.23Nā Ēpāphera i 'āpi'i i a kōtou i te reira. Ko ia tō mātou taeake tāvini 'akaperepere ko tei 'ākono meitaki i te 'anga'anga o te Mesia i ō kōtou na,

8ē nāna i 'akakite mai ki a mātou i tō kōtou aro'a tā te Vaerua i 'akatupu.

9Ko tēia 'oki te tumu kāre rava mātou i tīvata, mei te rā maira i 'akarongo ei mātou i te tuatua i a kōtou, i te pure ē te pati 'akatenga nō kōtou, kia 'akakī'ia mai kōtou i te kite i tō te Atua anoano nā roto i te tū pakari rava rāi ē te mārama i te au mea vaerua.

10'Ei reira e tau ei tō kōtou ora'anga i te 'Atu i te rave tāmou'anga i te au mea e mareka mai ei aia ra; ē e 'akatupu ei kōtou i te meitaki nā roto i te tū 'anga'anga meitaki rava rāi, ē e 'akama'ata'ia ai tō kōtou kite i te Atua.

11Tē pure nei mātou kia 'akamātūtū'ia mai kōtou ki te māro'iro'i katoa nā roto mai i tōna mana kakā, kia tāmou mārie kōtou ē kia 'akakoromaki i te au mea rava rāi ma te rekareka,

12i te 'akameitaki'anga i te Metua tei 'akatūkatau i a kōtou kia tū rāi kōtou i tō te aronga tapu tu'anga i te mārama.

13Nāna 'oki tātou i 'akaora mei roto mai i te mana o te pōiri ē kua 'akaumu i a tātou ki te bāsileia o tāna Tamaiti 'akaperepere.

14Eph 1.7Nōna 'oki i rauka ai tō kōtou rāvenga ora, koia 'oki te 'akakore'angā 'ara.

Tō te Mesia tū tangata ē tāna 'anga'anga

15Ko te Mesia ko te tū tikāi ia nō te Atua 'ākarakore'ia. Ko ia te tama mua o te au mea rava rāi i 'anga'ia ra.

16Nā roto 'oki i aia i 'anga'ia ai e te Atua te au mea rava rāi, tō te rangi ē tō te 'enua nei, te au mea 'ākara'ia ē te au mea 'ākarakore'ia mei te au terōno, te au tūtara, te au manārangi ē te au mea mana. Nā te Atua i 'anga i te au mea rava rāi nā roto i te Mesia, ē nō te Mesia anake,

17ē ko ia rāi i mua ake i te au mea rava rāi, ē nā roto i aia i mou ei te au mea rava rāi.

18Eph 1.22,23Ē ko ia te ūpoko o te kōpapa, koia 'oki te 'ēkālēsia. Ko ia te mōmua, te tama mua o te aronga i 'akatū'ia mei te mate ra, kia ma'ata 'ua atu rāi aia i te au mea katoa nei.

19Ē i mareka ai 'oki te Atua kia no'o tōna 'ua'orāi kī katoa ki roto i te Mesia

20Eph 2.16ē kia nā roto i aia e 'aka'ongi ei aia i te au mea rava rāi, tō te 'enua nei ē tō te rangi ra ki aia 'ua'orāi nā roto i te 'au i 'akatupu'ia i te maringi'angā toto i runga i te sātauro.

21Ko kōtou 'oki, te aronga tei takakē i muatangāna ma te ngākau 'aka'enemi ē te 'anga'anga kikino,

22i tēianei rā kua 'aka'ongi'ia kōtou nā roto i tōna mate'anga i te tū tangata, kia rauka i aia i te tuku atu i a kōtou ki mua i te Atua 'ei aronga tapu ē te 'apakore ē te tāpepe'angakore.

23Ka tupu 'ua, mei te mea ē, ka 'akatinamou kōtou ma te ngāueuekore ki runga i te tango o te 'irinaki'anga, ē kia kore kōtou e ātea kē mei te mānakonako'anga o te 'ēvangelia tā kōtou i 'akarongo, ē tei tūtū 'aere'ia ki te au mea rava rāi i raro ake i tēianei rangi. Ē ko au, ko Paulo, i riro 'ei tāvini nō tēia 'ēvangelia nei.

Tā Paulo 'anga'anga tāvini nō te 'ēvangelia

24I tēianei rā tē rekareka nei au, nō te mea, 'e mate tōku nō kōtou ē tē tauturu nei au i te 'akaoti i roto i tōku nei kōpapa i te au 'akakino'anga kāre te Mesia i 'akakino'ia ake, nō tōna kōpapa, koia 'oki te 'ēkālēsia nei.

25Ē nō taua 'ēkālēsia ra i riro mai ei au 'ei tāvini kia tau ki te tao'onga 'ēvangelia tā te Atua i tuku mai ki āku nei, kia 'akakite pū tikāi au ki a kōtou i te karere katoa a te Atua.

26Ko te mea muna ngaro tei 'u'una'ia i te au tuātau ta'ito ē te au uki ta'ito, kua 'akakite'ia mai rā ia i tēianei ki tōna aronga tapu ra.

27Nā te Atua i 'iki i a rātou 'ei 'akaāri i rotopū i te au 'ētene i te kakā pāpānunui o tēia mea muna ngaro ē: ko te Mesia tei roto ia i a kōtou, ko ia te mānakonako'anga o te kakā.

28Ko te Mesia ia tā mātou e tūtū 'aere nei nā roto i te 'akamatakite'anga i te tangata rava rāi i te au mea taukore, ē te 'āpi'i'anga i te tangata rava rāi i te au mea tau tikāi ma te tū pakari katoa, kia 'akariro mātou i te tangata tātakita'i 'ei tangata meitaki rava i roto i te Mesia ra.

29Ko tēia 'oki te 'akakoro'anga i 'anga'anga pakari ei au ma te 'uapou mārie'anga ma tōna māro'iro'i tei 'anga'anga ma te ririnui ma'ata i roto i āku nei.