2 Kōrīnētia 8 - Cook Island Maori Revised New Testament(CIMRNT)

Te 'ōronga'anga ma te ngākau aro'a

1 Rōm 15.26 Ē tēianei, e te au taeake, tē 'akakite atu nei mātou ki a kōtou i te aro'a 'ua o te Atua tei 'ōronga'ia mai ki te au 'ēkālēsia o Mākedōnia.

2Koia 'oki, i roto i tō rātou no'o'anga ki roto i te tīnaimate ma'ata, kua ra'i rava tō rātou rekareka, ē kua 'akaāri mai tō rātou ngere puta'ua i te 'ō'onu ma'ata o tō rātou ngākau 'ōronga.

3Ē kua 'ōronga rātou i tei rauka i a rātou. Ē ko au 'oki te kite ē, kua 'ōronga ma'ata 'ua atu rāi rātou ma te ngākau tae.

4Kua pati raurau mai rātou ki a mātou i te tika'anga kia piri atu rātou ki te tauturu i te aronga tapu ra.

5Kāre ko tēia tei manako'ia e mātou. Kua nā mua rā rātou i te 'ōronga i a rātou 'ua'orāi ki te 'Atu, ē i reira, nō te anoano 'oki o te Atua ki a mātou katoa.

6Nō reira, kua 'akamāro'iro'i atu mātou i a Tito, mei tāna i 'akamata i tēia 'anga'anga aro'a i rotopū i a kōtou na i muatangāna, kia 'akaoti katoa aia i te reira.

7Inā, mei a kōtou 'e meitaki rava atu i te au mea rava rāi, koia 'oki: te 'irinaki'anga, te va'a tūkatau, te pakari, te tūranga māro'iro'i tikāi ē tō kōtou aro'a ki a mātou, kia meitaki rava atu rāi kōtou i tēia 'anga'anga aro'a ra.

8Kāre tāku tuatua 'e 'akaue'anga ki a kōtou. Tē tīmata nei rā au i te tika'anga tikāi o tō kōtou aro'a nā roto i te 'aka'āite'anga ki te māro'iro'i o ēta'i kē ra.

9Kua nakiro 'oki kōtou i te aro'a o tō tātou 'Atu ko Iēsū Mesia. 'E 'apinga nui 'oki aia, nō kōtou rā i 'akariro'ia ai aia 'ei 'apingakore, kia riro mai kōtou 'ei aronga 'apinga nui nā roto i tōna tū puta'ua.

10Tēia 'oki tōku manako i tēia mea nei: ko kōtou 'oki te mōmua, kāre ē nō te rave i tēia 'akakoro'anga 'ua, māri katoa nō te 'akate'ate'amamao'anga i te reira i tēia mata'iti i topa ake nei.

11'E mea meitaki i a kōtou kia 'akaoti kōtou i tēianei i tā kōtou 'anga'anga. Mei tei umuumu pakari'ia e kōtou i te 'akate'ate'amamao, kia pērā katoa kōtou i te 'akaoti'anga i te reira ki tā kōtou ka rauka mai.

12Mē tē vai ra te umuumu'anga ra, ka 'āriki'ia mai e te Atua tā te tangata ka rauka mai, ē kāre i tei kore i rauka mai i aia ra.

13Kāre 'oki mei te mea ē, tē tāmāmā ra kōtou i tēta'i pae ē tē 'akateima'a ra i a kōtou 'ua'orāi; kia 'āiteite rā.

14Kia riro tā kōtou raurau 'apinga i tēianei 'ei tauturu atu i te aronga tei ngere, ē ka riro tā rātou raurau 'apinga 'ei tauturu mai i a kōtou mē ngere kōtou, kua 'āiteite i reira.

15Exo 16.18Mei tei tātā'ia ra ē, “Ko te tangata tei ma'ata tāna i ko'i ra, kāre i ma'ata rava tāna, ko te tangata rā tei meangiti tāna i ko'i ra, kāre i iti rava tāna.”

Ko Tito ma tōna au taeake

16Kia 'akameitaki'ia ra te Atua ko tei tuku i tāna tūranga māro'iro'i ki roto i te ngākau o Tito nō kōtou na.

17Kua 'āriki mai aia i tā mātou pati'anga 'akatenga, ē nō tōna tūranga māro'iro'i tikāi, nāna 'ua'orāi i manako kia 'aere atu aia ki a kōtou na.

18Tē tono kāpiti atu nei mātou i a Tito rāua ko te taeake tei pa'apa'a'ia nō tāna 'anga'anga 'ēvangelia e kako rava ake te au 'ēkālēsia katoa ra.

19Kāre rā ē, ko te reira anake 'ua, kua 'iki katoa'ia aia e te au 'ēkālēsia kia tere kāpipiti mātou nō tēia 'anga'anga aro'a tā mātou e rave nei nō te kakā o te 'Atu ē nō te 'akaāri atu i tō mātou ngākau mā'ora'ora.

20Tē matakite nei 'oki mātou ko te 'aka'apa mai ā'ea tēta'i tangata i a mātou nō tā mātou 'akatere'anga i tēia 'apinga aro'a ma'ata tikāi.

21Mase 3.4Nō te mea, tē umuumu nei mātou i te mea tika tikāi, auraka 'oki ki mua i te 'Atu anake, ki mua katoa rā i te tangata nei.

22Tē tono kāpiti katoa nei mātou mā rāua i tō mātou taeake tei kite putuputu'ia e mātou tōna tūranga māro'iro'i tikāi i te au mea rava rāi. Inārā, i tēianei kua ma'ata atu tōna māro'iro'i, nō te mea, kua pakari tikāi tōna 'irinaki'anga i a kōtou.

23Kāreka a Tito ra, ko tōku ia 'oa ē te tauturu 'anga'anga nō kōtou na. Ē ko tō mātou au taeake ra, 'e au mata rātou nō te au 'ēkālēsia, ē 'e kakā rātou nō te Mesia.

24Nō reira, e 'akapāpū ki a rātou ē ki te au 'ēkālēsia i tō kōtou aro'a ē tā mātou pa'apa'a'anga i a kōtou.