1 Tesalōnia Nō runga i tēia leta - Cook Island Maori Revised New Testament(CIMRNT)

Nō runga i tēia letaKo Paulo te tangata tei 'akamata i te 'ēkālēsia i Tēsālōnia (2.13,14). I te tuātau i 'akatupu ei aia i te reira, kua 'anga'anga pakari katoa aia kia rauka i aia tei umuumu'ia nō tōna ora'anga kia kore aia e riro 'ei 'apainga nō tō Tēsālōnia (2.9). I roto i tēia 'ōire ma'ata i te tua 'apatokerau o Eleni, 'e mānganui te au tangata tei 'āriu mai mei te au 'ītoro ki te Atua (1.9). Kua piri mou tikāi rātou ki te 'Atu ē nā roto mai 'oki i a rātou i pararauare atu ei te karere a te 'Atu ki te au ngā'i rava rāi i roto i taua tu'anga 'enua ra (1.8). Ko tēia leta kua manako'ia ē, ko te leta mua tikāi ia tā Paulo i tātā. Ē pērā katoa rāi 'oki, ko tēia te tātā'anga mua o te Kōreromotu 'Ōu.Nō te mea kua pāto'i pakari tēta'i pāpāki tangata i Tēsālōnia i tā Paulo karere, 'e mea umuumu'ia e ia i te 'oro kē ki Ātene. Mei reira mai, kua 'akaunga atu aia i a Tīmōteo ki a rātou kia kitea te tū o tō rātou 'akarongo (3.1-5). I te 'oki'anga mai, kua 'apai mai a Tīmōteo i te tuatua mataora ki a Paulo nō runga i tō rātou 'akarongo ē te aro'a (3.6-10).'E au manamanatā 'oki tō roto i te 'ēkālēsia. Koia 'oki, ko tēta'i au mema 'ēkālēsia, kāre rātou e rave 'aka'ou i tēta'i 'anga'anga, nō te mea, kua manako rātou ē kua vaitata mai te tae'anga o te 'Atu (4.11,12). Ē tēia katoa tēta'i: kua mate ēta'i o tō rātou kōpū tangata ē tō rātou au 'oa i mua ake i te rā o te 'Atu. Nō reira, kua tīmata a Paulo i te 'akamārama i a rātou nō runga i te ka tupu i te tae'anga mai o te 'Atu (4.11,12), ē kua 'akaāri katoa aia ki a rātou i te au 'ākono'anga tau i a rātou e tae 'ua atu ki taua rā ra (5.1-11).'E mea tau rāi kia 'akama'ara'ia mai te 'akamāro'iro'i'anga 'openga a Paulo, koia 'oki,“E rekareka kōtou i te au 'ati'anga rava rāi. E pure kōtou, 'aua e tīvata. E 'akameitaki i te Atua i te au mea katoa ra. Ko tēia ngā mea 'oki ko tō te Atua ia anoano nō kōtou i tō kōtou piri'anga ki te Mesia ko Iēsū” (5.16-18).Te 'akano'ono'o'anga o tēia leta1. Te aro'a'anga 1.1-32. Te 'akarongo ē te 'ākara'anga o tō Tēsālōnia 1.4—3.133. Te tū ora'anga e mareka ai te Atua 4.1-124. Te tae'anga mai o te 'Atu 4.13—5.115. Tā Paulo pati'anga ē te 'akamatakite'anga 'openga 5.12-226. Te ve'eve'e'anga aro'a 5.23-28