'Anga'anga 23 - Cook Island Maori Revised New Testament(CIMRNT)

1Kua tīroi matariki atura a Paulo ki te Sūnēderi, nā kō atura, “E tama mā ē te aronga taeake nei, i no'o 'ua ana 'oki au ma te 'akavā ngākau meitaki ki mua i te aroaro o te Atua, e tae rava ake nei ki tēianei rā.”

2Ko te Ta'unga Ma'ata ra ko Ānania, kua 'akaue atura aia i a rātou i tū vaitata ra ki te pae i a Paulo, “E moto atu i tōna va'a.”

3Māt 23.27,28I reira tō Paulo karanga'anga atu ki aia, “Ka motokia mai rāi koe e te Atua, e tēnā na patu 'akateatea'ia ē! Tē no'o maina koe i ko nā nō te 'akavā mai i āku mei tei tau i te Ture ra, ē ko koe tikāi tei 'atikau i te Ture nā roto i te 'akaue'anga ē kia motokia mai au!”

4Kua tuatua maira te aronga i tū 'ua i vaitata ki a Paulo ra, “Tē 'akakino nei koe i te Ta'unga Ma'ata a te Atua!”

5 Exo 22.28 Kua pa'u atura a Paulo, “E te au taeake ē, kāre 'oki au i kite ko ia te Ta'unga Ma'ata; kua oti 'oki i te tātā'ia ē, ‘Auraka koe e tuatua kino atu i te tūtara o te 'iti tangata na.’ ”

6 Anga 26.5; Phil 3.5 Kia nakiro akera a Paulo ē, 'e Sādukea tēta'i pae o rātou ē 'e Phārīsea 'oki tēta'i pae, kua kāpiki atura aia i roto i taua 'uipā'anga Sūnēderi ra, “E tama mā ē te au taeake nei, 'e Phārīsea au, 'e tamaiti 'oki nā te Phārīsea. Tē 'akavā'ia mai nei au nō tōku tatari'anga i te tū'aka'ou'anga i tei mate ra.”

7I te tuatua'anga atu aia i taua tuatua ra, kua tupu atura te taumārō'anga i rotopū i te au Phārīsea ma te au Sādukea; ē mavete atura taua putuputu'anga ra.

8Māt 22.23; Mār 12.18; Luk 20.27I karanga 'oki te au Sādukea ē, kāre 'ua 'e tū'aka'ou'anga, kāre katoa 'e 'āngela, ē kāre katoa 'e vaerua; kāreka rā te au Phārīsea, kua 'āriki rātou i te reira au mea pou roa.

9'E ma'ata rava atura te māniania; kua tū akera ēta'i Pū'āpi'i Ture nō te pāpāki o te au Phārīsea, ē kua mārō ketaketa atura, nā kō atura, “Kāre rava 'e kino o tēianei tangata i kitea'ia e mātou. Pēnei ake 'e vaerua tei tuatua mai ki aia ra, mē kāre ra 'e 'āngela.”

10Nō te mea ē, tē ma'ata rava atura te karo, kua mataku i'ora te rangatira ma'ata ka 'ae'ae'ia a Paulo e rātou. Nō reira, kua 'akaue atura aia i te aronga va'e'au e 'aere ki raro e rave mai i aia mei rotopū mai i a rātou ra, e taki atu ki roto i te pūnanga ra.

11Ē i tērā a'o mai pō, kua mama maira te 'Atu ki a Paulo, ē kua nā kō maira, “Kia māro'iro'i e Paulo; mei tā'au rāi i 'akakite i te tuatua nōku i Iērūsalēma nei, e 'akakite katoa 'oki koe i te reira i Rōma e tikāi.”

Te kotikoti kupenga'anga nō te tā i a Paulo kia mate

12E ao akera, kia oti te kotikoti kupenga'anga a ēta'i pae Ngāti Iūda, kua tia i'ora rātou 'ua'orāi i te nā kō'anga atu ē, kāre roa rātou e kaikai, ē kāre katoa 'oki e inu, kia tāmate rava'ia a Paulo e rātou.

13E 'ā nga'uru tūmā taua aronga tangata ra i roto i tēia kotikoti kupenga'anga.

14Ē kua 'aere atura rātou ki te kau ta'unga nunui ē te aronga pakari ra, ē kua nā kō atura, “Kua rave mātou i tēta'i tia tapu nō mātou 'ua'orāi ē, kāre mātou e tongi i tēta'i 'ua atu mea kia mate tākiri rava a Paulo i a mātou.

15Nō reira, e 'akakite atu kōtou ma te Sūnēderi katoa ki te rangatira ma'ata, kia arataki mai aia i a Paulo āpōpō ki raro ki ō kōtou na, mei te mea atura ē, tē 'inangaro ra kōtou i te uiui meitaki atu rāi i te au mea kātoatoa nōna ra. Kua papa 'oki mātou i te tāmate tākiri atu i aia i mua ake e vaitata mai ei aia.”

16Kia 'akarongo akera rā te tamaiti a te tua'ine o Paulo i taua moetāpapa ra, kua 'aere atura aia ē kua tomo atura ki roto i te pūnanga, ē kua 'akakite atura i te reira ki a Paulo.

17I reira, kua kāpiki atura a Paulo i tēta'i o te au rangatira 'ānere ra, nā kō atura, “Ka arataki atu ana koe i tēianei tamaiti ki te rangatira ma'ata ra; 'e tuatua 'oki tāna ka 'akakite atu ki aia ra.”

18Kua rave akera te rangatira 'ānere i aia, ē kua arataki atura ki te rangatira ma'ata, ē kua nā kō atura, “Kua kāpiki mai te mou'āuri ra a Paulo i āku, ē kua pati maira i āku kia arataki mai au i tēianei tamaiti ki a koe nei, 'e tuatua 'oki tāna ka 'akakite atu ki a koe.”

19Kua mou akera te rangatira ma'ata i te rima o taua tamaiti ra, arataki atura i aia ki tēta'i ngā'i ko rāua anake 'ua, ē kua ui atura, “'E a'a tā'au tuatua ka 'akakite mai ki āku?”

20Kua pa'u maira aia, “Kua 'akakoro 'oki te Ngāti Iūda e pati atu ki a koe, kia taki atu koe i a Paulo ki raro āpōpō ki roto i te Sūnēderi, mei te mea atura ē, tē 'inangaro ra rātou i te uiui meitaki atu i te au tuatua kātoatoa nōna ra.

21Auraka rā koe e 'akatika atu i tā rātou, nō te mea, tē moetāpapa maira e 'ā nga'uru tūmā tangata i aia. Kua tia 'oki rātou i a rātou 'ua'orāi ē, kāre rātou e kaikai ē kāre 'oki e inu kia mate tākiri rava atu a Paulo i a rātou. Kua papa rātou i tēianei rāi, ē tē tāpapa maira rātou i tā'au 'akatika'anga atu.”

22Kua tuku maira te rangatira ma'ata i taua tamaiti kia 'aere ma te ako'anga mai ē, “Auraka rava koe e 'akakite ki tēta'i 'ua atu tangata ē, kua 'a'aki mai koe i ēia nei mea ki āku.”

Kua tono'ia a Paulo ki te tūtara ra i a Fēliki

23Kua kāpiki atura te rangatira ma'ata i e tokorua rangatira 'ānere ra, ē kua karanga atura, “Ka 'akate'ate'amamao mai e rua 'ānere va'e'au, ē e 'itu nga'uru aronga 'aka'oro 'oro'enua, ē e rua 'ānere aronga kō tao nō te 'aere ki Kaisarea i te ora iva i tēia pō nei.

24E tiki rāi 'oki i ēta'i 'oro'enua 'ei 'apai i a Paulo nā runga, kia tae meitaki atu aia ki te tūtara ra ki a Fēliki ra.”

25'E leta 'oki tāna e tātā ra mei tēia te tū:

26“Nā Kalaudio Lūsia, ki te tūtara ngāteitei, ki a Fēliki, kia orana.

27I 'opukia tēnā na tangata e te Ngāti Iūda ē tē 'aere ra rātou ka tā i aia kia mate tākiri; i roko'ia atu rā rātou e au ma te pupu va'e'au katoa 'oki, ē kua 'akaora maira au i aia i tōku nakiro'anga ē, 'e tangata Rōma aia.

28E 'inangaro akera au kia kite au i te 'apa i tāpepe mai ei rātou i aia ra, kua arataki atura au i aia ki roto i tō rātou Sūnēderi ra.

29Kite akera au ē, i tāpepe'ia aia i te tuatua mārō'ia i roto i tō rātou 'ua'orāi ture, kāre rā 'e tāpepe'anga nōna e tau ei i aia te mate, mē kāre ra i te mou'āuri.

30Ē kia 'a'aki'ia mai ki āku ē, 'e moetāpapa tā te Ngāti Iūda e 'akakoro ra nō taua tangata nei, 'akaue ake nei au kia arataki'ia atu aia ki a koe na, ē kua 'akaue katoa atu nei au i te aronga i tāpepe mai i aia ra, kia 'akakite atu ki a koe i tā rātou tāpepe'anga i aia. Kia orana.”

31Kua rave akera aua va'e'au ra i a Paulo, mei tei 'akaue'ia maira, e arataki atura i aia ki Ānētipāteri i te pō ra.

32Ē i te ao'anga ake, tuku'ia maira nā te aronga 'aka'oro 'oro'enua e arataki i aia, 'oki maira te au va'e'au ki te pūnanga.

33E tae atura taua aronga 'aka'oro 'oro'enua ra ki Kaisarea, kua 'ōronga atura i te leta ki te tūtara, ma te tuku katoa atu i a Paulo ki mua i tōna aroaro.

34Ē kia oti i te tatau'ia ra, kua ui maira te tūtara ē, nō tē'ea 'enua mai aia ra. Ē i tōna nakiro'anga ē, nō Kilikia mai aia ra,

35kua nā kō maira aia, “Kia tae katoa mai te aronga i tāpepe i a koe na, e 'akarongo atu ei au i a koe.” Ē kua 'akaue atura aia e vai'o i aia ki roto i te ngā'i 'akavā'anga o Heroda ra.