Philipi 1 - Cook Island Maori Revised New Testament(CIMRNT)

Te aro'a'anga

1 Anga 16.12 'E leta tēia nō kō mai i a Paulo ē Tīmōteo, 'e ngā tāvini rāua nō te Mesia ko Iēsū, ki te aronga tapu rava rāi ma tō rātou au arataki ē tō rātou tauturu i Philipi na i tā'okota'i'ia i roto i te Mesia i a Iēsū:

2Kia 'ōronga 'ua mai te Atua tō tātou Metua ē te 'Atu ko Iēsū Mesia i te aro'a 'ua ē te 'au ki a kōtou.

Tē pure nei a Paulo nō tō Philipi

3Tē 'akameitaki atu nei au i taku Atua i te au 'ati'anga rava rāi e ma'ara atu ana au i a kōtou,

4ē kāre 'ua atu au e vata ana i te pure ma te rekareka i tāku nei au pure katoa nō kōtou rava rāi,

5nō te mea, kua piri mai kōtou ki te 'anga'anga 'ēvangelia mei te rā mua mai rāi e tae 'ua mai ki tēia noa ai.

6'E mea pāpū 'oki i āku ē, ko te Atua tei 'akamata i te 'anga'anga meitaki i rotopū i a kōtou na, nāna rāi e 'akatinamou i te reira e tae 'ua atu ki te rā o te Mesia ra ko Iēsū.

7'E mea tika 'oki kia 'akapērā au i te manako i a kōtou rava rāi, nō te mea, tē mou nei au i a kōtou i roto i tōku nei ngākau, i a kōtou rava rāi tei piri ki te aro'a 'ua i 'ōronga'ia mai ki āku i tōku mou'āuri'anga i tēianei, ē pērā katoa i tāku pāruru'anga ē te 'akapāpū'anga i te tika o te 'ēvangelia i mua ake.

8Ko te Atua 'oki 'e kite tikāi nōku ē, tē 'inangaro ma'ata rava nei au i a kōtou rava rāi ma te aro'a ngākau o te Mesia ra ko Iēsū.

9Ē ko tēia 'oki tāku pure; kia tupu ē kia tupu 'ua atu rāi tō kōtou aro'a ki te pakari mou ē te kite 'ō'onu rava rāi,

10kia taka meitaki i a kōtou te au mea 'e ma'ata 'ua atu te meitaki. I reira, ka riro kōtou 'ei aronga mā tikāi ē te 'apakore e tae 'ua atu ki te rā o te Mesia ra.

11Ka 'akakī'ia 'oki kōtou ki tā te tuatua tika i 'akatupu nā roto i a Iēsū Mesia ra, kia 'akakakā'ia te Atua ē kia 'akapa'apa'a'ia.

Te ora'anga nōku ko te Mesia ia

12E te au taeake ē, tē 'inangaro nei au kia kite kōtou ē, kua riro mai te au mea i roko'ia mai ei au nei 'ei 'akatupu i te 'ēvangelia,

13Anga 28.30nō te mea, kua kitea mai e te au va'e'au kātoatoa i tiaki i te 'are o te ariki, ē te aronga kē katoa ra, 'e mou'āuri au nō te Mesia.

14Ē te ma'ata'anga o te au taeake kua 'akapāpū'ia tikāi rātou i tō rātou piri'anga ki te 'Atu nā roto i tōku mou'āuri'anga, ē tē tae rāi rātou i te tuatua i te karere ma te matakukore.

15'E tika rāi, tēta'i pae o rātou e tūtū 'aere nei i te tuatua meitaki o te Mesia nō te vare'ae ē te mārō, kāreka tēta'i pae nō te 'inangaro mou ia.

16Ko tēia aronga 'inangaro mou i pērā ai nō te aro'a 'oki, nō te mea, kua kite rātou ē, kua tuku'ia mai ki āku te 'anga'anga pāruru 'ēvangelia.

17Kāreka taua aronga vare'ae ra e 'akakite 'aere i te Mesia, kāre ma te manako tika, nō tō rātou 'ua'orāi pu'apinga rā ē ma te manako ē ka 'akama'ata rātou i tōku tūmatetenga i tōku mou'āuri'anga nei.

18Kāre rā e kino! Tē rekareka nei au kia 'akakite 'aere'ia te Mesia nā roto i te au rāvenga rava rāi, mē nā roto i te tāpikipiki'anga, mē kāre, nā roto i te 'akakoro'anga mou. Ē ka rekareka rāi au,

19nō te mea, kua kite au ē, ka riro mai te reira 'ei meitaki nōku nā roto i tā kōtou pure ē te tauturu tā te Vaerua o Iēsū Mesia e 'ōronga mai ki āku.

20Ko tōku 'inangaro ma'ata tikāi 'oki ē te mānakonako'anga, kia kore au e tā'akamā'ia mai e tēta'i 'ua atu mea tāku i rave, kia 'akapa'apa'a rā au i te Mesia i tēianei, mei te au 'ati'anga rava rāi ma te māro'iro'i ma'ata noa atu ē, 'e a'a te ka tupu mai ki āku, mē nā roto i te ora, mē kāre nā roto i te mate.

21Nōku 'oki kia ora au ra nō te Mesia ia, ē kia mate au ra nō te pu'apinga ia.

22Mē ora rā au i te kōpapa nei, ka pu'apinga te 'anga'anga. Nō reira, kāre au e kite ē, 'e a'a tikāi te mea tāku e 'inangaro.

23Kua tā'ī'ī'ia au i ēia ngā mea e rua: tē 'inangaro pakari nei au i te 'aere atu ki te Mesia ra no'o ei. Ko te mea meitaki ma'ata 'ua atu 'oki te reira.

24Nō kōtou rā, 'e mea umuumu ma'ata'ia kia no'o rāi au i roto i te kōpapa nei.

25Ē nō te mea ē, 'e mea pāpū i āku te reira, tē kite nei au ē, ka no'o rāi au ē ka tauturu au i a kōtou kātoatoa kia tupu tō kōtou 'irinaki'anga ē tō kōtou rekareka.

26Nō reira, kia tae 'aka'ou atu au ki a kōtou na, ka ma'ata atu tō kōtou parau'anga nōku i roto i te Mesia ra ko Iēsū.

27Kia tau rā tō kōtou 'aerenga ki te 'ēvangelia a te Mesia ra e tikāi. I reira, mē ka tae atu au e 'ārāvei i a kōtou, mē kāre ka no'o ātea kē, ka 'akarongo rāi au i te tuatua nō kōtou ē, tē tāmou mārie rāi kōtou ma te manako 'okota'i ē te aruaru rāi kōtou ma te ngākau 'okota'i i te 'akarongo o te 'ēvangelia nei,

28ma te kore e 'akamataku'ia i tēta'i 'ua atu mea e te aronga i pāto'i i a kōtou. Ka riro mai 'oki te reira nō rātou 'ei 'akairo o te mate, nō kōtou rā 'ei 'akairo o te ora, 'e ora 'oki nō kō mai i te Atua ra.

29Kua 'ōronga'ia mai 'oki ki a kōtou ē, auraka anake kia 'irinaki kōtou i te Mesia, kia mate katoa rā kōtou nōna.

30Anga 16.19-40Tei a kōtou rāi i reira te kukumi'anga mei tā kōtou i kite i āku i te pērā'anga i mua ake, ē tā kōtou i 'akarongo ra ē tē pērā nei rāi au i tēianei.