2 Kōrīnētia 6 - Cook Island Maori Revised New Testament(CIMRNT)

1Ko mātou, i reira, tē 'anga'anga kāpiti nei mātou ma te Atua. Kua 'āriki kōtou i te aro'a 'ua o te Atua. Ē nō reira, tē pati 'akatenga atu nei mātou ki a kōtou ē, auraka te reira kia riro 'ei mea pu'apingakore.

2Isa 49.8E 'akama'ara i tāna i karanga ra ē,

“Kua 'akarongo au i a koe i te tuātau tau ra,

ē kua tauturu atu au i a koe i te rā o te rāvenga ora.”

Inā, tēia taua tuātau tau rava nei, ē tēia taua rā o te rāvenga ora nei.

Tō Paulo au mate nō te tāvini'anga i te Atua

3Kāre 'oki mātou e tuku ana i tēta'i 'ua atu tūrori'anga ki te tangata, ko te 'akakino'ia ā'ea tō mātou nei tao'onga.

4Inārā, tē 'akakitekite pāpū 'ua nei mātou i a mātou 'ua'orāi nā roto i te au mea rava rāi ē, 'e au tāvini mātou nō te Atua ma te 'akakoromaki mārie tikāi. Koia 'oki, i te tīnaimate, te au tū apiapi ē te au tūmatetenga;

5Anga 16.23te pāpā'anga'ia, te tāpeka'anga'ia ē te kōnoninoni pū 'ua'anga'ia; te 'anga'anga ma'ata, te ngere'angā moe ē te 'akakore'angā kai.

6Pērā katoa, te karape ē te 'apakore o tō mātou 'akakoro'anga; te 'akakoromaki'anga roa ē te tū tākinga meitaki; te 'apinga aro'a a te Vaerua Tapu ē te aro'a pikika'akore;

7te karere o te tuatua mou ē te mana o te Atua. Ko te tuatua tika tā mātou tao'onga tamaki i te rima katau ē te rima kaui.

8Kua 'akangāteitei'ia mātou ē kua tā'akamā'ia; 'e rongo kino tō mātou ē te rongo meitaki katoa. Kua karanga'ia mātou ē, 'e aronga pikika'a, inārā, 'e aronga tuatua mou tikāi mātou.

9'E aronga mātou kāre tākiri i kitea, kua kitea meitaki'ia rā e te kātoatoa. 'E aronga mātou mei te mea ē tē mate nei, ē inā, tē ora nei rāi mātou. 'E aronga mātou tē 'akautunga'ia nei, kāre rā i tāmate rava'ia.

10'E aronga mātou tē auē nei, kāre rā i tīvata i te rekareka. 'E aronga mātou tē puta'ua nei, inārā, tē 'akariro nei mātou i te tangata 'e mānganui 'ei 'apinga nui. 'E aronga mātou kāre ō mātou 'apinga, inārā, tei a mātou te au mea kātoatoa nei.

11Tē mā'eu'eu nei tō mātou va'a ē tē mā'ora'ora 'ua nei tō mātou ngākau ki a kōtou, e tō Kōrīnētia ē!

12Kāre kōtou i 'akakena'ia e mātou, kua 'akakena'ia rā kōtou e tō kōtou 'ua'orāi ngākau.

13Ē tēianei, tē tuatua atu nei au ki a kōtou mei te metua ki tāna tamariki ē, e 'akama'ora katoa mai kōtou i tō kōtou ngākau ki a mātou, mei a mātou ki a kōtou na.

Te nao o te Atua ora

14Auraka kōtou e kāpiti'ia atu ki te aronga 'akarongokore; kāre kōtou e 'āiteite ana. 'E a'a tō te tuatua tika tau'anga kite tuatua tikakore? 'E a'a tō te mārama piri'anga ki te pōiri?

15'E a'a te mareka'anga o te Mesia ki a Bēliala, koia te Tiāporo? Ē 'e a'a tō te tangata 'akarongo ra tu'anga ki te tangata 'akarongokore?

16a: 1 Kōr 3.16; 6.19; b: Lev 26.12; Ezek 37.27'E a'a te mea o te nao o te Atua i 'āite ki te au 'ītoro? Ko tātou 'oki te nao o te Atua ora ra; mei tā te Atua i karanga maira:

“E no'o tikāi au i roto i a rātou,

ē e 'ā'āere au i rotopū i a rātou,

ē 'ei Atua au nō rātou

ē 'ei 'iti tangata rātou nōku.”

17 Isa 52.11 Nō reira, tē nā kō maira te 'Atu,

“E 'aere kē atu kōtou mei rotopū mai i a rātou

ē e 'akatakakē i a kōtou.

Auraka e 'āmiri 'ua atu i te mea mā kore ra,

ē nāku e 'āriki atu i a kōtou.”

18 2 Sam 7.14; 1 Par 17.13; Isa 43.6; Ier 31.9 Ē pērā katoa,

“'Ei Metua au nō kōtou,

ē 'ei tamariki tamāroa ē te tamā'ine kōtou nāku,

tē tuatua maira te 'Atu Mana Kātoatoa ra.”