Rōma 13 - Cook Island Maori Revised New Testament(CIMRNT)

E kauraro i te aronga mana 'aka'aere

1Kia kauraro mārie te tangata kātoatoa i te aronga mana 'aka'aere i runga i a rātou. Kāre rava 'oki 'e mana kē atu, māri rā, nō kō mai i te Atua ra. Ē te aronga mana 'aka'aere e no'o nei, kua 'ākono'ia rāi ia e te Atua.

2Nō reira, ko tei pāto'i atu i te mana 'aka'aere, kua pāto'i ia i tei 'ākono'ia e te Atua ra; ē te aronga i pāto'i ra, ka 'akavā'ia rātou.

3Kāre 'oki te aronga tei rave i te meitaki e mataku i te au tūtara, ko te aronga rā tei rave i te kino. Tē 'inangaro āinei kōtou kia kore kōtou e mataku i te mana 'aka'aere? E rave i te meitaki, ē ka turu'ia mai i a kōtou.

4Nō te mea, 'e tāvini aia nō te Atua nō tō kōtou meitaki. Mē rave rā kōtou i te kino, e mataku kōtou i aia. Kāre 'oki aia e mou pu'apingakore 'ua ana i te koke. 'E tāvini 'oki aia nō te Atua i te tuku i tō te Atua riri ki te tangata rave kino.

5Nō reira, kia kauraro kōtou e tikāi, kāre rā 'oki ē nō taua riri anake ra, nō tō'ou 'akavā ngākau katoa rā.

6 Māt 22.21; Mār 12.17; Luk 20.25 Ko te tumu katoa 'oki ia e tūtaki tero nei kōtou, nō te mea, 'e au tāvini 'oki rātou nō te Atua i te rave tāmou mārie'anga i te reira.

7E tuku atu i te mea tau ki te tangata kātoatoa ra: te au tero tūkēkē ra ki te aronga ko'i tero; te 'akangāteitei'anga ra ki te tangata e tau kia 'akangāteitei'ia, ē te 'akateitei'anga ra ki te tangata e tau kia 'akateitei'ia.

Te aro'a taeake

8Auraka kōtou e kaio'u i tēta'i 'ua atu mea nā tēta'i 'ua atu tangata, māri rā kia aro'a atu kōtou tēta'i ki tēta'i. Ko tei aro'a atu 'oki i tēta'i kē ra, kua 'ākono ia i te Ture katoa ra.

9a: Exo 20.14; Deut 5.18; b: Exo 20.13; Deut 5.17; c: Exo 20.15; Deut 5.19; d: Exo 20.17; Deut 5.21; e: Lev 19.18Ko te au 'akaue'anga nei: “Auraka koe e 'akaturi, auraka koe e tā 'ua, auraka koe e keiā, auraka koe e morimori,” ē mē tē vai atura tēta'i 'akaue'anga kē atu, kua tā'okota'i'ia mai rātou ki roto i tēia 'īrava nei: “E aro'a atu koe i tō'ou tangata tupu mei a koe 'ua'orāi.”

10Kāre rava 'oki te aro'a e tākinga kino atu i te tangata tupu; ko te aro'a māri 'oki, ko te 'aka'openga ia o te au ture pou roa.

Te tamariki o te mārama

11Ē tēnā na, kua kite 'oki kōtou ē, kua tae ki te ora ara'anga mei tā kōtou moe, nō te mea, kua vaitata roa mai te rāvenga ora nō tātou i tēianei i te 'ōu'anga mai o tō tātou 'irinaki'anga.

12Koi ka 'ope te pō, kua vaitata te ao; e 'akaātea tātou i reira i te 'anga'anga a te pōiri, ē e kāka'u tātou i te tā'onga tamaki o te mārama.

13'Ei 'aerenga tau tō tātou mei te 'aerenga mārama ra, auraka ma te peu kino ē te kona, auraka ma te 'akaturi ē te peu vi'ivi'i, auraka ma te taumārō ē te vare'ae.

14E kāka'u rā i te 'Atu i a Iēsū Mesia, ē auraka e manako 'aka'ou i te āru i te au noinoi o te kōpapa ra.