Kolosa 2 - Cook Island Maori Revised New Testament(CIMRNT)

1Tē 'inangaro nei au kia kite kōtou i tāku tautā'anga pakari i te meitaki nō kōtou, ē nō rātou i Laodikea ē te aronga katoa kāre i kite mata i tōku mata.

2Kia pūma'ana'ia tō rātou ngākau i te tā'okota'i'anga'ia i roto i te aro'a, kia rauka i a rātou te meitaki ma'ata o te pāpū'anga o te kite pū tikāi. I reira, ka nakiro rātou i te mea muna ngaro a te Atua, ko te Mesia ra ia.

3Tei roto i aia te 'u'una'ia'anga te au 'apinga nui rava rāi o te kite ē te pakari.

4Tē tuatua nei au i tēia kia kore tēta'i 'ua atu tangata e tāpikipiki i a kōtou nā roto i te tuatua 'akarekareka.

5Noa atu ē kāre au tikāi i rotopū i a kōtou, tei ō kōtou na rā tōku manako'anga, ē tē rekareka nei au i te kite'anga ē, 'e tū mako tikāi tō kōtou ē tē mou meitaki nei tō kōtou 'akarongo i te Mesia.

Te kī o te ora i roto i te Mesia

6Ē tēnā na, e āru kōtou i te taka'inga vaevae o te Mesia ko Iēsū, nō te mea, kua 'āriki kōtou i aia.

7Kia aka'ia kōtou i roto i aia ē kia patu'ia ki runga a'o i aia. Kia 'akamou'ia e te 'akarongo mei tei 'āpi'i'ia ki a kōtou na, ē kia ma'ata rava tō kōtou 'akameitaki'anga.

8E matakite ko te 'akatuika'a ā'ea tēta'i tangata i a kōtou nā roto i te pakari tangata ē te taumārō'anga pu'apingakore. E tau 'ua te reira i te 'āpi'i'anga tangata nei ē tō tēianei ao 'akateretere'anga mana. Kāre te reira e tau i tā te Mesia ra.

9Tei roto 'oki i aia, i tōna tū tangata, te kī katoa o te Atua i te pū'ākapa'anga mai.

10Ē kua rauka katoa i a kōtou te kī o te ora tika tikāi i roto rāi i aia. Ko ia tō runga ake i te au manārangi rava rāi ē te au tūtara.

11Nō tō kōtou piri'anga ki aia, kua riro kōtou 'ei aronga peritome'ia, kāre rā te peritome'anga tei rave'ia e te tangata, ko te peritome'anga rā a te Mesia, koia 'oki, te kōpae'anga i te tū 'ara o te tangata ra.

12Rōm 6.4I tō kōtou bāpetīto'anga kua tanu katoa'ia kōtou ma te Mesia ra. Ē kua 'akatū katoa'ia kōtou ma ia nā roto i tō kōtou 'akarongo i te mana o te Atua tei 'akatū i aia mei te mate maira.

13Eph 2.1-5Ko kōtou 'oki, 'e aronga mate kōtou nō tā kōtou au 'ara ē te tū peritomekore, kua 'akariro rā te Atua i a kōtou 'ei aronga ora ma te Mesia katoa. Kua tāmā te Atua i tā tātou au 'ara rava rāi.

14Eph 2.15Kua 'akakore aia i te kaio'u tei 'akapapa'ia nō tātou nō tō tātou 'ākonokore i te au ture. Kua 'apai kē 'oki aia i te reira ē kua pātiti ki runga i te sātauro.

15Kua 'autū aia ki runga a'o i te au manārangi ē te au tūtara ē kua 'akariro atura i a rātou 'ei mātakitaki'anga i mua a'o i te kātoatoa i tōna 'aerenga ūpokotū.

16 Rōm 14.1-6 Nō reira, auraka tēta'i tangata e 'aka'apa i a kōtou nō runga i te kai ē te mea inu ra, mē kāre, nō runga i te au rā tapu, te marama 'ōu ē te Sābati.

17'E ata anake ia nō te au mea te ka tupu ā muri atu. Ko te mea mou tikāi rā ko te Mesia ia.

18Auraka tēta'i tangata e 'akangere i a kōtou i te meitaki e tau i a kōtou, nā roto i tōna 'akateima'a'anga i te tū 'aka'aka tārevakē ē te 'akamori'anga i te au 'āngela. Tē manako nei taua tangata ra ē, 'e mana tūkē tōna nō te au 'ōrama tāna i kite ana, ē 'e nengonengo pu'apingakore tōna nō te manako tangata 'ua.

19Eph 4.16Ē kāre aia i mou piri tikāi ki te ūpoko, koia 'oki, ki te Mesia. Nā te ūpoko 'oki e 'ōronga mai ki te kōpapa katoa ra i tōna tupu'anga mei tei tau ki tō te Atua anoano, nā roto i te tā'okota'i'anga ē te mou piri'anga o te au pa'unga ē te au uaua.

Te mate'anga ē te ora'anga ma te Mesia

20Ē tēianei, kua mate kōtou ma te Mesia i te 'akateretere'angā mana o tēianei ao. 'E a'a kōtou i reira i āru ei i tōna au ture, mei te mea ē, nō tēianei ao rāi kōtou?

21Ko tōna au ture 'oki, “Auraka e 'arapaki, auraka e tongi, auraka e 'āmiri.”

22'E au ārai'anga te reira ē te 'āpi'i'anga tangata anake 'ua, nō runga 'ua te reira i te au mea te ka ngaro 'ua mē 'akapu'apinga'ia.

23Ko taua au ture ra e meitaki anake nō te 'akamori'anga a te tangata, te tū 'aka'aka tārevakē ē te 'akapereperekore i te kōpapa. Kāre rā 'e pu'apinga i te 'akavī i te noinoi kōpapa.