2 Timōteo 1 - Cook Island Maori Revised New Testament(CIMRNT)

Te aro'a'anga

1'E leta tēia nō kō mai i a Paulo, 'e 'āpōsetolo nā te Mesia ra ko Iēsū, nā roto i te tika'anga o te Atua 'ei tūtū 'aere i te papa'u'anga o te ora'anga nā roto i tō tātou piri'anga ki te Mesia ra i a Iēsū,

2Anga 16.1ki a Tīmōteo, taku tamaiti 'akaperepere.

Kia 'ōronga 'ua mai te Atua te Metua ē Iēsū Mesia tō tātou Atu i te aro'a 'ua, te tākinga meitaki e te 'au ki a koe.

'Akameitaki'anga ē te 'akamāro'iro'i'anga

3Tē 'akameitaki atu nei au i te Atua, tāku e tāvini nei ma te 'akavā ngākau ti'amā mei tōku 'ui tupuna rāi. Tē 'akameitaki atu nei au i aia i tōku manako tinamou'anga i a koe i roto i tāku nei au pure i te pō ē te ao.

4I tōku ma'ara'anga i tō'ou roimata, tē 'inangaro pakari nei au i te 'ārāvei atu i a koe, kia kī mai tōku ngākau i te rekareka.

5Anga 16.1Kua 'akama'ara'ia 'oki e au tō'ou 'akarongo pikika'akore, tei kite'ia ana rāi i roto i tō'ou tupuna va'ine, i a Loi, ē i roto katoa i tō metua va'ine, i a Eunike, tei nā mua i a koe. 'E mea pāpū 'oki i āku tei a koe katoa rāi te reira.

6Nō reira, tē 'akama'ara atu nei au ki a koe ē, e 'akaaraara koe i te 'apinga aro'a tā te Atua i 'ōronga mai ki a koe na nā roto i te tuku'anga i taku rima ki runga i a koe.

7Kāre 'oki te Atua i 'ōronga mai ki a tātou i te Vaerua kia mataku tātou, kia māro'iro'i rā, kia aro'a ē kia 'ākono meitaki.

8'Eia'a koe i reira e 'akamā i te 'akakite atu i tō tātou 'Atu. 'Eia'a katoa e 'akamā i āku 'e mou'āuri nōna. Kia tū katoa rā koe i te mate nō te 'ēvangelia nei ma te 'irinaki i te ririnui o te Atua ra.

9Ko ia tei 'akaora i a tātou nei ē tei kāpiki i a tātou ki te ora'anga tapu, kāre nō te au mea tā tātou i rave, nō tōna 'ua'orāi rā 'akakoro'anga ē te aro'a 'ua tei 'ōronga'ia mai ki a tātou nā roto i te Mesia ra i a Iēsū mei 'ito mai rāi.

10Kua 'akaāri 'ua'ia maira rā te reira i tēianei nā roto i te mama'anga mai o tō tātou 'Akaora, ko te Mesia ra ko Iēsū, ko tei 'akakore i te mate nei ē tei 'akakite pū mai i te ora ē te tū matekore nā roto i te 'ēvangelia.

11 1 Timo 2.7 Ē ko au, kua 'ākono'ia au nei 'ei karere, 'ei 'āpōsetolo, ē 'ei pū'āpi'i nō taua 'ēvangelia ra.

12Nō reira 'oki i roko'ia mai ei au e tēia au mate nei. Kāre rā au i 'akamā; tē mārama nei 'oki au i tāku e 'irinaki atu nei, ē 'e mea pāpū i āku ē, ka rauka i aia i te 'ākono meitaki i tāna i tuku mai ki āku e tae 'ua atu ki taua rā ra.

13E 'akapu'apinga i te 'āpi'i'anga mou tā'au i 'akarongo mei konei atu i āku nei 'ei 'ākara'anga, ma te 'irinaki'anga ē te aro'a tei rauka mai nā roto i te Mesia ra i a Iēsū.

14E 'ākono i te meitaki tei tukuna'ia atu ki a koe na nā roto i te tauturu a te Vaerua Tapu e no'o nei i roto i a tātou nei.

15Kua kite 'oki koe ē, kua 'akaruke mai tō Āsia kātoatoa i āku. Ko Phugelo ē Heremōgene ēta'i o rātou.

16Kia 'akaāri mai te 'Atu i te aro'a ki te ngutu'are tangata o Ōnēsiphōro. Kua putuputu 'oki aia i te 'ō ake mai ki āku i te ngākau 'ōu, ē kāre aia i 'akamā i taku piri'anganaoa.

17I tōna tae'anga rā ki Rōma, kua kimikimi mārie aia i āku, ē kitea i'ora au.

18Kia 'ōronga mai te 'Atu ki aia kia kite aia i te aro'a nō kō mai i te 'Atu i taua rā ra! Ko koe 'oki, kua kite meitaki koe i te ma'ata o tōna tauturu'anga mai i āku i Ēphēsia na.