Iakobo 5 - Cook Island Maori Revised New Testament(CIMRNT)

'E 'akamatakite'anga i te aronga 'apinga nui

1E 'akarongo mai ana, e te aronga 'apinga nui, e auē ē e kākaoa nō te au tūmatetenga e roko'ia mai ei kōtou.

2Māt 6.19Kua piro tō kōtou 'apinga nui, kua pou tō kōtou kāka'u i te ne'u,

3ē kua pē tā kōtou 'auro ē te 'ārio. Ka riro tā rātou mōnene'u 'ei 'aka'apa i a kōtou, ē ka pou tō kōtou kōpapa i a rātou mei te a'i ra. Kua 'akaputu 'ua kōtou i te 'apinga nui i tēia au rā 'openga ra.

4Deut 24.14,15Inā 'oki, tē kāpiki nei te moni kāre i tūtaki'ia e kōtou ki te aronga 'anga'anga tei pākoti i tō kōtou au koro, ē te au aoaoa'anga o te aronga i kokoti i te mou ra kua puta rava ia ki roto i te taringa o te Atua, te 'Atu o te au nuku ra.

5Kua no'o nanave 'ua kōtou i te ao nei ma te kanga. Kua 'akapori kōtou i a kōtou 'ua'orāi nō te rā tainga.

6Kua 'aka'apa ē kua tāmate rava kōtou i te tangata 'apakore, tei kore i pāto'i atu i a kōtou na.

Te 'akakoromaki'anga

7Ē tēianei, e aku au taeake, e 'akakoromaki kōtou e tae 'ua atu ki te tae'anga mai o te 'Atu ra. E 'ākara na i te tangata tanu kai, tē tatari mārie 'ua ra aia i te kai pu'apinga ma'ata o te 'enua nei ma te 'akakoromaki mārie kia topa mai te ua mōmua ē te ua 'openga ra.

8E 'akakoromaki katoa 'oki kōtou, e 'akamātūtū i tō kōtou ngākau, kua vaitata mai nei te tae'anga mai o te 'Atu ra.

9Auraka e mārō atu tēta'i i tēta'i ko te 'akavā'ia ā'ea kōtou. Inā, tē tū 'ua maira te 'akavā i te ngūtupa ra.

10E aku au taeake, e ma'ara kōtou i te au peroveta tei tuatua i te ingoa o te 'Atu ra. E rave i a rātou 'ei 'ākara'anga i te 'akakoromaki mārie'anga i te au mate katoa.

11a: Iob 1.21,22; 2.10; b: Sal 103.8Inā 'oki, tē karanga nei tātou ē, 'e ao tō te aronga i 'akakoromaki mārie ana. Kua 'akarongo mai 'oki kōtou i te 'akakoromaki o Iōbu ra, ē kua kite katoa kōtou i tā te 'Atu i rave i te 'openga ra. Kua kī 'oki te Atua i te aro'a ē te tākinga meitaki ma'ata.

12 Māt 5.34-37 Te mea ma'ata rā, e te au taeake ē, auraka rava e taputo'u; auraka i te rangi, auraka i te 'enua nei, auraka i tēta'i taputo'u'anga kē atu. Kia riro tā kōtou “koia” 'ei “koia” rāi, ē tā kōtou “kāre” 'ei “kāre” rāi, ko te 'aka'apa'ia ā'ea kōtou e te Atua.

Te pure

13Kua tā'iro'ia āinei tēta'i o kōtou na? Ka pure aia. Kua rekareka āinei tēta'i? Ka 'īmene 'akameitaki aia.

14Mār 6.13Kua roko'ia āinei tēta'i o kōtou e te maki? E tiki i te aronga pakari o te 'ēkālēsia, ē nā rātou e pure i aia ma te 'akatā'inu i aia ki te manongi i te ingoa o te 'Atu ra.

15Ka ora te tangata maki i taua pure i pure'ia ma te 'irinaki'anga; nā te 'Atu 'oki aia ka 'akatū ki runga. Ē mē kua rave ana aia i te au 'ara, e 'akakore'ia rāi te reira.

16Nō reira, e 'a'aki kōtou i tā kōtou 'au 'ara tēta'i ki tēta'i, ē e pure 'oki tēta'i i tēta'i, kia 'akaora'ia mai kōtou. 'E mana ma'ata 'oki tā te tangata tuatua tika ra pure, ē ka manuia 'oki.

171 Arik 17.1; 18.1Ko Ēlia 'e tangata 'ua mei a tātou nei rāi te tū; kua pati 'akatenga atu aia i tāna pure kia kore e ua mai, ē kāre atura 'e ua i topa mai ki runga i te 'enua e toru mata'iti e ono 'oki marama.

181 Arik 18.42-45Ē kua pure 'aka'ou atura aia, ē kua 'ōronga mai te rangi i te ua, ē kua tupu atura te kai o te 'enua nei.

19E aku au taeake ē, kia 'aere kē tēta'i o kōtou mei te tuatua mou ra, ē nā tēta'i aia i 'aka'oki mai,

20Mase 10.12; 1 Pet 4.8kia kite pāpū aia ē, ko tei 'aka'oki mai i te tangata 'ara mei te mataara tārevakē ra, tē 'akaora maira aia i te vaerua o taua tangata ra mei te mate mai, ē kua tāpoki'ia te au 'ara 'e mānganui.