Tito 3 - Cook Island Maori Revised New Testament(CIMRNT)

Te tū tau o te ora'anga Keretitiāno

1E 'akamā'ara'ara atu i te au mema o tā'au 'ēkālēsia kia 'akamōraro rātou i te aronga mana ē te au 'aka'aere, kia kauraro atu i a rātou ē kia vai te'ate'amamao nō te rave i te au 'anga'anga mēmeitaki rava rāi.

2Auraka rātou e 'akakino i tēta'i 'ua atu tangata, 'eia'a e taumārōrō, kia marū rā ē kia 'akaāri i te 'akangāteitei tau ki te tangata rava rāi.

3I mua ana 'oki i nēneva 'ua ana tātou ē te kaurarokore, i tāpikika'a'ia, 'ei au tuika'a tātou nō te au noinoi tikakore ē te au mea navenave tūkēkē. Ē i no'o ana tātou ma te tū ngākau kavakava ē te vare'ae, i mākitakita'ia mai ē i mākitakita atu tēta'i i tēta'i.

4Inārā, kua mama mai te tākinga meitaki ē te aro'a o te Atua tō tātou 'Akaora nō te tangata,

5ē kua 'akaora'ia mai tātou e tōna aro'a. Kua rauka mai i a tātou te 'ānau 'aka'ou'anga ē te ora'anga 'ōu nā roto i te 'ōrei'angā vai ē te Vaerua Tapu, 'eia'a nō te 'anga'anga mēmeitaki tā tātou i rave ma te tuatua tika.

6Kua riringi ma'ata mai aia i te Vaerua Tapu ki runga i a tātou nā roto i a Iēsū Mesia tō tātou 'Akaora,

7kia riro tātou tei 'akatikatika'ia e tōna aro'a 'ua 'ei aronga tu'anga'ia i te ora mutukore nā roto i te mānakonako'anga.

8'E mea tau kia 'āriki'ia mai tēia karere. Ē tē 'inangaro nei au kia tāmoumou koe i te 'āpi'i atu i te reira, kia riro te aronga tei 'irinaki i te Atua 'ei aronga māro'iro'i tikāi i te rave i te au 'anga'anga mēmeitaki. Ko te mea meitaki ē te pu'apinga te reira nō te tangata nei.

9E 'āriu kē mai rā koe i te au taumārōrō'anga nēneva, te au papa tupuna, te au tau'ētono'anga ē te tamaki'anga nō runga i te au ture ra. 'E au mea pu'apingakore 'ua te reira ē kāre ō rātou meitaki.

10Auraka koe e piri atu ki te tangata 'āpi'i tārevakē tei oti i te ako'ia e ta'i, mē kāre, e rua ako'anga.

11Kua nakiro 'oki koe ē, kua piko kē taua tū tangata ra ē kua 'ara. Kua riro 'oki aia 'ei 'akavā i aia 'ua'orāi.

Te pōrokiroki'anga

12 Anga 20.4; Eph 6.21,22; Kol 4.7,8; 2 Timo 4.12 Kia tono atu au i a Aretema, mē kāre, i a Tūkiko ki a koe na, e tautā mai koe i te 'aere mai ki āku i Nīkōpoli. Tē 'akakoro nei 'oki au i te 'akaruru ki reira i te tuātau 'uri'ia.

13Anga 18.24; 1 Kōr 16.12E tauturu pakari koe i a Zena te rōia ē Āpolo i tō rāua tere kia kore rāua e ngere i tēta'i 'apinga.

14Kia 'āpi'i katoa'ia tō tātou au taeake kia riro mai rātou 'ei aronga māro'iro'i i te au 'anga'anga meitaki nō te au mea umuumu pakari'ia o te ora'anga, kia kore rātou e no'o pu'apingakore 'ua.

15Tē aro'a atu nei te au taeake kātoatoa ōku nei i a koe. E aro'a atu koe i tō tātou au 'oa i te 'akarongo nei.

'Ei a kōtou katoa na te aro'a 'ua.