Iakobo 1 - Cook Island Maori Revised New Testament(CIMRNT)

Te aro'a'anga

1 Māt 13.55; Mār 6.3; Anga 15.13; Gal 1.19 Ko au ko Iākōbo, 'e tāvini nō te Atua ē nō te 'Atu ra ko Iēsū Mesia, ki te au kōpū tino nga'uru mā rua i pue'urikiriki kē'ia i te ao nei. Kia orana kōtou.

Te 'irinaki'anga ē te pakari

2E aku au taeake, kia roko'ia kōtou e te au tīmata'anga tūkēkē ra, e manako 'ua ē, 'e mea rekareka 'ua te reira,

3nō te mea, kua nakiro kōtou ē, mē tīmata'ia tō kōtou 'irinaki'anga ka tupu te 'akakoromaki.

4E 'akapāpū rā kia rave te 'akakoromaki i tāna 'anga'anga katoa, kia riro kōtou 'ei aronga meitaki rava ē te 'apakore ma te kore e ngere i tēta'i 'ua atu mea.

5Inārā, mē tē ngere nei tēta'i o kōtou i te pakari, ka pati aia i te reira ki te Atua ra, ē ka 'ōronga'ia ki aia. Ko te Atua 'oki e 'ōronga aro'a 'ua mai ē ma te 'akamurakore ki te tangata rava rāi.

6Kia pati rā ma te 'irinaki'anga ē te 'ēkōkōkore. Ko tei 'ēkōkō ra, e 'āite aia ki te ngaru tai e pū'ia ē e tikitiki'ia e te matangi.

7'Eia'a taua tū tangata ra e manako ē, ka rauka i aia tēta'i mea nō kō mai i te 'Atu ra.

8'E tangata ngākau rua 'oki ia ē e pāpūkore aia i tōna au 'aerenga katoa ra.

Te ngere ē te 'apinga nui

9Kia rekareka te taeake tūranga 'aka'aka i te mea ē kua 'akateitei'ia aia e te Atua.

10Isa 40.6,7Ko te 'apinga nui rā, kia rekareka ē kua tā'aka'aka'ia aia. Ka ngaro kē 'oki aia mei te tiare o te ngāngā'ere ra.

11Nō te mea, kua teitei te rā ma te veravera ma'ata, mae atura te ngāngā'ere, topa i'ora tōna tiare, ē ngaro atura taua tū mānea nōna ra. Pērā katoa ka ngaro rāi te tangata 'apinga nui i tōna kimi'anga pu'apinga.

Te au tīmata'anga

12'E ao tō te tangata e 'akakoromaki i te tīmata'anga, nō te mea, mē oti te tīmata'anga ka rauka i aia te korōna ora tā te 'Atu i papa'u mai ki te aronga tei 'inangaro atu i aia.

13'Eia'a rava 'e tangata tei tīmata'ia mai e 'akakite ē, “Kua tīmata'ia au e te Atua.” Kāre 'oki e rauka kia tīmata'ia te Atua e te au mea kino, ē kāre katoa aia e tīmata i tēta'i 'ua atu tangata.

14Kia tīmata'ia rā tēta'i tangata, kua 'akatātipakē'ia aia ē kua tā'ei'ia e tōna 'ua'orāi noinoi tikakore.

15Kua tō i reira te noinoi tikakore ē kua 'ānau i'ora i te 'ara, ē te 'ara kia tupu ki te ma'ata roa ka 'ānau i te mate.

16Auraka kōtou e vāvare, e aku au taeake 'akaperepere ē!

17Te au 'apinga aro'a pu'apinga ē te meitaki rava kātoatoa mei runga mai ia, tē 'aere mai nei nō kō mai i te Metua o te au mārama o te rangi ra, kāre rava ōna tūkē'anga ē kāre aia e 'akatūkē'ia.

18Nō tōna 'ua'orāi anoano i 'aka'ānau mai ei aia i a tātou nā roto i te tuatua mou kia riro tātou mei te 'ua mua o te au mea i 'anga'ia mai e ia ra.

Te 'akarongo'anga ē te 'ākono'anga

19E 'akamanako kōtou i tēia, e aku au taeake 'akaperepere ē, kia rapurapu 'ua te tangata rava rāi i te 'akarongo mai, kia mārie rā i te tuatua atu, kia mārie katoa i te riri.

20Kāre 'oki te riri o te tangata e 'akatupu i te tuatua tika mei tā te Atua i 'akakoro.

21Nō reira, e 'akaātea i te au mea vi'ivi'i ē te au tū kino rava rāi o tō kōtou ora'anga, ē e 'āriki ma te marū i tei tanumia ki roto i tō kōtou ngākau, ko te karere 'oki te ka rauka i te 'akaora i a kōtou.

22Auraka e tāpikipiki i a kōtou 'ua'orāi nā roto i te 'akarongo 'ua i te tuatua. E 'ākono katoa i te reira.

23Ko tei 'akarongo 'ua 'oki i te tuatua ē kāre i 'ākono, e 'āite ia ki te tangata tei 'ākara i tōna mata i roto i te i'o ra.

24Kua 'ākara aia i aia 'ua'orāi, kua 'aere atura ē kua ngaropōina i'ora i tōna tū.

25Ko tei tāmou i te 'ākara matariki i te ture meitaki rava o te tū rangatira, ē kāre ia i te tangata tei 'akarongo 'ua ē ngaropōina i'ora, 'e tangata rā tē rave ra, ko ia te ka 'akameitaki'ia e te Atua i tāna 'anga'anga.

26Mē tē manako nei tēta'i ē, 'e tangata 'ākono Atua aia, ē kāre e rauka i aia i te 'aka'aere i tōna arero, tē tāpikipiki nei rā aia i aia 'ua'orāi, ē 'e mea pu'apingakore tāna 'ākono'anga Atua.

27Ko te 'ākono'anga pikika'akore ē te tika i mua i te aroaro o te Atua tō tātou Metua ra, ko tēia ia: ko te tākinga meitaki i te au matiroeroe ē te au va'ine taka'ua i tō rātou au tūmatetenga, ē te 'akapāpū ē kia kore te kino o tēianei ao e piri ki a tātou.