'Anga'anga 18 - Cook Island Maori Revised New Testament(CIMRNT)

Tei Kōrīnētia a Paulo

1Ē i muri ake i te reira, kua 'akaruke maira a Paulo i a Ātene, ē kua 'aere atura ki Kōrīnētia.

2E kite atura aia i tēta'i Ngāti Iūda ko Ākuila tōna ingoa, 'e tangata Ponoto aia tei tae 'ua maira nō Ītālia mai, ē tāna va'ine ko Peresila, nō te mea, kua 'akaue'ia te Ngāti Iūda rava rāi e Kalaudio kia 'akaruke i a Rōma. Ē kua 'aere atura a Paulo ki a rāua,

3e no'o atura ma te 'anga'anga kāpiti atu ki a rāua, nō te mea, kua 'āiteite tā rāua 'anga'anga, koia 'oki 'e ma'ani pū'ākapa.

4Kua taumārōrō atura 'oki aia i te au Sābati rava rāi i roto i te sūnago kia 'āriki mai te Ngāti Iūda ē te Eleni.

5Ē kia tae mai a Sila rāua ko Tīmōteo mei Mākedōnia mai, 'e ako anake 'ua tā Paulo 'anga'anga i te 'akakite'anga atu ki te Ngāti Iūda ē, ko Iēsū te Mesia.

6Ē kia pāto'i maira tēta'i pae o rātou ma te 'akakino Atua katoa mai, kua rūrū atura aia i tōna kāka'u, ē kua tuatua atura ki a rātou, “Tō kōtou na toto 'ei runga a'o ia i tō kōtou 'ua'orāi ūpoko, kua ti'amā au. Mei tēianei atu, ka 'aere au ki te au 'ētene ra.”

7Neke atura a Paulo mei reira, e 'aere atura ki te ngutu'are o tēta'i tangata ko Titio Iūseto tōna ingoa, 'e tangata 'ākono Atua aia, ē tei te pae tikāi tōna 'are i te sūnago.

8Ko Keripo, te tūtara ma'ata o te sūnago ra, kua 'irinaki aia ē tōna ngutu'are tangata kātoatoa i te 'Atu. Ē i te 'akarongo'anga tō Kōrīnētia 'e mānganui, kua 'irinaki i'ora rātou ē kua bāpetīto'ia i'ora.

9Kua tuatua maira te 'Atu ki a Paulo i te pō nā roto i tēta'i 'ōrama, “Auraka e mataku, ka tuatua atu rāi, auraka e mūtēkī,

10nō te mea, tei vaitata katoa 'oki au i a koe. Ē kāre rava 'e tangata e rauka i te tākinga kino mai i a koe, nō te mea 'oki ē, nōku 'oki te tangata 'e mānganui i roto i tēianei 'ōire.”

11Kua no'o atura a Paulo ki reira 'e 'okota'i mata'iti e ono marama i te 'āpi'i'anga atu i te karere a te Atua ki ō rātou ra.

12Inārā, i tō Galiō riro'anga mai 'ei tūtara nō Ākaia, kua tā'okota'i i'ora te Ngāti Iūda i te rave kino i a Paulo, ē kua arataki atura i aia ki mua i te 'akavā'anga,

13nā kō akera, “Tē 'akanauru nei tēianei tangata i te au tangata kia 'akamori i te Atua nā te mataara tei kore i tau i te ture ra.”

14Tē 'aere rā 'oki a Paulo ka tuatua, ko Galiō maira i te tuatua'anga ki te Ngāti Iūda, “E te Ngāti Iūda na, mei te mea ē tēianei au 'aka'apa'anga ē 'e 'apa kino, mē kāre ra 'e 'anga'anga kino, e tika ia i āku i te 'akarongo mārie atu i a kōtou na;

15mei te mea rā ē, 'e taumārō'anga tēnā nō runga i tēta'i tuatua ma ēta'i ingoa ē tā kōtou 'ua'orāi ture, nā kōtou 'ua'orāi e 'ākara atu i te reira. Kāre au e 'akavā i tēia au mea.”

16Kua tuaru kē atura aia i a rātou mei taua 'akavā'anga ra.

17Ē kua 'opu atura rātou rava rāi i a Sōsitene, te tūtara ma'ata o te sūnago ra, ē kua pāpā atura i aia ki mua i taua 'akavā'anga ra. Kāre rava a Galiō i ma'ara 'ua atu i te reira.

Te 'oki'anga o Paulo ki Ānētiōka

18 Num 6.18 Kua no'o 'ua atu rāi a Paulo ki reira 'e mānganui akera te au rā, ē kua poroaki maira aia i te au taeake, e tere atura ki Sūria ma Peresila rāua ko Ākuila. I Kenekērea tōna pākoti'anga i tōna rauru nō tāna i tia ana.

19E tae atura rātou ki Ēphēsia, kua 'akaruke maira aia i a Peresila rāua ko Ākuila i reira, kāreka aia ra 'aere atura ki roto i te sūnago, ē kua taumārō atura ki te Ngāti Iūda.

20Kua pati maira rātou ki aia e no'o ki ō rātou ra ē kia roa ake, kāre rā aia i 'akatika.

21Inārā, kia poroaki mai aia i a rātou, kua nā kō atura aia, “Ka 'oki mai au ki a kōtou nei mē ka tika i te Atua.” Kua tere atura aia mei Ēphēsia atu.

22E tae atura aia ki Kaisarea, 'aere atura aia ki uta e 'ārāvei i te 'ēkālēsia, e oti akera, 'aere atura ki Ānētiōka.

23E 'ope akera ēta'i rā i aia ki reira, kua 'akaruke maira aia e 'aere atura nā roto i te au 'ōire kātoatoa o Gālātia ē Phērigia i te 'akamātūtū'anga atu i te au pipi rava rāi.

Ko Āpolo i Ēphēsia ē Kōrīnētia

24Ko tēta'i Ngāti Iūda, ko Āpolo tōna ingoa, 'e tangata Ālekānētēria, tei 'aere mai ki Ēphēsia. 'E tangata tūkatau i te kōrero ē te tangata kite i te tuatua i tātā'ia ra.

25'E tangata 'oki aia tei 'āpi'i'ia ra i te Mataara o te 'Atu; ē nō tōna ngākau pu'ipu'i rekareka nō te reira, kua tuatua ē kua 'āpi'i mārie aia i te au mea rava rāi nō runga i a Iēsū; inārā, ko te bāpetīto anake 'ua a Ioane tāna i kite.

26Kua 'akamata atura aia i te ako ma te matakukore i roto i te sūnago ra. Ē kia 'akarongo akera a Ākuila rāua ko Peresila i aia, kua arataki maira rāua i aia ki a rāua, ē kua 'akamārama meitaki atura ki aia i te Mataara o te 'Atu.

27Tē 'inangaro ra 'oki a Āpolo i te 'aere ki Ākaia, ē kua 'akamāro'iro'i maira te au taeake i aia, ē kua tātā i'ora rātou i te tuatua ki te au pipi i reira kia 'āriki meitaki mai rātou i aia. E tae atura aia ki reira ra, kua tauturu ma'ata tikāi aia i te aronga tei 'irinaki nā roto mai i te aro'a 'ua o te Atua.

28Ē kua pāto'i pakari 'oki aia i te Ngāti Iūda ki mua i te tangata rava rāi i te 'akapāpū'anga mai nā roto i te tuatua i tātā'ia ra ē, ko Iēsū te Mesia.