Rōma 8 - Cook Island Maori Revised New Testament(CIMRNT)

Ko te Vaerua tō tātou ora

1Kāre rava atura 'oki 'e 'akautunga'anga i tēianei nō te aronga tei piri ki te Mesia ra, ki a Iēsū.

2Nā te ture vaerua o te ora i roto i te Mesia ra i a Iēsū i tatara i a koe mei roto mai i te ture o te 'ara ē te mate.

3Ko tei kore i rauka i te Ture ra i te 'akatupu nō te 'āpikepike o te tangata, kua 'akatupu'ia rā e te Atua nā roto i te tono'anga mai i tāna 'ua'orāi Tamaiti mei te tangata 'ara ra te tū, 'ei tārangā'ara 'oki; kua tāmate 'oki aia i te mana o te 'ara i roto i te tangata nei,

4kia tupu tikāi tei tau i te Ture ra i roto i a tātou nei ko tei āru i tā te Vaerua ra, 'eia'a i tā te kōpapa ra.

5Ko te aronga 'oki i āru i tā te kōpapa nei, kua 'akamou ia i tō rātou manako ki te au mea o te kōpapa 'ua ra, kāreka te aronga i āru i tā te Vaerua ra, kua 'akamou ia i tō rātou au manako ki te au mea o te Vaerua.

6Tei 'akamou i te manako ki te au mea kōpapa 'ua ra, 'e mate tō rātou 'openga; kāreka tei 'akamou i te manako ki tā te Vaerua ra, 'e ora ē te 'au tō rātou 'openga.

7Ko te manako 'oki tei 'akamou'ia ki tā te kōpapa 'ua ra, 'e 'enemi ia nō te Atua ē kāre e kauraro i te au ture a te Atua, nō te mea, kāre e tika kia pērā.

8Ē ko te aronga i āru i tā te kōpapa 'ua ra, kāre rava rātou e mareka'ia e te Atua.

9Mei te mea rā ē, tē no'o tikāi ra te Vaerua o te Atua i roto i a kōtou, kāre kōtou e ora i tei tau i tā te kōpapa, i tei tau rā i tā te Vaerua. Ko tēta'i 'ua atu tangata tei ngere i te Vaerua o te Mesia ra, kāre ia aia nōna.

10Mē tei roto te Mesia i a kōtou, noa atu ē kua mate tō kōtou kōpapa i te 'ara, tē ora nei rā tō kōtou vaerua, nō te mea, kua 'akatikatika'ia mai ia.

11 ko tei kāpiki'ia kia tau ki tōna 'akakoro'anga.

29Ko tāna 'oki i kite i muatangāna, ko tāna katoa ia i 'ākono mamao 'ua kia 'āiteite i a rātou mei tāna Tamaiti ra te tū, kia riro mai aia 'ei tama mua i rotopū i te au taeake ra 'e mānganui.

30Ko tāna 'oki i 'ākono mamao 'ua ra, ko tāna katoa ia i kāpiki; ē ko tāna 'oki i kāpiki ra, ko tāna katoa ia i 'akatikatika; ē ko tāna i 'akatikatika ra, ko tāna katoa ia i 'akakakā.

Te aro'a o te Atua i roto i te Mesia ra i a Iēsū

31'E a'a i reira tā tātou ka tuatua? Mei te mea ē nō tātou te Atua ra, ko 'ai te ka pāto'i mai i a tātou?

32Ko tei kore 'oki i karapi'i i tāna 'ua'orāi Tamaiti, ko tei tuku 'ua maira i aia nō tātou katoa nei, kāre āinei aia e 'ōronga katoa mai i te au mea rava rāi nō tātou?

33-34Nā 'ai e tuku mai i tēta'i tāpepe'anga ki tei 'iki'ia e te Atua ra? Ko te Atua 'oki ko tei 'akatikatika mai, nā 'ai i reira e 'akautunga mai? Ko te Mesia ko Iēsū tei mate ra ē tei 'akatū'aka'ou'ia maira, ko ia tē no'o nei i te rima katau o te Atua ra ē tē pati ra i tā tātou.

35Ko 'ai te ka tika kia 'akatakakē atu i a tātou mei te aro'a mai o te Mesia ra? Ka tika āinei i te tūmatetenga, te mamae ngākau, te tākinga kino'anga, te onge ma'ata, te 'apingakore, te mate, mē kāre i te koke?

36Sal 44.22Mei tei tātā'ia ra ē,

“Nō'ou ra 'oki mātou i tā'ia ai i te rā katoa ra;

kua 'ākara'ia mātou mei te māmoe nō te tainga ra.”

37Ka riro rā taua au mea katoa ra 'ei ūpokotū nō tātou nā roto i aia tei aro'a mai i a tātou nei.

38Kua pāpū tikāi i āku ē, kāre 'oki te matenga mē kāre te ora, kāre 'oki te au 'āngela mē kāre te au manārangi, kāre 'oki te au mea e vai nei mē kāre te au mea te ka tae mai, kāre 'oki te au mea mana

39nō runga rava mai mē nō raro rava mai, kāre 'oki tēta'i 'ua atu mea kē i 'anga'ia ra, e tika kia 'akatakakē atu i a tātou mei te aro'a mai o te Atua i roto i te Mesia ra i a Iēsū tō tātou 'Atu.