'Anga'anga 25 - Cook Island Maori Revised New Testament(CIMRNT)

Tē 'inangaro ra a Paulo kia 'akavā'ia aia e Kaisara

1E toru rā i muri ake i tō Fēsito tae'anga mai ki taua 'enua ra, kua 'aere atura aia mei Kaisarea atu ki Iērūsalēma ra,

2ē kua 'aka'apa atura te kau ta'unga nunui ra ē te aronga mana o te Ngāti Iūda i a Paulo ki aia, ē kua pati 'akatenga atura ki aia,

3kia 'akatika mai aia i tō rātou 'inangaro, koia 'oki, “kia 'aka'oki'ia mai a Paulo ki Iērūsalēma nei.” Tē kotikoti kupenga ra 'oki rātou i te tāmate i a Paulo ki runga i te mataara.

4Kua pa'u atura a Fēsito ē, tē mou'āuri ra rāi a Paulo i Kaisarea, ē tē 'oki viviki atu nei aia 'ua'orāi ki reira.

5“Nō reira,” i nā na ai, “mei te mea ē, 'e tārevakē tō taua tangata ra, kia āru mai tō kōtou aronga mana i āku e tāpepe atu i aia ra.”

6Kua no'o atura a Fēsito e varu, mē kāre ra, e ta'i nga'uru 'aka'ou rā i Iērūsalēma ra, kua 'aere atura aia ki raro ki Kaisarea. E ao akera, kua no'o atura aia ki runga a'o i te no'o'anga 'akavā, ē kua 'akaue atura kia tiki'ia mai a Paulo.

7Ē kia tae mai aia ra, kua 'akapini maira te Ngāti Iūda mei Iērūsalēma mai i aia, ē kua 'akamata atura i te tāpepe atu i a Paulo ki te au 'apa 'e mānganui ma te kino rava; kāre rā i rauka i a rātou i te 'akapāpū i te reira.

8Kua pāruru atura a Paulo i aia 'ua'orāi, nā kō atura, “Kāre rava āku 'apa i te Ture a te Ngāti Iūda nei, ē kāre i te 'iero, ē kāre katoa 'oki i a Kaisara.”

9Ko Fēsito ra, nō tōna 'inangaro 'oki i te 'akareka i te Ngāti Iūda ra, kua tuatua maira aia ki a Paulo, nā kō maira, “Ka 'inangaro āinei koe i te 'aere atu ki Iērūsalēma, ē 'ei reira koe e 'akavā'ia ai e au i tēia au mea nei?”

10Kua pa'u atura a Paulo, “Tē tū nei au i mua i te no'o'anga 'akavā o Kaisara, ē kia 'akavā'ia au i reira e tikāi. Kāre rava 'oki āku 'apa i te Ngāti Iūda ra, ē kua kite meitaki tikāi koe i te reira.

11Mei te mea ē, kua 'atikau ana au i te ture, mē kāre ra, kua rave ana au i tēta'i mea e tau ei i āku te mate, ka 'āriki au i te mate; mei te mea rā ē, 'e tuatua tā'eke 'ua tā rātou i tāpepe mai i āku nei, kāre e tika i tēta'i 'ua atu tangata i te tuku atu i āku ki a rātou. Nā Kaisara au e 'akavā!”

12Kua 'uri'uri manako i'ora a Fēsito ma tōna kōnitara, e oti akera, kua karanga atura aia ki a Paulo, “Kua tuatua mai 'oki koe ē, ‘Nā Kaisara au e 'akavā,’ nō reira ka 'aere koe ki a Kaisara.”

Tē tū nei a Paulo ki mua i a Āgeripa ē Berenike

13E topa akera ēta'i puke rā ki muri, kua 'aere maira te ariki ra ko Āgeripa ē ko Berenike ki Kaisarea, e 'ārāvei i a Fēsito.

14'E mānganui akera tō rāua rā i reira, kua tuatua atura a Fēsito ki te ariki nō runga i a Paulo, nā kō atura, “Tei konei tēta'i tangata mou'āuri i vai'o'ia mai e Fēliki.

15Ē i āku i Iērūsalēma ra, kua 'aka'apa maira te kau ta'unga nunui ē te aronga pakari o te Ngāti Iūda i aia ma te pati mai kia 'akautunga au i aia.

16Kua pa'u atura au ki a rātou, ‘Kāre ia i te peu o tō Rōma i te tuku 'ua atu i tēta'i tangata kia mate, kia kore te tangata i tāpepe'ia mai e tae mai ki mua i te aroaro o te aronga i tāpepe atu i aia ra, ē kia 'ōronga'ia rā te rāvenga ki aia nō te pāruru atu i aia i te 'apa i tāpepe'ia ai aia ra.’

17I tō rātou tae'anga mai ki konei, kāre tākiri au i tāroaroa ana; ē kia ao akera, kua no'o i'ora au ki runga a'o i te no'o'anga 'akavā, ē kua 'akaue atura au kia tiki'ia mai taua tangata ra.

18Kua tū akera te aronga i tāpepe mai i aia ra ki runga, ē kāre tākiri rātou i 'apai mai i tēta'i 'aka'apa'anga o te au kino tāku i manako ra ē kua rave aia.

19'E taumārō'anga rā tā rātou ki aia nō runga i tā rātou 'ua'orāi 'akamori'anga, ē nō runga katoa i tēta'i tangata ko Iēsū tei mate ra, ko tā Paulo rā e 'akakite ra tē ora ra.

20Nō te mea rā ē, kāre au i mārama meitaki i tā rātou tau'ētono'anga i taua au mea ra, kua ui atura au ki aia, mē ka 'inangaro āina aia i te 'aere ki Iērūsalēma, ē 'ei reira aia 'akavā'ia ai nō taua mea ra.

21Kua pa'u maira a Paulo ē, kia vai'o'ia aia ē nā Kaisara aia e 'akavā. Nō reira, kua 'akaue atura au kia tiaki'ia aia e tae 'ua atu ki te kave'anga atu au i aia ki a Kaisara.”

22Kua karanga maira a Āgeripa ki a Fēsito, “I 'inangaro 'ua ana rāi au i te 'akarongo i taua tangata nei.”

Kua pa'u atura a Fēsito, “Āpōpō koe e 'akarongo ei i aia.”

23E ao akera, kua tae maira a Āgeripa rāua ko Berenike ma te 'akaāriari'anga mai i tō rāua tū pāpānunui, ē kua tomo maira ki roto i te ngā'i 'akarongorongo'anga tuatua ma te au rangatira mama'ata ē te aronga pāpānunui o te 'ōire ra. Ē kia 'akaue atura a Fēliki, kua taki'ia maira a Paulo ki roto.

24Kua karanga atura a Fēliki: “E te ariki, e Āgeripa, ē ko kōtou katoa tei tae mai ki ō tātou nei, e tama mā, tē kite nei kōtou i tēianei tangata, tā te Ngāti Iūda rava rāi i 'aka'apa mai ki āku i Iērūsalēma ra ē i konei katoa 'oki, i te kāpikipiki'anga mai ē, ‘Kāre aia e tau kia vao'o ora 'ua'ia mai.’

25Ko au rā, kāre au i kite i tēta'i 'ua atu mea tāna i rave ana e tau ei i aia te mate. Ē nō te mea rā ē, nāna 'ua'orāi i 'inangaro ē, nā Kaisara aia e 'akavā, kua manako au ē, e kave atu i aia ki reira.

26Inārā, kāre āku tuatua pāpū kia tātā atu au nō runga i aia ki Tōna Ngāteitei. Nō reira, i arataki mai ei au i aia ki mua i tō'ou aroaro, e te ariki, e Āgeripa, ē ki mua katoa 'oki i a kōtou, kia rauka i āku tēta'i tuatua 'ei tātā'anga atu kia oti tā tātou uiui'anga.

27Nō te mea, i tōku manako'anga, 'e mea taukore 'oki i te kave atu i tēta'i tangata mou'āuri ma te kore e 'akakite katoa ē, 'e a'a te au tumu i 'aka'apa'ia ai aia ra.”