BARUC 1 - Maung a Balita Biblia (PnPV)(PnPV)

Say Pangigapo

1Sayan libro insulat nen Baruc a lakin anak nen Nerias, apo nen Maasias, tan kabyangay boleg di Zedekias, Hasadias, tan Hilkias. Nisulat ed Babilonia

2nen kumapiton agew na bulan, diad kumaliman taon kayari na impanakep tan impamool na saray taga Babilonia ed Jerusalem.

3-4Maksil ya imbasa nen Baruc imay libro ed kinen Jeconias a lakin anak nen Joakin tan amin a totoon manaayam ed Babilonia diad gilig na Ilog na Sud. Dinmagon ondengel so balang sakey a toosaray gagalangen a totoo, saray anak na pamilyay ari, saray mamatakken, diad tuay tua, amin a totoo ya anggan antoy kipapasen da.

5Nen nibasa imay libro, nanakis so balang sakey, nanayuno, tan nampikasid Katawan.

6Insan angiter so balang sakey na kuarta ed anggaay nayarian to,

7tan nipatolur ed Jerusalem so atipon a kuarta diad kinen Joakin a Pangulon Pari ya anak nen Hilkias tan apo nen Sallum, diad saray arum a papari, tan diad amin a totoon kakaiba tod Jerusalem.

8Diad kumasamplon agew na bulan na Sivan, inala nen Baruc iray masagradon kagawaan ya asamsam ed Timplo tan impawil to ra ed Juda. Saraya may pilak a kagawaan ya impagawa nen Zedekias a lakin anak nen Ari Josias na Juda,

9kayari nen Ari Nabucodonosor na Babilonia ya imbantak ira di Joakin, saray manoley, saray marunong a kumikimey, saray gagalangen a totoo, tan saray karaklan, insan to ra inyakar ed Babilonia manlapud Jerusalem.

Sakey a Sulat ed Jerusalem

10Insulat na saray totoo:

Awat yo pa yay kuartan iiter mid sikayo. Isaliw yo na saray ayayep a para saray bagat a popoolan tan saray bagat a para kasalanan; manaliw kayo met na insinso, tan mangiter kayo na saray bagat a trigo. Ibagat yo ra ed altar na Katawan a Dios tayo,

11tan ipikasi yo pa si Ari Nabucodonosor na Babilonia tan si anak ton Belsasar, pian mambilay ira legan a wala ray katawenan.

12Diad ontan, pabiskegen itayo na Katawan tan magmaliw a manangiwanwan tayo. Iyagel itayo nen Nabucodonosor tan si anak ton Belsasar, tan magmaliw itayon matoor ed sikato legan tayon mambibilay, et pakaliketan da itayo.

13Kekerewen mid sikayo met ya ipikasi yo kami pad Katawan a Dios, lapud nankasalanan kamid sikato, tan mamapasnuk nid sikami.

14Basa yo pa yan libro a papaiyakar mid tad sikayo tan gawa yoy dilin panangipatwa na kasalanan diad Timplo, no ononan agew na Pista na saray Abung-abung tan no arum iran masanton agew na pantitipon yo.

Sakey a Panangipatwa na Kasalanan

15Onyay nepeg a pangipatwa yo: Matonung so Katawan a Dios mi, balet asakbungan kami ni na kababaingan. Amin misaray totood Juda, saray totood Jerusalem,

16saray arari mi, saray manoley mi, saray propita mi, tan saray lalaki mi et naplag kamid kababaingan,

17lapud nankasalanan kamid Katawan a Dios mi

18tan sinumlang mi. Ag kami dinmengel ed sikato tan ag kami nambilay onung ed saray ganggan to.

19Manlapud samay agew a say Katawan et impaway tod Egipto iray lalaki mi ya anggad sayan agew, nansiansia kamin matoor ed sikato, tan ag mi nanduaruwaay sinmumlang ed sikato.

20Nen saman, nen impaway na Katawan ed Egipto iray lalaki mi, pian niiter tod sikami so mayaman tan mataban dalin, imbawag to ray samba a sumpad sikami diad panamegley na aripen ton si Moises. Natan maniirap kami lapud saraman a samba.

21Ag mi inonur so salita na Katawan a Dios mi ya imbaga tod sikami diad panamegley na saray propita. Ingen, ginawa mi so labay mi tan intuloy mi so maoges a panagbilay mi. Nanlingkur kamid arum a diriyos tan ginagawa mi ray bengatlan bobosulen na Katawan.