1Say Katawan akisalitad siak nipaakar ed saray bansa.
2Sikato ya so imbaga to nipaakar ed Egipto. Nansalita so Katawan nipaakar ed saray sondalo nen Ari Neco na Egipto, a tinalo nen Ari Nabucodonosor na Babilonia diad Carkemis ya asingger ed Ilog na Eufrates nen kumapat a taon na panaarid Juda nen Joakim a lakin anak nen Josias:
3Iyeeyag na saray opisyal na Egipto,
Iparaan yo ray samper yo,
tan kurang kayon mibakal!
4Sintaan yo ray kabayo yo tan kabayoan yo ra!
Mantatalontonan kayo, tan isolung yo ray hilmit yo!
Patdeman yo ray pika yo!
Mankawes ki lay para bakal!
5Balet antoy nanenengneng ko? tepet na Katawan.
Ompopoliktar irad takot.
Mapalaloy kakairapan na saray sondalo ra;
diad gaway takot dan amin, gagawaen day anggay nayarian dan ombatik,
tan ag la ra onlilingaw.
6Ag makaarawi iray mabatik;
ag makataynan iray sondalo.
Nipapatakba tan natutumba ra
ed baybay ya asingger ed Ilog na Eufrates.
7Siopa yay ontatagey a singa Nilo,
singa sakey ya ilog ya onsasapat ed pangdel so danum to?
8Say Egipto, ya ontatagey a singa Nilo,
a singa sakey ya ilog ya onsasapat ed pangdel so danum to.
Inkuan na Egipto, Ontagey ak tan salinapen koy mundo;
deralen ko ray siudad tan saray totoon manaayam ed sikara.
9Dagdag yo lan onla iray kabayo,
tan pakurang yo la ray karwahi!
Ibaki yo la ray sondalo:
saray lalakin sankaawit da ray samper a taga Sudan tan Libia,
saray marunong a pumapanan taga Lidia.
10Sikato yay agew na Katawan a Dios a Makapanyarin-amin:
ombawi natad sayan agew;
dusaen to ray kalaban to natad sayan agew.
Kanen ira na ispada to ya anggad napsel;
inomen toy dala ra ya anggad apenek.
Ibagat natad sayan agew na Makapanyarin-amin iray kalaban ton inaatey
diad baybay ya asingger ed Eufrates.
11Totood Egipto, laka yod Galaad,
ta mangala kayoy tambal!
Asali lan anggapoy kana iray tambal yo;
anggapoy bengatlan makapaabig ed sikayo.
12Nadngelan na saray bansa so kababaingan yo;
nadngelan na balang sakey so panaakis yo.
Mampapateran iray sondalo
kanyan natutumba ra.
Say Insabi nen Nabucodonosor13Akisalitay Katawan ed siak nen si Ari Nabucodonosor na Babilonia et pinmawil a dogpaan toy Egipto. Inkuanto,
14Ibawag mod saray baley na Egipto,
diad Migdol, Memfis, tan Tafnes,
Mamparaan kayon mangyagel ed sikayon dili;
naderal ed bakal iray amin a kayaryan yo!
15Akin et atumba si Apis a makapanyarin dios yo?
Lapud kinabil na Katawan!
16Nipatakba tan atumba ray sondalo yo;
balang sakey kuantod sakey tan sakey,
Ganatan yo! Onsempet itayo lad saray totoo tayo,
pian napaliisan tayoy ispada da ray kalaban!
17Itdan yo na balon ngaran so Egipto,
Say Maknul a Mapaatagey ya Apalabas Toy Pankanawnawa To.
18Siak, a Katawan a Makapanyarin-amin, et ari.
Siak so mabilay a Dios.
Say biskeg na onsabin ondogpa ed sikayo
et singa Palandey na Tabor ya atagey nen saray arum,
tan singa Palandey na Carmelo a diad kinaatagey to et ososdungan toy dayat.
19Sikayon taga Egipsio,
mamparaan kayon naalan priso!
Nagawan andi-kakanaan a pasen so Memfis,
nagawan dera-deral tan anggapoy manayam.
20Singa balibalin baka so Egipto,
a dinogpaan na sakey a kamontuk a nanlapud baybay.
21Anggan saray uupaan to ran sondalo
et singa ra bakan anggapoy nitulong.
Ag ira inmalagey a linmaban;
pinmoliktar iran amin tan batik ira.
Sinmabiy agew na pakadusa ra,
say oras na kaderal da.
22Ombabatik so Egipto tan singa oleg ya onaarawi,
nen onaasingger iray sondalo na kalaban.
Sankaawit day wasay iray dinmogpad sikato,
a singa saray totoon mambabatang na kakiewan;
23binabatang da ray kakiewan ed takel to.
Ag nabilang iray totoo ra;
dakel nen saray dorun iray sondalo ra.
24Nipasen ed kababaingan iray Egipsio;
adakep ira na saray taga baybay.
Siak, say Katawan, so nansalita.
25Say Katawan a Makapanyarin-amin a Dios na Israel kuanto, Dusaen koy Amon a dios na Tebes, say Egipto a pati saray diriyos tan saray arari to. Alaen koy ari na Egipto tan amin da ray manmamatalek ed sikato.
26Ipalimak irad saray malabay a mamatey ed sikara, diad kinen Ari Nabucodonosor na Babilonia tan saray sondalo to. Ag mabayag, manayam iray totoo lamet ed Egipto a singa impanayam da nen saman. Siak, say Katawan, so nansalita.
Iyagel na Katawan iray Totoo to27Sikayo ran totook, ag kayo natatakot,
totood Israel, ag kayo ontatalaw.
Iyagel ta kayo ed saman ya araw-dawin pasen,
diad saman a dalin ya akaprisoan yo.
Ompawil kayod dalin yo, tan mareen so panayam yo;
niarawi kayod kaatapan, tan anggapo lay manaktakot ed sikayo.
28Dagoen ta kayo, ta iyagel ta kayo.
Deralen koy amin a bansa
ya angikaykayatan kod sikayo,
balet ag ta kayo deralen.
Andi-saew ya abuloyan kon nadusa kayo;
balet no dusaen ta kayo, gawaen ko onung ed katonungan.
Siak, say Katawan, so nansalita.
Who We AreWhat We EelieveWhat We Do
2025 by iamachristian.org,Inc All rights reserved.
