ISAIAS 22 - Maung a Balita Biblia (PnPV)(PnPV)

Say Propisiya a Nipaakar ed Jerusalem

1Sikato yay propisiya a nipaakar ed Patar na Pasingayew. Antoy nagagawa? Akin et mansisilibra ed toktok na kaabungan iray amin a katoowan?

2Maungol so siudad, napno na ingal tan mapalaloy sayaksak na katoowan.

Ag inatey ed pibabakal iray totoo yon inaatey ed sayan bakal.

3Ag nin balut akapana iray pangulo yo, et batik tan adakep la ra.

4Paolyan yo ak a mambukbukor ya akisan koy ampaipait iray totook ya inaatey. Ag yo ak liligliwaen.

5Sikato yay panaon na gunigon, katalo, tan gewgew ed Patar na Pasingayew, et say Katawan a Dios a Makapanyarin-amin so angyakar na saraya ed sikatayo. Ageba-geba ray padir na siudad tayo, tan makmakbaw ed kapokdulan so tawag na katoowan ya onkekerew na tulong.

6Sinmabin akakabayo iray sondalon taga bansa na Elam, tan sankaawit day pana. Saray sondalon taga Kir imparaan da ray samper da.

7Napno na karwahi iray mataban patar na Juda; manalalagey ed arap na saray puirta na Jerusalem iray sondalon akakabayo.

8Ageba-geba ray amin a tirinsira na Juda.

Nen onyay agawa, impaway yod panagsinupan iray amin ya armas.

9-10Nalmo yo ray pasen ed padir na Jerusalem a nakaukolan ya apigeren. Ninenengneng yo ray amin a kaabungan ed Jerusalem, insan yo inggegeba ray arum pian nawalaan kayoy baton pangapiger ed padir na siudad. Pian makatipon kayo na danum,

11nanggawa kayoy dipositowan ed loob na siudad ya agosan na danum a manlapud daan a dipositowan. Balet ag yo inasasikaso odino anunotan so Dios ya a bayag lan angiplano ed sarayan amin tan sikatoy angyabuloy a nasumpal ira.

12Diad saman, say Katawan a Dios a Makapanyarin-amin et tinatangguyor to kayon manakis tan manermen, mangiskis na kaoloan yo tan mankawes na sako.

13Balet naneelek tan nanliliket kayo la laingen. Nampapatey kayo na saray karniro tan saray baka a kinakakan yo, tan naniinom kayo na alak. Inkuanyo, Maung la laingen no mangan tan maninom tayo, ta nabwas ompatey itayo.

14Say Katawan a Makapanyarin-amin a Dios a dili et akisalitad siak tan inkuanto, Legan dan mambilay, ag balut napirdona yan kaogsan a ginawa ra. Siak, say Katawan a Makapanyarin-amin a Dios, so nansalita.

Say Pasakbay ed Sebna

15Imbagad siak na Katawan a Dios a Makapanyarin-amin ya onla ak ed kinen Sebna, a pampipiaan ed palasio, ta ikuankod sikato,

16Antoy abaloan mon kipapasen mo? Antoy kanepegan mon mangyongib na lobuk mo ed diking na mabaton pokdul?

17Nayarin sakey kan matalonggaring, balet demeten tan ibasibas ka na Katawan.

18Demeten to kan singa bola, insan to ka itupak ed maawang ya alog. Ompatey kad man ed abay na saray mararakep a karwahim ya ikikinon mo. Sikay mangiter na kababaingan ed pamilyay amom.

19Say Katawan ekalen tan iyabeba to kad atagey a kipapasen mo.

20Say Katawan kuantod kinen Sebna, No nagawa ya, ipaawit koy aripen kon Eliakim a lakin anak nen Helcias.

21Isolung kod sikatoy kawes tan balkes na opisyal ya akasolung ed sika tan iter kod sikatoy amin a pakayarin walad sika. Magmaliw a singa sakey ya ama ed saray totood Jerusalem tan Juda.

22Iter kod sikatoy nagnap a pakaoley na ari a kabyangan na boleg nen David. Niiter ed sikatoy tombuk na opisina, no antoy lokasan to anggapoy mangikaput, tan no antoy inkaput to, anggapoy mangilokas.

23Malet so pangilirak ed sikato, a singa panagsabitan a nisegkal ed padir, tan sikatoy pakagalangan na amin a kabyangan na pamilya to.

24Balet magmaliw ya ambelat a sakbaten to iray amin a kakanayon to tan saray lelegpeten to. Ombitin irad sikato a singa saray banga tan saray yaung ya akabitin ed panagsabitan!

25No nagawa la ya, onlokak tan napelag imay panagsabitan a malet a nisegkal. Et sikato la yay pansamput da ra may amin a nisabit. Say Katawan so nansalita.