1No apili kan pangulo ed baleg a ponsia, ag ka magmamaliw a maragem. Iparam so sikan dili ed saray arum a totoo. Asikasom ni ray sangkaili kasakbayan kan onirung.
2Kayari na impakasumpal mod saray kimey mo, nayarian mo lay onirung tan miliket ed saray arum a totoo. Pagalangan da ka lapud impanggawam na maung a kimey.
3No matakken ka nen saray karaklan a bisita, nayarin mansalita ka; sakey yan kanepegan mo. Balet nepeg ya amtam so sasalitaen mo tan ag mo papatondaen so togtog na musika.
4No walay mamapaliket, ag ka mitotongtong lan mitotongtong, aliwa yan panaon na pangipasirayew mod inkasilib mo.
5Say musika ed baleg a ponsia a nisisirbi so alak et singa rubi a nilira ed balituk.
6Say marakep a musika tan masamit ya alak et singa ismiralda a nilira ed balituk.
7No malangwer ka, ag ka mansasalita likud no nakaukolan, balet ag nayarin balut a mamidwa, tan no wala labat lay akaonan nansalita nen sika.
8Ibagam a tampol so labay mon ibaga tan antikey so pansalitam. Ipanengneng mon dakel so amtam, balet mandeen ka.
9Ag mo ipapasen a kaparam iray totoon bibirbiren tan ag ka makmaknul diad pantepet mo lan pantepet.
10Onoonay inkabantug na toon masimpit, a singa onoonay kirmat ed karul.
11Taynan mo so ponsia ed dugan oras tan ag ka ontataynan a samput. Ag ka mantatayam-tayam ed puirta; ituloy mon tampol so onsempet ed abung.
12Makapanliket kad abung mo na anggaay nayarian mo, balet ag ka mankakasalanan na panaglastug.
13Ag mo lilingwanan so misalamat ed Manamalsam, lapud inabuloyan ton napanliketan moy amayamay a bengatlan maung.
Panangipatalus na Ganggan14No takotan moy Katawan, awaten moy panametek to. Bindisionan to ray totoon masakbay ya ombangon ed kabwasan a mampikasi.
15Aral mo so Ganggan na Katawan, et natalutalusan mo, likud no aliwa kan matwa nipaakar ed Ganggan; no onya ka, ag mo natalusan.
16No takotan moy Katawan, naamtaan mo no anto so maung, ta ombantug ka lapud inkaptek mo.
17Anggapoy kanad saray makasalanan so panametek tan ipapatalus day Ganggan pian ontokuy ed labay da.
18Aralen na makalakal a totoo so amin a kanunotan, balet ag abuloyan na saray totoon mapaatagey a walay makasara ed dalan da.
19Ag ka manggagawa na antokaman ya ag mo ni ninunot, tan no walay bengatlan ginawam, ag mo lilingawen tan ag mo pampipilalekan a sananey komuy ginawam.
20Ag ka manggagawa na bengatlan walay kaatapan, tan ag mo pipidwaey lingom.
21Ag mo ipapasen a sigsiguro ka, anggaman a singa mainomay so nengneng na dalan.
22Alwaran mo lawas so lalaen mo.
23Apiger moy antokaman a gagawaen mo; panangonur ya ed saray ganggan na Katawan.
24Say pananisiad Ganggan et kabaliksan toy panangonur ed saray ganggan na Katawan.
No Manmatalek kad Katawan, ag ka nabalang.
Who We AreWhat We EelieveWhat We Do
2025 by iamachristian.org,Inc All rights reserved.
