JOB 33 - Maung a Balita Biblia (PnPV)(PnPV)

1Kanyan natan, Job, dengel mon

maung iray amin a salitaen kod sika.

2Ibagak ed sikay walad kanunotan ko.

3Manlapud pusok iray amin a salitaen ko,

tan tua ray ibagak.

4Say ispiritu na Dios so amalsa tan angiter ed siak na bilay.

5Ebatan mo ak, no nayarian mo.

Iparaan mo ray isangsang mo.

6Nampara ita, Job, ed pakanengneng na Dios;

nanlapu itan dua ed pitek.

7Kanyan anggapoy makasengeg na itakot mod siak;

ag ta ka sarasarag a taloen.

8Nadngel ko ya imbagam:

9Anggapoy kasalanan ko; anggapoy ginawak a maoges.

Malinis ak tan anggapoy kaogsan ed bilay ko.

10Balet say Dios manaanap na pamasengegan toy isumlang tod siak,

tan ipapasen to ak a sakey a kalaban.

11Sisingeren toy golunggolung iray salik;

iimanoen toy amin a kiwas ko.

12Balet ibagak ed sika, Job, a nalilingo ka.

Matalonggaring so Dios nen say anggan siopa.

13Akin et tetetelen moy Dios

ed ag to pangebat na saray riklamom?

14Anggaman a mansasalitay Dios diad panamegley na nandoroman polaing,

anggapoy mangasikasod ibabaga to.

15Mansasalitay Dios ed panamegley na saray kogip tan saray pasingayew,

diad labi no nanaogip iray totoo.

16Say Dios ipaparengel tod saray totoo iray sasalitaen to,

tan patatakoten to ra lapud saray pasakbay to.

17Mansasalitay Dios pian napatonda ton mankasalanan iray totoo,

tan ag la ra mampaatagey.

18Ag iyabuloy na Dios a naderal ira;

ipapaliis to ra anggan diad patey.

19Pepeteken na Dios so too diad pangiter toy sakit tan panotut na laman to.

20Say mansasakit a too ontabang so panangan to,

tan ag to napaloob so anggan anton mananam a kakanen.

21Manebeng lan manebeng

tan sankanengneng la ray pokel to;

22manasingger ed sangab na lobuk.

23Nayarin walay sakey ya anghil ya ondagon ontulong ed sikato

sakey ed saray nilibon anghil na Dios,

saray manangipanunot ed saray totoo na nepeg dan gawaen.

24Diad panangasi na anghil ikuanto, Ibolus yo!

Ag ni nepeg ya ompatey.

Nia so dondon a para kibolus to.

25Onogaw tan ombiskeg lamet so laman to;

26ebatan na Dios no mampikasi;

maliket a mangigalang ed Dios;

ipawil na Dios ed sikatoy maligen a bilay.

27Ibaga tod arap na saray totoo, Nankasalanan ak.

Maoges iray ginagawak,

balet pinirdona ak na Dios.

28Ag to inyabuloy ya ompatey ak,

kanyan mabilay ak ni ya anggad natan.

29Say Dios oolit-oliten to yan gagawaen;

30ipapaliis tod patey so sakey a too,

tan iitdan to na maliket a panagbilay.

31Natan, Job, dengel mo so ibabagak;

mandeen ka tan abuloyan mo ak a mansalita.

32Balet no walay labay mon ibaga ibagam labat;

maliket ak a mamirbir a walay katonungan mo.

33Balet no anggapoy nibagam, dengel kad siak;

mandeen ka, ta ibangat ta ka no panoy pagmaliw mon makabat.