DEUTERONOMIO 24 - Maung a Balita Biblia (PnPV)(PnPV)

Say Pansiyan tan say Ipiduan Pangasawa

1Antoy gawaen no wala bilang so sakey a lakin mangasawa, insan ag mabayag et ag to la labay so asawa to, lapud walay mabanday a nalmo tod sikato? Kanyan manggawa na saray kasulatan na pansiyan, iter to rad sikato, tan pataynanen to lad abung to.

2Insan bilang miasawad sananey a laki imay biin insian,

3tan ag mabayag samay laki ag to la labay, kanyan manggawa na saray kasulatan na pansiyan, iter to rad sikato, tan pataynanen to lad abung to. Odino bilang ompatey imay kumadwan asawa to.

4Diad ontan samay asawan inmona ag to nepeg ya asawaen lamet imay bii; nepeg ton ipasen a marotak la. No asawaen to lamet, manggawa na makapaingungot ed Katawan. Ag kayo nepeg a manggawa na onyan kasalanan no wala kayo lad dalin ya iiter ed sikayo na Katawan a Dios yo.

Saray Nandoroman Ganggan

5No kakkapangkasal na sakey a laki, ag nepeg a pansondaloen o pankimeyen na antokaman a pananglingkur ed baley; nepeg ya ag pankimeyen a sakey taon, pian makapanayam ed abung tan napaliket toy asawa to.

6No mangipabayes kayoy bengatla ed sakey a too, ag nepeg ya alaen yon kaletan so gilingan na trigo to. Ta no alaen yo naandid pamilya to so ikakana ran pangiparaan na kanen da pian mambilay ira.

7Nepeg a pateyen so siopaman a mangalay kapara ton Israelita tan aripenen to odino ilako ton sakey ya aripen. Diad ontan, napaandipat yo yan kaogsan.

8No akating kayo, apiapiger yon tombuken so ibagad sikayo na Levitan pari; sumpal yo ray bilin ya intilak kod sikara.

9Nunot yoy ginawa na Katawan a Dios yo ed kinen Miriam nen oonla kayo dian nanlapud Egipto.

10No mangipabayes kayo na antokaman ed sakey a too, ag kayo onloloob ed abung ton mangala na kawes ya iter ton kaletan ed sikayo;

11manalagar kayod paway na abung tan paolyan yon ondago a mangiter ed sikayo.

12No mairap so bilay na pautangen yo, ag yo isisinup no labi itan a kawes;

13ipawil yod sikato no nasabiy labi, pian walay idokul ton onogip. Diad satan misalsalamat, tan makaliket ed sikayo so Katawan a Dios yo.

14Ag yo sasaolen so mairap-bilay tan walad pankaukolan a miuupan aripen, kapara yo man ya Israelita odino sangkailin manaayam ed sakey ed saray baley yo.

15Kapag nasabiy ngarem kasakbayan ya onselek so agew bayaran yoy sanagew ya impankimey to; nakaukolan toy kuarta tan iilaloan ton awaten. No ag yo bayaran, ontawag ed Katawan na sumpad sikayo, et sikayoy mankasalanan.

16Ag nepeg a pateyen iray ateng lapud kasalanan a ginawa na saray anak da, tan ag nepeg a pateyen iray anak lapud saray kasalanan a ginawa na saray ateng da; say sakey a too nepeg a pateyen lapud kasalanan a sikaton diliy nanggawa.

17Ag yo pipikeweten so katunongan da ray sangkaili tan saray olila; tan ag yo aalaen so kawes na biin balo a kaletan na utang tod sikayo.

18Ag yo lilingwanan ya aripen kayo nen saman ed Egipto tan imbolus kayo na Katawan a Dios yo; sikayo yay makasengeg na impangiteran kod sikayo yan ganggan.

19No manggapas kayod alog yo et alingwanan yoy arum a ginapas yo, ag yo la papawilen ya alaen; nepeg ya itilak la rad man a para saray sangkaili, saray olila, tan saray bibiin balo, pian say Katawan a Dios yo et bindisionan toy amin a gawaen yo.

20No mamborbor kayod kaolibaan yo, ag yo la papawilen a tortoren so atilak; nepeg a betang la ra na saray sangkaili, saray olila, tan saray bibiin balo.

21No mamborbor kayod kaubasan yo; ag yo papawilen a tortoren iray atilak; nepeg a betang la ra na saray sangkaili, saray ilila, tan saray bibiin balo.

22Ag yo lilingwanan ya aripen kayo nen saman ed Egipto; sikato yay makasengeg na impangiteran kod sikayo yan ganggan.