BILANG 29 - Maung a Balita Biblia (PnPV)(PnPV)

Saray Bagat No pista na Balon Taon(Lev. 23:23-25)

1Diad ononan agew na kumapiton bulan, nepeg a mantitipon kayon mangigalang ed Dios tan ag kayo mankikimey. Diad satan ya agew paknulen iray trumpita.

2Mangisaklang kayod Katawan na bagat a popoolan a say balingit to et makapaliket ed sikato: sakey a kilaw na bakan kalakyan, sakey a karniron kalakyan, tan pitoran sakey taon a kordiron kalakyan; nepeg ya anggapoy deral na laman da.

3Mangyapay kayo na manepeg a bagat a trigo, say arinan nikames ed larak na oliba; kapag sakey a bakan kalakyan tekepan yo na taloran kilon arina, samay karniron kalakyan duaran kilon arina,

4tan kapag sakey a kordiro sakey kilon arina.

5Mangyapay kayo met na sakey a kanding a kalakyan a sikatoy bagat a para kasalanan, et diad onya nagawa so sirimonya a panlinis ed saray totoo.

6Isaklang yo ra ya a kaaruman na bagat a popoolan para ononan agew na bulan a katekep toy bagat a trigo tan say inagew-agew a bagat a popoolan a katekep toy bagat a trigo tan say bagat ya alak. Sarayan bagat a popoolan et makapaliket ed Katawan so balingit da.

Saray Bagat No Agew a Pangekal na Kasalanan(Lev. 23:26-32)

7Diad kumaplon agew na kumapiton bulan mantitipon kayon mangigalang ed Dios; ag kayo mamangan odino mankikimey.

8Mangisaklang kayod Katawan na bagat a popoolan a say balingit to et makapaliket ed sikato: sakey a kilaw na bakan kalakyan, sakey a karniron kalakyan tan pitoran sakey taon a kordiron kalakyan; nepeg ya anggapoy deral na laman da.

9Mangyapay kayo na manenepeg a bagat a trigo, say arinan nikames ed larak na oliba: say sakey a bakan kalakyan tekepan yo na taloran kilon arina, saray karniron kalakyan duaran kilon arina,

10tan kapag sakey a kordiro sakey kilon arina.

11Mangyapay kayo met na sakey a kanding a kalakyan a sikatoy bagat a para kasalanan, a kaaruman na kanding a nibagat diad panggawa na sirimonyan panlinis ed saray totoo, tan say inagew-agew a bagat a popoolan a katekep toy bagat a trigo tan say bagat ya alak.

Saray Bagat No Pista na saray Abung-abung(Lev. 23:33-44)

12Diad kumalabiliman agew na kumapiton bulan mantitipon kayon mangigalang ed Dios. Silibraan yon pitoy agew yan pista a pamagalang yod Katawan tan ag kayo mankikimey.

13Diad ononan agew na sayan pista mangyapay kayod Katawan na bagat a popoolan a say balingit to et makapaliket ed sikato: labintalon kilaw na bakan kalakyan, duaran karniron kalakyan, tan labinapat a sakey taon a kordiron kalakyan; nepeg ya anggapoy deral na laman da.

14Mangyapay kayo na manepeg a bagat a trigo, say arinan nikames ed larak na oliba: kapag sakey a bakan kalakyan tekepen yo na taloran kilon arina, samay karniron kalakyan duaran kilon arina,

15tan kapag sakey a kordiro sakey kilon arina.

16Mangyapay kayo met na sakey a kanding a kalakyan a sikatoy ibagat a para kasalanan. Iyapay yo ra ya a kaaruman na inagew-agew a bagat a popoolan a katekep toy bagat a trigo tan say bagat ya alak.

17Diad kumadwan agew mangibagat kayo na labinduan kilaw a bakan kalakyan, duaran karniron kalakyan, tan labinapat a sakey taon a kordiron kalakyan; nepeg ya anggapoy deral na laman da.

18-19Ibagat yo ra ya a katekep da ray arum nin bagat a kinaukolan ed ononan agew na pista.

20Diad kumatlon agew mangibagat kayo na labinsakey a malangwer a bakan kalakyan, duaran karniron kalakyan, tan labinapat a sakey taon a karniron kalakyan; nepeg ya anggapoy deral na laman da.

21-22Ibagat yo ra ya a katekep da ray arum nin bagat a kinaukolan ed ononan agew.

23Diad kumapat ya agew mangibagat kayo na samploran kilaw a bakan kalakyan, duaran karniron kalakyan, tan labinapat a sakey taon a kordiron kalakyan; nepeg ya anggapoy deral na laman da.

24-25Ibagat yo ra ya a katekep da ray arum nin bagat a kinaukolan ed ononan agew.

26Diad kumaliman agew mangibagat kayo na siamiran kilaw a bakan kalakyan, duaran karniron kalakyan, tan labinapat a sakey taon a kordiron kalakyan; nepeg ya anggapoy deral na laman da.

27-28Ibagat yo ra ya a katekep da ray arum nin batgat a kinaukolan ed ononan agew.

29Diad kumanem ya agew mangibagat kayo na waloran kilaw a bakan kalakyan, duaran karniron kalakyan, tan labinapat a sakey taon a kordiron kalakyan; nepeg ya anggapoy deral na laman da.

30-31Ibagat yo ra ya a katekep da ray arum nin bagat a kinaukolan ed ononan agew.

32Diad kumapiton agew mangibagat kayo na pitoran kilaw a bakan kalakyan, duaran karniron kalakyan, tan labinapat a sakey taon a kordiron kalakyan; nepeg ya anggapoy deral na laman da.

33-34Ibagat yo ra ya a katekep da ray arum nin bagat a kinaukolan ed ononan agew.

35Diad kumawalon agew mantitipon kayon mangigalang ed Dios tan ag kayo mankikimey.

36Mangyapay kayod Katawan na bagat a popoolan a say balingit to et makapaliket ed sikato: sakey a kilaw na bakan kalakyan, sakey a karniron kalakyan, tan pitoran sakey taon a kordiron kalakyan; nepeg ya anggapoy deral na laman da.

37-38Ibagat yo ra ya a katekep da ray arum nin bagat a kinaukolan ed ononan agew.

39Sikara ya so totontonen a nipaakar ed saray bagat a popoolan, saray bagat a trigo, saray bagat ya alak, tan saray bagat a para kareenan ya iyapay yo rad Katawan no silibraan yo ray niganan pista yo. Sikara yay a kaaruman na saray bagat ya isaklang yo diad panumpal yoy insipan yo odino isaklang yo ran bagat a manlapud mabolus a linawa.

40Kanyan si Moises imbaga tod saray totood Israel iray amin ya ingganggan ed sikato na Katawan.