JEREMIAS 27 - Maung a Balita Biblia (PnPV)(PnPV)

Si Jeremias Pinakoan toy Sikaton-dili

1Ag abayag nen nagmaliw ya ari na Juda si Sedekias a lakin anak nen Josias, imbaga na Katawan ed siak

2a manggawa ak na pako, singeran ko na katat tan iyan kod beklew ko.

3Insan say Katawan imbaga tod siak a paibagak ed saray ararid Edom, Moab, Ammon, Tiro, tan Sidon diad panamegley na saray ibabaki ra a wala ra natan ed Jerusalem, ta mitongtong irad kinen Ari Sedekias.

4Say Katawan a Makapanyarin-amin a Dios na Israel imbaga tod siak ya iganggan ko ra ya ibaga rad saray arari ra a say Katawan inkuanto:

5Siak, diad panamegley na pakayarik tan biskeg ko, pinalsak so mundo, saray totoo, tan amin ya ayayep a manaayam ed tapew na dalin; iiter ko ya ed siopaman a labay kon pangitdan.

6Siak so angyan ed sarayan amin a bansa diad silong na pakayari na aripen kon Ari Nabucodonosor na Babilonia. Panlilingkuren ko met ed sikato iray anggan ayayep ed katakelan.

7Manlingkur ed sikato ray amin a bansa, tan manlingkur irad anak ton laki tan say apo ton laki, anggad isabiy panaon na kapelag na bansa ton dili. Diad satan manlingkur so bansa to ed saray makapanyarin bansa tan diad saray matalonggaring ya arari.

8Balet no walay bansa odino nanarian ya ag onsilong ed pakaoley nen Nabucodonosor tan ag ontoluk ed pakaoley to, dusaen ko itan a bansa diad panamegley na bakal, eras, tan salot, anggad sigput a napaderal kod sikato.

9Ag yo dedengelen iray propita yo, odino siopaman a mangibabagan nayarian ton ipasakbay so nagawa ed arapen diad panamegley na saray kogip, odino diad panamegley na panawag tod saray ispiritu na saray inaatey, odino diad panamegley na salamangka. Ibabaga ran amin ya ag kayo nepeg a manlingkur ed ari na Babilonia.

10Papalikdoen da kayo tan sikaray makasengeg na kibantak yod pasen ya arawid bansa yo. Pataynanen ta kayo tan naderal kayo.

11Balet no onsuko so sakey a bansa ed ari na Babilonia tan panlingkuran to, abuloyan kod satan a manayam ed dilin dalin to, dalusan to, tan panayaman to. Siak, say Katawan, so nansalita.

12Onya met so inkuankod kinen Ari Sedekias na Juda, Paoleyan kad ari na Babilonia. Manlingkur kad sikato tan saray totoo to, et mambilay ka.

13Akin et ompatey kayod bakal, o diad salot? Sikato yay imbaga na Katawan a nagawa ed dinan man a bansan ag paoleyan ed ari na Babilonia.

14Ag yo dedengelen iray propitan mangibabaga ya ag yo nepeg a panlingkuray ari na Babilonia. Papalikdoen da kayo labat.

15Say dilin Katawan so angibaga ya ag to ra imbaki tan diad ngaran to titilaan da kayo. Kanyan sirin, pataynanen to kayo tan napatey kayo, sikayo tan saray propitan mantitilad sikayo.

16Insan imbagak ed saray papari tan saray totoo a say Katawan kuanto: Ag yo dedengelen iray propitan mangibabaga a magano lan nipawil manlapud Babilonia iray kayamanan ed Timplo. Titilaan da kayo.

17Ag yo ra dedengelen! Paoleyan kayod ari ed Babilonia, et mambilay kayo! Akin et magmaliw a bontun na deral-deral yan siudad?

18No talagan propita ra, tan awit day salitak, pakerew mo rad siak a Makapanyarin-amin a Katawan ya ag ko abuloyan a naalad Babilonia iray nakdaan a kayamanan ed Timplo tan diad palasio na ari.

(

19-20Nen si Ari Nabucodonosor et inyakar tod Babilonia si Jeconias a lakin anak nen Joakim tan ari na Juda, tan saray manonan totoo ed Juda tan Jerusalem, intilak to ray may lusek, samay dipositoway danum, saramay kariton, tan saray arum a kayamanan ed timplo.)

21Dengel moy ibabagak, siak a Makapanyarin-amin a Katawan a Dios na Israel, nipaakar ed saray kayamanan ya atilak ed Timplo tan diad palasio ed Jerusalem:

22Naala rad Babilonia tan mansiansia rad man ya anggad agew a limengen ko ra. Alaen ko rad satan tan ipawil ko rad sayan pasen. Siak, say Katawan, so nansalita.