SARAY ARARI 16 - Maung a Balita Biblia (PnPV)(PnPV)

1Nansalitay Katawan ed kinen propita Jehu a lakin anak nen Hanani tan impaikuantod kinen Baasa:

2Ag da ka ni italtalek nen saman, et ginawa ta kan pangulo na saray totook ya Israelita, balet nankasalanan kan singa si Jeroboam tan inlagyat mon nankasalanan iray totook. Pinmetang so olok lapud saray kasalanan da,

3kanyan paandipaten ta ka tan saray kabyangay pamilyam, a singa ginawak ed kinen Jeroboam.

4Kanen na saray aso so angkay na siopaman a kabyangay pamilyam ya ompatey ed siudad, tan siraen na saray manok a buitri so bangkay na siopaman ya ompatey ed kaalogan!

5Nisulat ed libron Say Awaran da ray Ararid Israel iray arum nin ginagawa nen Baasa tan saray impanatalo tod bakal.

6Inatey si Baasa, nipompon ed Tirza, insan sinmalat ed sikaton nanari si Ela a lakin anak to.

7Niiter ed panamegley nen propita Jehu a lakin anak nen Hanani so salita na Katawan sumpad kinen Baasa tan saray kabyangan na pamilya to, lapud saray kasalanan nen Baasa ed Katawan. Aliwa labat a say impanggagawa toy kaogsan, a singa say impanggagawa nen Jeroboam ya akaonan nanoley nen say sikato, so makasengeg na impamasnuk na Katawan, no ag ingen lapu met ed impamatey tod kinen Jeroboam tan amin kabyangan na pamilya to.

Si Ari Ela na Israel

8Diad kumaduamplo tan anem a taon na panooley nen Ari Asa ed Juda, nagmaliw ya ari na Israel si Ela a lakin anak nen Baasa, tan nanoley a duay taon ed Tirza.

9Nantraidoran nen Zimri a sakey ed saray opisyal ton makaoley ed kapalduad saray karwahi na ari. Aminsan ya agew, maniinom na alak ed Tirza so ari diad abung nen Arza a makaoley ed palasio.

10Linmoob ed abung si Zimri, pinatey toy Ela, insan sinalatan ton nanari. Agawa ya diad kumaduamplo tan piton taon na panooley nen Asa ed Juda.

11Kagapoy impanari nen Zimri, pinatey ton amin iray kabyangay pamilya nen Baasa. Apatey ya amin iray lalakin kakanayon tan kakaaro to.

12Kanyan onung na imbagay Katawan sumpad kinen Baasa diad panamegley nen propita Jehu, pinatey nen Zimri ya amin iray kabyangay pamilya nen Baasa.

13Apampasnuk nen Baasa tan say lakin anak ton si Ela so Katawan a Dios na Israel, lapug impangigalang dad saray talintaoy diriyos tan lapud impangilagyat dan nankasalanan iray Israelita.

14Nisulat ed libron Say Awaran da ray Ararid Israel iray arum nin ginagawa nen Ela.

Si Ari Zimri na Israel

15Diad kumaduamplo tan piton taon na impanoley nen Ari Asa ed Juda, nanoley ed Tirza diad Israel na pitoy agew si Zimri. Lolooban ed saman na saray sondalo na Israel so siudad na Gibeton na Filistia,

16et nen nadngelan dan nantraidoran nen Zimri so ari tan pinatey to, imbawag da lad man a manari ed Israel si Omri a pangulo ra.

17Tinaynan nen Omri tan saray sondalo to so Gibeton, ta nila ran nilooban so Tirza.

18Nen anengneng nen Zimri ya alooban lay siudad, linmad tirinsira ed dalem na palasio, insan pinoolan toy palasio tan diman la akalut.

19Agawa ya lapud saray kasalanan to tan, lapud nilagyat ton nankasalanan so Israel a singa ginawa nen Jeroboam ya akaonan nanoley nen say sikato.

20Nisulat ed libron Say Awaran da ray Ararid Israel iray arum nin ginagawa nen Zimri pati say impamatey tod lipotan.

Si Ari Omri na Israel

21Apaldua so totood Israel: say kapalduad sikara labay et dan manari si Tibni a lakin anak nen Ginat, balet say kapaldua labay day Omri.

22Diad kaonuran, analo ra may malabay ed kinen Omri; inatey si Tibni tan nagmaliw ya ari si Omri.

23Kanyan diad kumatalomplo tan sakey a taon na panooley nen Ari Asa ed Juda, nagmaliw ya arid Israel si Omri, tan nanoley a labinduay taon. Nanoley ed Tirza nen ononan anemiran taon,

24insan to sinaliw na anem a libon pilak ed toon manngaran na Semer so pokdul na Samaria. Pinadir nen Omri imay pokdul, amaalagey na sakey a baley diman, insan to inngaran na Samaria, say ngaran ya inaon ed Semer ya akankien nen saman ed samay pokdul.

25Pinalumbasan nen Omri iray akaonan nanoley nen say sikato diad impankasalanan tod Katawan.

26Singa si Jeroboam, apampasnuk toy Katawan a Dios na Israel, lapud saray kasalanan to tan lapud nilagyat ton nankasalanan tan angigalang ed saray talintaoy diriyos iray totoo.

27Nisulat ed libron Say Awaran da ray Ararid Israel iray arum nin ginagawa nen Omri tan amin ya asumpal ton kimey.

28Inatey si Omri, nipompon ed Samaria, insan sinmalat ed sikaton nanari si Acab a lakin anak to.

Si Ari Acab na Israel

29Diad kumatalomplo tan walon taon na panooley nen Ari Asa ed Juda, nagmaliw ya arid Israel si Acab a lakin anak nen Omri, tan nanoley ed Samaria na duamplo tan duan taon.

30Pinalumbasan ton amin iray akaonan nanoley nen say sikato diad impankasalanan tod Katawan.

31Ag apera ed impangalig tod kasalanan nen Jeroboam; pinalumbasan to ingen, ta inasawa toy Jezebel ya anak nen Ari Etbaal na Sidon, tan angigalang ed Baal.

32Nanggawad Samaria na timplo nen Baal, inggawaan to met na altar, insan to inyan ed dalem na timplo.

33Nanggawa met na talintao nen diosan Asera. Pinalumbasan ton nankasalanan iray amin ya ararid Israel ya akaonan nanoley nen say sikato, lapud saray ginagawa ton maoges ya amasnukay Katawan a Dios na Israel.

34Legan na impanoley to, si Hiel a taga Betel pinasimbalo ton impaalagey so Jerico. Diad impangiletneg tod pundasion na Jerico inatey si Abiram a lakin pangulowan ya anak to, tan diad impamaalagey tod saray puirta inatey si Segub a lakin yogtan ya anak to. Abalang nen Hiel ira yan anak to, onung na impasakbay na Katawan diad panamegley nen Josue a lakin anak nen Nun.